VepKar :: Texts

Texts

Return to list | edit | delete | Create a new | history | Statistics | ? Help

Švecova Darja . ”Hobedaižed voded”

Švecova Darja

”Hobedaižed voded”

Veps
New written Veps
2019 voden lopus Rahvahaližes kul’turkeskuses oli tehtudHobedaižed voded-praznik. Randaine-pajosebr kerazi sebranikoid, tutabid ristituid da Vepsän kul’tursebran ezmäižid aktivistoid, miše johtutada, kut zavodihe sebran elo da muštelta Alevtina Andrejevad.

VepsläineRandaine-pajosebr jo enamb 15 vot lahjoičeb kaikile ičeze čomid pajoid. Kaikuččel praznikal voib kulištada heiden heledoid änid da kacta, kut ezineba ristituiden täht. Nece pajosebr om tehtud 2003. vodel. Sen tegij ad oma Vepsän kul’tursebran aktivižed mehed. Niiden keskes oma L’udmila Aleksejeva, Svetlana Pl’uhina, Nina Nazarova i toižed. tahtoiba, miše rahvahal oliži voimuz pajatada pajoid kodikelel, pagišta toine toiženke da löuta üks’hengid neciš tärktas rados.
Necil päiväl ezmäižed Vepsän kul’tursebran aktivistad, sebran pajanikad, läheližed ristitud da adivod mänetiba aigad ühtes, johtutiba ristituid, ked zavodiba Vepsän kul’tursebran radod 30 vot tagaze da kuliba čomid pajoid vepsän, karjalan da venän kelel. Vastusele tuli ezmäine-ki pajosebran ohjandai Lidia Petrovna Oleševa, kodikelen opendai da muzikan tegii. Hän iče kirjuti muzikad da kändi pajoid vepsän kel’he pajosebran täht.
Randaiženhüvän sebranikan oli Alevtina Ivanovna Andrejeva, tutab äjile vepsläine runoilii da radiopaginoiden vedäi. Jo amu händast ei ole meidenke, no hän eläb meiden südäimiš da ičeze runoiš. Tradicijan möto tal’vkun augotišesRandaine-pajosebr pidäb Alevtina Ivanovna Andrejevan muštpäiväd. Alevtina Anderejeva läksi elospäi 7. tal’vkud 2001. vodel. Hobedaižed voded-praznikale tuliba Alevtina Anderejevan läheližed ristitud, miše ühtes johtutada händast. Jo laps’aigas Alevtina Ivanovnal oli ristituid, kudambad kaiken oliba hänen elos da tugeziba händast. Üks’ niišpäi om Svetlana Savkina. Hän sanub, miše hänen tädi Alevtina oli kuti mamoi da sizar hänen täht. laps’aigaspäi oliba ühtes da abutiba toine toižele. Hüvä Alevtina Andrejevan sebranik L’udmila Mozensova lugi adivoile Alevtinan kirjutesid. Heiden sebruz’ zavodihe jo päivkodiš i jatksihe kogonaižen elon. Randaine-pajosebran pajanikad sanuba, miše vauged mušt Alevtina Andrejevan polhe eläškandeb südäimiš igän. Ved’ Alevtina Ivanovna oli todesižen Vepsän man tütren, sündui vepsläižehe külähä, Šoutjärvehe, kus endevanhoiš aigoišpäi pagištas vepsäks da tetas rahvahan veroid. Hän tegiži völ enamba vepsän rahvahan täht, no ei ehtind...
Randaine-pajosebras kerazihe äi lahjakahid da sur’südäimeližid ristituid. oma eri-igäižed, heil oma erižed eloradod, no taht kaita vepsän rahvahan kul’turad da kel’t ühtenzoitab heid. Kaik pajanikad ühtes oma kuti üks’ sur’ kanz. Randaine-pajosebr äjan andab pajanikoile-ki. ei voigoi kuvitelda ičeze elod pajota. Neniš pajoiš eläba heiden muštlosed kodiman da laps’aigan polhe. KaikRandaine-pajosebran pajoiden sanad tuleba ani südäimespäi i libutaba
ristituiš armastust kodirandaižehe da kodikel’he.

Hobedaižed voded-praznik kerazi ristituid, lahjoiči kaikuččele hüväd mel’t da lämäd, a nece om kaiked tärktemb azj.