Texts
Return to list | edit | delete | Create a new | history | Statistics | ? Help
Maria Košeleva. Čomad ozutelused vepsäks
Maria Košeleva
Čomad ozutelused vepsäks
Veps
New written Veps
Kül’mkun
2.päiväl Kalagen školas mäni jo V ”Vepsläine sarn ”–festival’ .Tradicijan mödhe festivalile keradasoiš lapsed erazvuiččiš regionoišpäi , kus opetas vepsän kel’t .Lapsed oma eri-igäižed : ani pened lapsed päivkodišpäi da vanhembad openikad ozutaba ičeze mahtoid ühtel scenal .Hö ozutaba sarnoid vepsän kelel .Festivalin tegijad oma Rahvahaližen da regionaližen politikan ministerstv , ”Periodika ”–paindišt da Kalagen keskškol .
Täl kerdal oli todesine jubilejan festival’ , sikš ku se kerazi lujas äi rahvast .Kalagen školan sportzalas ei olend ni üht joudajad sijad .Sigä oli enamb mi kaks’sadad festivalin ühtnikoid da adivoid .Paiči lapsid , konkursale tuliba kanzan kollektivad .Festivalihe ühtniba vepsläižed Karjalaspäi , Piterin da Vologdan agjoišpäi .
Koncertan avaižiba päivkodiden kollektivad Kalagespäi , Šoutjärvespäi da Šokšuspäi .Kaikid penembad ühtnikad ozutiba adivoile ei vaiše teatraližid mahtoid , no čomad-ki vepsän kelen mahtod .Pälahj anttihe Kalagen päivkodin sebrale , mitte ozuti ”Lumineičukaine ”–sarnan .
Konkursas oli koume nominacijad .”Rahvahaline sarn ”–nominacijas oli ezitadud vepsläižed da karjalaižed rahvahaližed sarnad , ”Kanzan tradicijad ”–nominacii oli omištadud tradicijoile , miččed tuleba sugupol’vespäi toižhe , ”Vepsläine kaleidoskop ”–nominacijaha mülüiba nügüd’aigaližed da ilokahad ozutelused .
Ezmäižes nominacijas vägesti Kalagen školan kollektiv ”Parm da kozad ”–sarnanke .”Vepsläižes kaleidoskopas ” pauklahjan oti Vologdan agjan kollektiv ”Kastkuine ”. Vidlkülän kollektiv ”Kelen da tradicijoiden kaičijad ” ezini ozutelusenke voinan aigan polhe da sai ezmäižen sijan ”Kanzan verod ”–nominacijas .
Völ üks’ pauklahj – speciali ne žurij oukun priz – anttihe Vologdan agjan Kujan školan ”Linduižed ”–sebrale .Lapsed ozutiba ”Aša i kondi ” – sarnan .Prionežjen administracijan pämehen prizan saiba Šokšun školan lapsed ”Kut mužik lehmän möi ” – sarnas .
Paiči sarnoid Festivalin aigan tehtihe pirdatusiden konkurs ”Kel’ om minun Kodima ”.Se oli omištadud Rahvazkeskeižele igähižiden rahvahiden keliden vodele .
Konkursas vägestiba lapsed Piterin da Vologdan agjoišpäi .
Sil päiväl niken ei jänd lahjata : kaik kollektivad saiba festivalin diplomoid , kitändkirjeižid , lahjoid da kirjoid vepsän kelel .
Praznikan programm oli melentartuine da ilokaz : kuni ühtnikad vaumičihe ičeze ozutelusikš , scenal eziniba pajo - da kargsebrad , vedäjad vaumičiba interaktivižid tegoid .Vodespäi vodhe Festival’ kazvab .Tuleb kaik enamba kollektivoid erazvuiččiš agjoišpäi , ühtnikad tarkašti vaumičeba sädoid , ozutaba čomid vepsän kelen mahtoid .Se ozutab , miše melentartuz’ kodikel’he lapsiden keskes ei sambu , a vaiše kazvab .
Festival’ sai äi hüvid arvostelusid .Ristitud jagasoiš mei denke ičeze tundmusidenke , mel’ pidoidenke .Ühten niišpäi tö voit lugeda lehtpolel 6.
Čomad ozutelused vepsäks
Veps
New written Veps