Texts
Return to list | edit | delete | Create a new | history | Statistics | ? Help
Paušin Šan’uu. Keradomatk lyydiläižiilluo
Paušin Šan’uu
Keradomatk lyydiläižiilluo
Ludian
New written Ludian
Täl
vuodel 14.-25.kezakuud meiden d’ouk – Kielen , literatuuran da hištorijan institutan tiedustajad : Aleksandra Rodionova , Sergei Minvalejev , F’odor Gerasimov da Julia Litvin – oli keradomatkas lyydiläižiid kyliid myöti Kompohd’an , Priäžan dai Anuksen piiriis .
Meiden keradomatk oli nimiteltu mugažo kutt meiden projekt : “Lyydiläižed : pohd’aspiäi suveh sai ”, Karjalan Sivistysseuran ry -organizacijan kandatuksen pohd’al .Ezmaižen nedälin aigal myö ajelimme Kompohd’an piiris – muga sanottu , pohd’alaižiil lyydiläžilluo , a siid toižen nedälin aigal ajelimme suvehiižiid piirid myöti , olimme keskilyydilaižiilluo Priäžan piirin Pyhärves da suvilyydilaažiinno Anuksen piirin Kujärves .Voin sanoda , što d’oga piiris , d’oga kyläs libo derein’as on oma pagin : Kompohd’an piiris pagištah omah luaduh , a Kujärves – toižeh luaduh .Ezimarkaks , gu kyzeled Pyhärves : el’gendädgo , siid Kompohd’as vastatah : muga , toimitan !No yks’kaik kompohd’alaižed hyvin el’gendetäh kujärvelaižiid .
Yhteheze myö kirjutimme enamb 30 pagižutuste Koikaris , Tivdijas , Ussunas , Dyrkänmäges , Nuamoilas , Pälärves , Kendärves , Pyhärves , Kujärves , Tuašlas da Paloniemes , d’oga informantas meil diädih mielehižed muštod .D’ogahiine heis pagiži omal čomal kielel .
Meiden matkan aigal myö vastažimme kutt omid hyvid ystävid : Ol’ga Zaharovan , Raisa Kopanevan , Nadežda Koval’čukan , mugažo tuttavoižimme ylen itresaižih miehih .Dyrkänmäges eläy naine , Tamara Mihailovna Petrova , kudam on luadinu seiččemetuhahižen sananikan Dyrkänmägen dialektal .Tamara Mihailovna iče ei tieda lyydin dialektad , no ylen tahtou , štobi tämä dialekt säilyiš .Häi otti Grigorii Makarovan “Venä-kard’alaine sanakniig ” (1975) ozutekseks da kyzelii Dyrkänmägen eläjid , štobi kiändidä kai venäläižed sanad lyydiks .Piäinformantaks oli tulnu Lidija Andrejevna Jermolajeva (rodiihez vuodel 1935), kudam d’alo hyvin pagižou maman kielel .Minä iče pagižin Lidija Andrejevanke i diivimmos , kutt hyvin häin muštau kaiken , kutt äi häin tiedau .
Minä keräžin paginmaterjalad , kirjutin diktofonale dai kamerale kielenozuteksed , Sergei Minvalejev da Julia Litvin kerättih etnograafižed materjalad , kudambad kuvatah , ezimarkaks , lyydilaižiin muahepanend -, miehelemänend , rodil’noi tabad i rahvahan pruaznikad .En voi sanoda ve , kutt äi čuassud yhteheze myö kirjutimme meiden diktofoniile da videokamerale , no d’ogahižen informantanke pigižimme lähes kaht čuassud .
Täs keradomatkas meil d’iäi ylen hyvä mušt .Kaččomata sih , što oldih d’alo räked päiväd , myö ruadoim huondeksespiäi ehtassai , hyväl mielel pagižimme informantoinke i olimme ihastuksiš , što nygyygi on vie rahvaz , ken armastau pagišta omal maman kielel .Siid i myö ylen tahtomme d’atkada omid keradomakoid tulijas aigas .
Meiden informantoin pagižutuksid voit lugeda "Oma mua ":s myöhemba .
Keradomatk lyydiläižiilluo
Ludian
New written Ludian