VepKar :: Texts

Texts

Return to list | edit | delete | Create a new | history | Statistics | ? Help

Введенский Григорий Ефимович, Золотинский Матвей Андреевич. MARKEŠTА SVʼATOI JOVANGELI. Yksitoistakymmeneš piä (Yheštoista piä)

corpus: Biblical texts, Monuments of writing

Source:
Маркешта Святой Іôванӷели. Рукопись. 1820. РГИА. Ф. 808. Оп. 1. Д. 313. Л. 62–99.
Тверские переводные памятники карельской письменности начала XIX века. Петрозаводск: КарНЦ РАН, 2020. С. 282–284.

Ю̈кси тойста кюммѣнешъ пiя̈

1 И куйнъ лягѣни Гiя̈нъ Iерусалиманъ-луŏ, Виѳсфагiяхъ и Виѳуăнiяхъ, Елеона-ӷoранъ-луŏ, тюöнди кахта омиста опашшéттависта,
2 И шано гѣйля, мянӷiя̈ кюляхъ, кумбанѣ онъ тiя̈нъ-когашша: и куйнъ вайнъ мянеття гянéхъ, лöввяття шяльгiĕвянъ шивотунъ, кумбазéлла никѣнъ инегмизиста вiĕля эй истунъ: кериттягюö гяндя, туŏӷуă.
3 И кѣнъ куйнъ шаноновъ тѣйля, минъ-тяхъ тюö тядя луăитта? шаноккуа, Гéрралла пидявъ гяндя: и тервяхъ тюöндявъ гяндя тяннé.
4 И гюö мяндихъ, и лöввѣттихъ шяльгiĕвянъ шивотунъ улӷо-пуŏлла овенъ-iĕшшя тiĕ-шуăройла, кѣритѣттихъ гянéнъ.
5 И муввéннéтъ шейзоиста шiйня пайстыхъ гѣйля, мидя тюö луăитта, кѣритяття шяльгiĕвiя̈?
6 И гюö нiйнъ шаноттыхъ, куйнъ кяшки гѣйля Iисусъ: и гюлляттихъ гiя̈тъ.
7 И туŏдыхъ шяльгiĕвянъ Шюндюруŏхтынанъ-луŏ: лѣвитѣттыхъ гянéнъ-пiя̈лля оматъ вуăттыĕтъ, и истуŏчихъ Гiя̈нъ гянéнъ-пiя̈лля.
8 Я̈йятъ лѣвитѣльдихъ oмiĕ вуăттéйда маталла: а тойзéтъ лѣйкоттыхъ окшазiĕ пуўлойста, и пиротéлдыхъ тiĕдя-мюöть.
9 И iĕльдя-пяйнъ Гяндя, и яллѣльдя-пяйнъ аштуятъ мöистихъ, пайссéшша; осанна! гювинъ-пайсту мянiя Юмаланъ нимѣлля.
10 Гювинъ-пайсту тулова кунинӷагушъ Герранъ, мiя̈нъ туăтонъ Дуăвиданъ нимѣлля! осанна ю̈лизисся!
11 И мяни Ïерусалимахъ Iисусъ, и кириккöхъ: и каччогуŏ кайки, и куйнъ iô мюöгя оли, лякси Виѳуăyiяхъ кагѣнъ-тойста-кюммѣненъ-кера.
12 И гуŏменéкшéлла тойсса пiя̈на, куйнъ гюö ляхтѣйхъ Виѳуăнiяшта, нялляштю Гiя̈нъ:
13 И няхтюö эдягядя смоковничча-пуўнъ, кумбазéшша олдыхъ лѣгѣтъ, тули куйнъ минъ лöвдяйсь гянéшшя: и тулдуŏ гянéнъ-луŏ, нимидя эй лöвдянъ вайнъ лѣгѣтъ: вiĕля эй туллунъ айӷа смоквилла.
14 И шано Iисусъ смоковничча-пуўла, ана иӷяхъ никѣнъ энямбiя̈ шившта эй шюö гѣйнехтя: и куўлдыхъ Гянéнъ опашшéттаватъ.
15 И туăшъ тулдыхъ Iĕрусалимахъ: и мяндюö Ïисусъ кириккöхъ, рубѣй пороттамахъ мюöiĕ и oштaiĕ кирикöштя: и кавпiĕгiĕнъ лавкатъ, и ӷулюзiĕнъ мюöiĕнъ иссунда-шiятъ лѣвиттѣли:
16 И никѣлля эй анданъ кандуă аштыĕда кирикöнъ-кѣшшиччи.
17 И опашты, пайсéшша гѣйля, эй-ӷo олé кирьютéтту, Мивнъ коди, малитту-коикси нимиттiя̈чöвъ кайкѣлла рагвагалла? а тюö луăдiя гянéнъ варраштаiĕнъ маякши.
18 И куўлдыхъ кирья-мiĕгѣтъ да фарисѣйтъ, и эчиттыхъ куйнъ Гяндя гявиттiя̈: да вараттыхъ гюö Гяндя, кайки рагвашъ дiйвуŏлiĕчихъ Гянéнъ опашшандуă.
19 И куйнъ мюöгя оли, лякси пойсь линнашта.
20 И гуŏменéкшéлла шiйриччи аштуŏсся, няхтихъ, iôттo смоковничча-пуў куйви юўрéшта-шуă.
21 И муйсуттагуŏ Педри, шано Гянéлля, Раввi, качо, смоковничча-пуў, кумбазéнъ Шiĕ кирройтъ, куйви.
22 И шано гѣйля ваштахъ Iисусъ,
23 Пидяккiя̈ Юмалахъ ушшондуă. аминь шанонъ тѣйля, iôттo куйнъ кѣнъ шанонновъ тялля ӷоралла, лiйкага, и луŏттуăче мѣрéхъ: и нiйнъ пидявъ омалла шiя̈мѣлля, и ушковъ, iôттo кайки, минъ шановъ, луăдiĕчовъ: лiĕвъ гянéлля, минъ куйнъ шанонновъ.
24 Тямянъ-тяхъ шанонъ тѣйля, мидя тюö вайнъ кумаррéллéшша паконнéтта, ушкоккуă, iôттo отатта; и лiĕвъ тѣйля.
25 И конжа шейзотта кумаррéллéшша, яттяккiя̈, куйнъ минъ кѣнéнъ-пiя̈лля пiĕття: куйнъ и тiя̈нъ Туăтто, кумбанѣ онъ тайвагашша, яттяйсь тѣйля тiя̈нъ рiя̈гятъ.
26 А куйнъ тюö эття ятя, эй-ӷo и Туăтто тiя̈нъ, кумбанѣ онъ тайвагашша, ятя тѣйля тiя̈нъ рiя̈гятъ.
27 И тулдыхъ туăшъ Iерусалимахъ: и куйнъ Гiя̈нъ кириккюö-мюöть кявѣли, тулдыхъ Гянéнъ-луŏ Архерейтъ, кирья-мiĕгѣтъ и вангемматъ,
28 И пайстыхъ Гянéлля, кѣнéнъ валдуă-мюöть тядя Шiĕ луăитъ? и кѣнъ Шивла андо тямянъ валланъ тядя луăдiĕ?
29 Ваштахъ шано гѣйля Iисусъ, кюжюнъ и Miĕ тѣйльдя ю̈хтя шануă, и шаноккуă Мивла, и Miĕ шанонъ тѣйля, кѣнéнъ валдуă-мюöть тядя луăинъ?
30 Iйвананъ рисситяндя тайвагашта-ӷo оли, али инегмизистя? шаноккуă Мивла.
31 И гюö мiĕлѣшшя пiĕттихъ, пайссéшша, куйнъ шанонéмма, тайвагашша, шановъ, нинъ минъ-тяхъ гянéлля эття ушконъ?
32 А куйнъ шанонéмма, инегмизистя, вараттыхъ гюö рагвашта: кайкинъ пiĕттихъ Iивануă, iôттo тожiĕхъ оли Пророкка.
33 И шаноттыхъ ваштахъ Шюндюруŏхтыналла, эммя тiйя. И шано гѣйля ваштахъ Iисусъ, и Miĕ энъ шано, кѣнѣнъ валдуă-мюöть тядя луăинъ.
Х

Введенский Григорий Ефимович, Золотинский Матвей Андреевич

MARKEŠTА SVʼATOI JOVANGELI. Yksitoistakymmeneš piä (Yheštoista piä)

Karelian Proper
Old written Tver
1 I kuin läheni Hiän Ijerusaliman luo, Vifsfagijah i Vifuanijah, Eleona-goran luo, työndi kahta omista opaššettavista,
2 I šano heilä: Mängiä kyläh, kumbane on tiän kohašša; i kuin vain mänettä häneh, löyvättä šälgievän šivotun, kumbazella niken inehmizistä vielä ei istun; kerittähyö handä, tuogua.
3 I ken kuin šanonou teilä: Mintäh työ tädä luajitta? Šanokkua: Herralla pidäy händä; i terväh työndäy händä tänne.
4 I hyö mändih, i löyvettih šälgievän šivotun ulgopuolla oven ieššä tiešuaroila, i keritettih hänen.
5 I muuvennet šeizojista šiinä paistih heilä: Midä työ luajitta, keritättä šälgieviä?
6 I hyö niin šanottih, kuin käški heilä Iisus; i hyllättih hiät.
7 I tuodih šälgievän Šyndyruohtinan luo, levitettih hänen piällä omat vuattiet, i istuočih Hiän hänen piällä.
8 Äijät leviteldih omie vuatteida matalla; a toizet leikattih okšazie puuloista, i piroteldih tiedä myöt’.
9 I ieldä päin Hända i jälleldä päin aštujat möistih, paissešša: Osanna! Hyvin paistu mänijä Jumalan nimellä.
10 Hyvin paistu tulova kuningahuš Herran, miän tuaton Duavidan nimellä! Osanna ylizissä!
11 I mäni Ijerusalimah Iisus i kirikköh; i kaččohuo kaikki, i kuin jo myöhä oli, läksi Vifuanijah kahentoistakymmenen kera.
12 I huomenekšella toissa piänä, kuin hyö lähteih Vifuanijašta, nälläšty Hiän;
13 I nähtyö edahädä smokovniččapuun, kumbazešša oldih lehet, tuli, kuin min löydäis’ häneššä; i tulduo hänen luo, nimidä ei löydän, vain lehet, vielä ei tullun aiga smokvilla.
14 I šano Iisus smokovniččapuulla: Ana igäh niken enämbiä šiušta ei šyö heinehtä! I kuuldih Hänen opaššettavat.
15 I tuaš tuldih Ijerusalimah. I mändyö Iisus kirikköh, rubei porottamah myöjie i oštajie kiriköštä; i kauppiehien laukat, i gul’uzien myöjien issundašijat levitteli;
16 I nikellä ei andan kandua aštieda kirikönkeššičči.
17 I opašti, paissešša heilä: Eigo ole kirjutettu: Miun kodi malittukoiksi nimittiäčöy kaikella rahvahalla? A työ luadija hänen varraštajien majakši.
18 I kuuldih kirjamiehet da fariseit, i ečittih kuin Händä hävittiä, da varattih hyö Händä, kaikki rahvaš diivuoliečih Hänen opaššandua.
19 I kuin myöhä oli, läksi pois’ linnašta.
20 I huomenekšella, šiiričči aštuos’s’a, nähtih, jotto smokovniččapuu kuivi juurešta šua.
21 I muissuttahuo, Pedri šano Hänellä: Ravvi, kačo, smokovniččapuu, kumbazen Šie kiroit, kuivi.
22 I šano heilä vaštah Iisus:
23 Pidäkkiä Jumalah uššondua, amin’ šanon teilä, jotto kuin ken šanonnou tällä goralla: Liikaha i luottuače mereh, i niin pidäy omalla šiämellä, i uškou, jotto kaikki, min šanou, luadiečou, liey hänellä, min kuin šanonnou.
24 Tämän täh šanon teilä: Midä työ vain kumarrellešša pakonnetta, uškokkua, jotto otatta, i liey teilä.
25 I konža šeizotta kumarrellešša, jättäkkiä, kuin min kenen piällä piettä, kuin i tiän Tuatto, kumbane on taivahašša, jättäis’ teilä tiän riähät.
26 A kuin työ että jätä, eigo i Tuatto tiän, kumbane on taivahašša, jätä teilä tiän riähät.
27 I tuldih tuaš Ijerusalimah. I kuin Hiän kirikkyö myötʼ käveli, tuldih Hänen luo arhereit, kirjamiehet i vanhemmat
28 I paistih Hänellä: Kenen valdua myöt’ tädä Šie luajit? I ken Šiula ando tämän vallan tädä luadie?
29 Vaštah šano heilä Iisus: Kyžyn i mie teildä yhtä šanua, i šanokkua Miula; i Mie šanon teilä, kenen valdua myöt’ tädä luajin.
30 Iivanan rissitändä taivahaštago oli, ali inehmizistä? Šanokkua Miula.
31 I hyö mieleššä piettih, paissešša: Kuin šanonemma: Taivahašta, ‒ šanou: Nin mintäh hänellä että uškon?
32 A kuin šanonеmmа: Inehmizistä, ‒ varattih hyö rahvašta, kaikin piettih Iivanua, jotto tožieh oli Prorokka.
33 I šanottih vaštah Šyndyruohtinalla: Emmä tiijä. I šano heilä vaštah Iisus: I Mie en šano, kenen valdua myöt’ tädä luajin.
The site was created by the staff of the Karelian Research Center of the Russian Academy of Sciences
You can freely use the materials of our site and share them, most importantly - indicate authorship and a link to our resource.
More about the CC BY 4.0 license
© VepKar. Open corpus of Veps and Karelian languages