Texts
Return to list | edit | delete | Create a new | history | Statistics | ? Help
Švecova Darja . Napern vepsläine naine
Švecova Darja
Napern vepsläine naine
Veps
New written Veps
Jevgenia Vasiljevna Sinilo , enzne
Sidorova , om čoma kalagelaine ak .Hän 22 vot radoi mal kodiküläs , kus tegihe todesižeks ičeze radon tundij aks .Nügüd’ Jevgenia Vasiljevna om jo lebul .Hänel om aig meletada , johtutada ičeze elod da starinoita norištole ičeze muštlotesiš enččen aigan polhe .
Maradon kehitoituz da matehnikan parembuz’ tegi ristituiden elod ani kebnembaks .Nügüd’ traktorad abutaba tehta jügedoid radoid pöudoil teramba .Nitta heinäd da kerata sidä kegoikš , kazvatada jur’kazvmusid , küntta mad – nügüd’ kaiked voib tehta traktoran abul .
No ved’ oli aig , konz ristitud heinätiba ičeze käzil , mašinoiden abuta .Ristitud oliba vagekahad da radonnavedij ad .Vepsläižiš küliš eläba ristitud , ked radoiba mal enamba 30 vot .Pöudoil radoiba kut mužikad , muga naižed-ki .Jevgenia Vasiljevna Sinilo , enzne Sidorova , 22 vot radoi mal kodiküläs , Kalages .Jevgenia Vasiljevna om rodnuze Ropajale (Kalag’-külän pala ) vodel 1939.Tägä hän kaiken igän eli da radoi .
Änižröunas norišt ajoi kodiküläspäi opendamhas toižhe külähä vai lidnaha , a sid’ pördihe tagaze radmaha mal .Školan lopus nored kalagelaižed meletiba , kus hö tahtoiba opetas da rata .Äjad niišpäi ajeliba susedkülähä , Šoutjärvehe .Sigä oli škol-internat , kus lapsed eliba da openzihe .Erased lapsed , ked ei tahtoinugoi ajada Šoutjärvehe , läksiba opendamhas Petroskoihe vai Sortavalaha .Muga tegi Jevgenia Vasiljevna Sinilo-ki .
Laps’aigaspäi hän navedi živatoid , a enamba kaikid navedi heboid .Navedi sötta niid da pidäda hol’t niiden tervhudes .Jevgenia Vasiljevnan armastuz heboihe tuli mamalpäi .Hän radoi hebontanhal , mitte ende seižui Kalages , i openzi tütärt , kut tarbiž pidäda hol’t heboiš .Hän päti ajada Sortavalaha , maradon tehnikumha .I nece oli oiged pätand , Jevgenia Vasiljevna lopi tehnikuman Sortavalas i pördihe kodikülähä , kus tegihe todesižeks ičeze radon tundij aks .
Elo küläs vajehtihe da ristituiden rad om ani toine nügüd’ .Jevgenia Vasiljevna Sinilo lujas hüvin tedab , kut eliba ristitud da kut hö radoiba mal ilma mašinoita da tehnikata .Hän muštab necidä aigad , konz traktoroiden sij al oliba hebod , a ristituiden käziš – vikatehed .Pitkän aigan hän oli brigadiran , ajeli hebol da radoi homendesespäi ehthasai .Radoi sovhozas , sid’ oli mastarin Kalagen ORDos (Onežskoje rudoupravlenije ).
Nügüd’ Jevgenia Vasiljevna om jo lebul .Hänel om aig meletada , johtutada ičeze elod da starinoita meile , norištole , ičeze muštlotesiš enččen aigan polhe .
Konz zavodihe voin , Jevgenia Vasiljevna oli lapsen .Hän muštab , kut vepsän male tuliba fi nnad da mitte elo oli sil varukahal aigal .Voin erigoiti ristituid .Se iče kirjuti elo-ozoid da starinoid ristituiden täht .Voinan aigan äjad velled , tatad da dedoid oli riktud vai oliba kadonuded .Äjad kanzad putuiba erazvuiččihe sij oihe da jätiba ičeze kodimad .Voinan aig om mugažo tärged i jüged Sinilon kanzan istorij an pala .Jevgenia Vasiljevna eli okkupacij as Karjalan mal , a hänen tulii mužik , Ivan Sinilo , voinan aigan putui Germaniaha .
Jevgenia Vasiljevna starinoiči , kut hänen Ivan-mužik putui Germanian konclagerihe da konz hän pördihe kodimale , Karjalaha : ”Ivan sündui vodel 1937.Hänen kanzas oli völ poig , nu a mamale oli d’üged kahtenke kodiš , sikš bat’ sanii : ”Minä siloi vön händast Belorusij aha ”.Sigä eli hänen kanz – mam , bat’ da sizar’ .Ivanale oli kaks’ vot , konz bat’ sinna händast vöi .A vodel 1939 tägä zavodihe Finskii voin , a sid’ zavodihe Sur’ voin .Sigä , kus hö eletihe Belorusij as , kaikid ristituid vedetihe Germaniaha .I minun Ivan tädinke mugažo putui Germaniaha .Vanhad baboi da dedoi oli riktud , a Ivan norenke tädinke sinna i putui .Kaiken voinan hän sigä oli olnu .No händast kaik kaitihe , söndad hänele piiteltihe .Iče ii södud , a kaik hänele .Ivan starinoiči sid’ , mitte varukaz aig oli .A konz voin lopihe , Karjalaha hö i tul’d’he .”
Muga tegihe , miše tuli viga .Azjbumagoiš kirjutadihe , miše Ivan sündui 1938 vodel .Nece ei olend tozi .Sikš hänel ei olend todištusid , miše hän oli konclageriš voinan aigan .Ičeze naprindal da surel tahtol Jevgenia Vasiljevna abuti ičeze mužikale todištada , miše Suren voinan aigan hän oli Germanian konclageriš .Nece znamoičeb lujas äjan Sinilon kanzan täht .I muga oli kaikuččes azjas .
Jevgenia Vasiljevna Sinilo harjeni tehta radod hüvin i kaiken aigan lophusai .Necele azjale hän opendab ičeze lapsid da vunukoid .Jevgenia Vasiljevnal om kaks’ last – tütär da poig .Surel armastusel hän johtutab heid , ičeze vunukoid da pravunukoid , kudambad nügüd’ eläba Petroskoiš da Piteriš .Hö navediba ajelta Kalagehe babannoks , ištta stolan taga , rižada päčin lämoid da kundelta baboin melentartuižid starinoid .
Napern vepsläine naine
Veps
New written Veps