Texts
Return to list | edit | delete | Create a new | history | Statistics | ? Help
Larisa Smolina. Tedokonferencii vajehtihe čomal praznikehtal
Larisa Smolina
Tedokonferencii vajehtihe čomal praznikehtal
Veps
New written Veps
Redukun
24.-25.päivil Petroskoi vastsi adivoid Rahvazkeskeižele tedokonferencijale .Sen nimi oli ”Karjalan man igähižed rahvahad : istorii da nügüdläine aig ”.Konferencii mäni kanman Karjalan man 100–vottušt jubilejad .Sen tegijad – Karjalan Rahvahaližen da regionaližen politikan ministerstv , Tedokeskuz da ”Periodika ”–paindišt .
PLENARIŽEN IŠTUNDAN PÄTEM
Avaižihe konferencii čomal ”Kantele ”–ansambl’an vändol da adivoiden tervhensanoil .Niid pidiba Karjalan valdkundan varapämez’ Larisa Podsadnik , Karjalan parlamentan pämez’ Elissan Šandolovič , Karjalan Tedokeskusen varapämez’ Jurii Zaika , Rahvahiden azjoiden federaližen agenstvan radnik Marina Ramazanova da Petroskoin universitetan radnik Jekaterina Okuneva .
Jäl’ges ezini Rahvahaližen da regionaližen politikan ministr Sergei Kisel’ov .Hän starinoiči , kut ministerstv abutab nügüd’ igähižile rahvahile Karjalan mal : paindas kirjoid karjalan , suomen da vepsän kelil , kehitoittas etnožurnalistik , vaumitas kelentedajid , sadas Petroskoin universitetas enamba sijoid , kuna openikad voižiba tulda opendamhas ilma rahoita jäl’ges školad .Sergei Viktorovičan sanoiden mödhe , tämbei tarbiž vaumita enamba norištod , kudamb voiži tulda radole televidenijale , radioho , lehtesihe , kul’turaha , rahvahaližihe keskusihe .Nügüd’ oma joudajad sijad , a rata ei ole kelle .Sikš pidab pätta necidä-ki problemad .
Melentartuižid paginoid pidiba tedomehed Moskvaspäi , Piterišpäi da Suomespäi .Hö starinoičiba karjalan da vepsän rahvahiden elon , kul’turan da kelen polhe , Karjalan man politikas da zakonoiš , miččed radaba nügüd’ i miččed ei rakoi nikut igähižiden rahvahiden hüvüdeks .
RAD SEKCIJOIŠ VAJEHTIHE ČOMAL KONCERTAL
Plenarižen ištundan rad vajehtihe radol sekcijoiš , kus enamba pagištihe karjalan da vepsän rahvahiden ičetundmusen , kelen , kul’turan da literaturan polhe .Tedomehed , opendajad , kul’turradnikad , valdmehed , lehtmehed da muite aktivižed karjalaižed da vepsläižed ristitud kerazihe ühtes , miše el’geta , miš holduba nügüd’ meiden rahvahad , kut eläba , miččed tradicijad kaičeba , kut kehitoitaba kel’t da kul’turad mugoižes sures mirus da völ eläba ladus toižiden rahvahidenke Karjalanmal .
Lopihe konferencijan ezmäine päiv čomal praznikal , mitte pidetihe Petroskoiš Vepsän kul’tursebran , Karjalan rahvahan da Inkerilaižen sebran 30–voččeks jubilejaks .Koncert mäni Karjalan Rahvahaližes teatras .Aktivižile karjalaižile da vepsläižile , ked nügüd’-ki tegeba hüvid azjoid ičeze rahvahiden hüvüdeks , anttihe medalid da kitändkirjeižid Karjalanman valdkundan pämehelpäi .Vepsän kul’tursebran polespäi medalin sai Zinaida Strogalščikova , a kitänd kirjeižid – Nina Zaiceva da Ol’ga Žukova .Ihastoitiba koncertan aigan kaikid kacujid ičeze čomil pajoil karjalaine , inkerilaine , Vepsän rahvahan , Petroskoin universitetan horad da ”Kantele ”–ansambl’an kargnikad .
Konferencijan toižel päiväl rad jatksihe möst sekcijoiš .Toižes pagištihe karjalan rahvahan kelen da kul’turan polhe , toižes – veps läižiš .Kaikuččen voden Vepsän kul’tursebr tegeb äi projektoid , miše kehitoitta vepsän kel’t , kaita vepsläižid tradicijoid , antta niid norile .Siš rados abuhu tuleba nügüdläižed tehnologijad : internet , videourokad , fi l’mad , kamerad , planšetad , telefonad , socialižed verkod , radio da TV .No tradicionaližed vepsänkelen urokad , kursad , pajosebrad jäba tarbhaižikš , kut ende-ki .Fol’klorkeskusen radon polhe Vidl –posadas starinoičiba Ol’ga Spirkova da Svetlana Trifanova , socialižiš projektoiš Šokš –posadas sanui školan pämez’ Nina Koren’kova .Om mel’he , miše kaikuččes küläs , kaikuččes čogaižes , kus nügüd’ eläba vepsläižed , ratas aktivižesti vepsän rahvahan hüvüdeks .
Lopihe konferencii ehtal plenarižel ištundal , kus tedomehed Karjalaspäi sanuiba , mitte rol’ om karjalan da vepsän rahvahil sures mirus .
Tedokonferencii vajehtihe čomal praznikehtal
Veps
New written Veps