Texts
Return to list | edit | delete | Create a new | history | Statistics | ? Help
Anastasia Jevtušenko. Todesine vepsläine naine
Anastasia Jevtušenko
Todesine vepsläine naine
Veps
New written Veps
Vepsän
kulʼtursebran Jubilejaks : Necil kerdal starinoičem teile vepsläižen naižen polhe Šoutjärvespäi .Hänen nimi om Nina Konstantinovna Rembot .Hän om todesine vepsläine , hüvä opendai , enzne školan pämez’ da muite lujas hüväsüdäimeline ristit .
Nina Konstantinovna om sündunu vodel 1942 Belozersk-lidnaha , mitte sijadase Vologdan agjas .Sihe Nina Konstantinovnan mamad evakoitine voinan aigan .Maman jured oma Kaskez-küläspäi .Hän oli vepsläine .Mam radoi opendajan da kazvatajan .Hän kaiken aigan starinoiči tütrele školan polhe i nened starinad igäks jäiba Nina Konstantinovnan muštho .Vodel 1944 Nina Konstantinovna mamanke pördihe Kaskez-külähä .Tatoi koli voinan aigan .
Nina Konstantinovna openzihe Šoutjärven školas .Hän lopi 10 klassad .Hän openzihe hüvin , attestatas om vaiše kaks’ 4-arvsanad .Jäl’ges školad Nina Konstantinovna lopi Petroskoin pedagogižen radmahttehnikuman i sai ”augotižškolan opendai ”-professijan .Händast oigetihe radmaha Krivoi Navolok-külähä , mitte oli Änižjärven rajonas läz Ladva-vetka-küläd .Nece oli meckülä i pigai se saubatihe .Jäl’ges Nina Konstantinovna radoi opendajan da openduzohjandajan Lesnoi-küläs , no škol mugažo saubatihe .
Siloi Nina Konstantinovna päti ajada maman kodimale Kalag’-külähä i radoi sigä augotižškolan opendajan .Sil aigal hän lopi Petroskoin pedagogižen institutan i sai mantedon opendai-professijan .Ühten voden institutan jäl’ghe Nina Konstantinovna radoi Šoutjärven školas , no jäl’ges pördihe Kalagen školha .Sigä hän radoi školas openduzohjandajan da vedi mantedod .
Vodel 1975 Kalagen školan pämez’ Nina Nikitična Jarkojeva läksi küläspäi i Nina Konstantinovna tuli hänen sijale .Hän radoi školan pämehen 19 vot .Nina Konstantinovna om üks’ nenišpäi opendajišpäi , ken ezmäine zavodi opeta lapsid vepsän kel’he školas .
Minä küzuin školan openikoil , miččen pämehen da opendajan oli Nina Konstantinovna .Kaik minei sanuiba ühthe än’he , miše Nina Konstantinovna om tark da küzui opendai i ohjandai , holekaz da naiželine naine .
Jelizaveta Jevgenjevna Haritonova sanui : ”Nina Konstantinovnal om todesine vepsläine taba , hänes tundub mugoine ”vepsän naižen matriarhat ”.Školas kaiken aigan oli puhtaz da kodikaz .Hän navedi , miše kaik oliži ičeze sijal .Kaiken aigan hän küzeli , kut azjad oma .Hän paksus ajeli mamannoks Šoutjärvehe , lujas armastab ičeze plem’annikoid – sizaren poigid .Hän om radonnavedii da tahtokaz ristit .Nina Konstantinovna om todesine vepsläine naine !”
Svetlana Pasʼukova openzihe Nina Konstantinovnanke ühtes klassas .Naku , mi hän johtutab : ”Mö Ninake ühtes lopim Šoutjärven školan , kus eliba čomad tradicijad i oliba hüväd opendajad .Sikš , konz tuli aig valita eloradod , oli jo sel’ged , keneks mö tahtoim tehtas .Ei muite Nina Konstantinovna tegihe školan pämeheks-ki .Kut enzne Karjalan valdkundan Opendusen ministerstvan radnik , voin sanuda , miše školan kollektiv , mittušt ohjanzi Nina Konstantinovna , oli kaiken vaumiž tartta miččehe-ni udehe azjaha .I tegi sen lujas hüvin .Ezmäižed vepsän kelen tundijoiden konkursad mäniba Kalagen školas .Ezmäižid rahalahjoid i grantoid mugažo anttihe Kalagen školan kollektivale .Opendajile lujas abuteliba vanhembad .Nina Konstantinovna oli äitedoižen , küzujan ohjandajan .Pagištes Nina Konstantinovnanke minä küzuin : ”Mitte kaikid ozakahamb päiv oli sinun elos ?”.Hän sanui meletamata : ”Rad školas !”
Vodel 1994 Nina Konstantinovna Rembot tuli Vepsläižen volostin pämeheks i necen polhe hän starinoiči minei vähän .No om ristit , kudamb radoi hänenke ühtes .Nece om Zinaida Ivanovna Strogalščikova , hän starinoiči minei : ”Nina Konstantinovnanke mö tundištimoiš 1980-voziden lopus , konz Karjalas vaiše zavodihe vepsän kelen opendamine .Hän oli Kalagen školan pämehen .Tabal hän om todesine vepsläine , ustavakaz , azjakaz da lujas uskoline .Mö nügüd’-ki tedam , miše vepsän kelen opendamine školas rippub školan pämehespäi .Nina Konstantinovna ezmäi kaikid tegi muga , miše vepsän kel’ oli kuti predmet openduzplanas .Hän , kut i toižed aktivistad , mugomad kut R .P .Lonin , A .P .Maksimov , R .F .Maksimova , P .P .L’ovkina , om todesine vepsläine henged möto .
Ezmäižid vepsän kelen urokoid vedi Rürik Petrovič Lonin .Vodespäi 1988 vepsän kelen opendamine zavodihe Šoutjärven da Kalagen školiš .Vepsän kel’t openziba 59 openikad , a kahtes vodes päliči – 140 openikad .Siloi Vepsän kul’tursebrale tuli mel’ tehta üksjäine opendamižen sistem vepsläižen rahvahan täht da tehta vepsän kelen openduzmahton keskuz , miččele oli tarbiž kirjutada vepsän kelen openduzkirjoid .Nece azj tuli mel’he Venäman opendamižen ministerstvale .Vodel 1992 oli tehtud specialine radjouk , miččehe mülüiba Nina Konstantinovna Rembot i Viktor Petrovič Jeršov – Vidlan školan pämez’ .Hö ajeliba Karjaladme da pagižiba küliden eläjidenke , miše tarbiž opeta vepsän kel’t školiš .
Siloi oli jüged elonaig , politikan pämehed paksus vajehtihe i kundaline rad mäni Vepsän kul’tursebran abul , muga nügüd’-ki om .
Nina Konstantinovna siloiki oli azjakahan ohjandajan .I konz tuli mel’ tehta Vepsläine volost’ , ka kaik meiden aktivistad pätiba , miše pämehen pidab olda Nina Konstantinovna Rembotale .Ei olend nimittušt kahteldust , miše ristitud ei änestagoi händast ”.
Hänen polespäi nece oli lujas rohked tego .Nina Konstantinovna sil aigal oli ezmäine naine , kudamb tegi mugoižen tärktan azjan .Konz Volost’ saubatihe , Nina Konstantinovna tuli Kalagen školha vedämaha mantedod .Vaiše vodel 2005 hän läksi pensijale .Hän radoi školas 39 vot .Hänel oma mugomad nagradad , kut ”Значок за творческий педагогический труд ”, ”Отличник народного просвещения ”, ”Учитель-методист ” – kucund , ”Почётная грамота РК ”.
Toivotan hänele tervhut da ozakast elod .Nina Konstantinovna om todesine vepsläine , hän om hüvä ezikuva kaikile !
Todesine vepsläine naine
Veps
New written Veps