VepKar :: Texts

Texts

Return to list | edit | delete | Create a new | history | Statistics | ? Help

Alevtina Lesonen. Iloni mualilauta

Alevtina Lesonen

Iloni mualilauta

Karelian Proper
Kalevalan Lapšien monitoimitalošša oppivuuvven alušta alettih toimie kerhot. Nykyjäh šielä ruatau nellätoista kerhuo, kumpasih käyväh eri-ikäset lapšet. Kaikki nämä kerhot ollah hyvin mukavat. Jokahini lapši voit löytyä ičellä mielehini kerho, kumpasešša hiän tahtou harjotella. Eryähät lapšet käyväh kahteh tahi kolmehki kerhoh. Yksi mielenkiintosimmista ta epätavallisimmista on Iloni mualilauta -kerho. Tuanoin mie kävin nuorien taiteilijien ativoissa ta šain tietyä äijän uutta ta mukavua.

Iloni mualilautaon hyvin nuori. Yhissyš toimiu vain kolme vuotta. Še on ainut kerho Kalevalašša, kumpaseh voijah tulla ihan pikkaraiset kakšivuotiset lapšet. Harjotukšien aikana hyö piirruššetah hiekalla valostolilla. Tämä homma niin miellyttäy lapšie, jotta hyö joka šuovatta tahi pyhäpäivä mielelläh juoššah kerhoh. Huolimatta šiitä, jotta harjotukšet on makšulliset, halukkahie aina on äijän.
Kerhuo ohjuau opaštaja Natalja Stepanova. Hiän oman vesselän auttajan Petruška-šormikaškuklan kera kertou lapšilla ihmelliseštä hiekan muajilmašta, missä hiekkua voit kuatua, vetyä valostolan yheltä puolelta toiseh šekä piiruštua yhellä kiällä tahi molomillaki. Studijošša kuuluu hil’l’ani musiikki, opaštaja šammuttau valot ta ašettau lamppuja stolien alla. Lapšien ympäri huonehešša on erilaisie kukkasie. Kaikki tämä heti viey pienokaisie erinomaseh ilmapiirih. Näin lapšilla avautuu pieni starinamuajilma.
Šemmosella tunnilla pikkaraiset taiteilijat ei keritä ikävyštyö, šentäh kun opaššušprosessi on oikein rikaš. Natalja mie lelläh opaštau pienie kašvattija piiruštamah, pitäy huolta lapšista, kaččou, jotta hyö tarkašti käytettäis hiekkua. A još piiruššuš ei onnistun, niin šeki ei ole proplema. Voit ruttoh puissalluttua hiekat, šiitä tuaš kuatua hiekkua lasin piällä ta piiruštua uuvveštah.
Tunti keštäy kuušikymmentä minuuttie ta šen lisäkši on kymmenen minuutin väliaika. Šen aikana opaštaja viey kašvattijah Lapšien monitoimitalon šuureh urheilušalih, missä opaštujat voijah leikkie pallon kera, juošša ta hyppie. Kaikki tämä tietyšti hyvin miellyttäy pikkaraisie.
Spesialistit rikeneh neuvotah oštua šemmoni jo valmis valostola kaupašta tahi ičen luatie še, jotta lapšet voitais toistua ta näyttyä vanhemmilla kaikki tehtävät koissa. Stolalauta pitäy tehä orgaanisešta lasista ta luatie šiih korkiet laijat. Šiitä pitäy ašettua stolah valot.
Tietyšti vielä pitäy löytyä šopivua hiekkua. Šitä varoin paššuau tavallini hieno ta puhaš hiekka. Ka enšin šitä pitäy paistua paissinkiukuašša. Kiukuan lämpötila pitäy olla 150–200 aštetta. Hiekan ieštä voit käyttyä ni mannua. Lisyä tietuo valostolan luatimisešta voipi helpošti löytyä internetista.
Hiekalla piiruštamini on oikein hyövyllini ruato kuin lapšilla, niin ni aikuhisilla. Hiekalla piiruštamini rauhottau ta hillentäy, ottau pois tuntehellisen kirissykšen, auttau lapšen kehityštä.
Lapšet tykätäh leikkie kuivien ainehien kera, näin hyö kehitetäh käsien pientä motoriikkua, luomiskykyjä ta mielikuvitušta, muistie ta ahkerutta. Kahella kiällä piiruštamini kehittäy aivojen kahen puolen vuorovaikutušta. A konša aivojen puoliskot ollah yštävie, niin ihmini tulou aktiivisekši ta hokšuajakši.
Šen lisäkši Iloni mualilauta -kerhošša pienet taiteilijat opaššutah šeuruššella toini toisen kera. Hyö ilosešti ta rauhallisešti vietetäh aikua.