Texts
Return to list | edit | delete | Create a new | history | Statistics | ? Help
Paušin Šan’uu. Brus’a-kažiine
Paušin Šan’uu
Brus’a-kažiine
Ludian
New written Ludian
Ken
on Brus’a ?– työ kyzytte . Minä sanon : muste pieni kaži .Mikse hänes tämä starin on ?Sikš , gu tahtuoižin kirjuttada täs kažis .Moižel pienel kažil on oma ylen intresaine hištorii .Lugekat sidä starinad , minun kuldaižed !
Pieni koditoi Brus’a kazvuoi uuličal .Muste da hubaine tämä kažiine ylen varaiži koiriid pihal , a vie enämbi varaiži vilud , sendäh sygyzel da talvel eli taloin podvalas .Siga elettih sežo hänen kodittomad "sizared " daigi "velled ".Syöttih , midä andettih hyväd ristikanzad , libo iče ečittih syömište pihal .Dygedad elaigad kaččomatta Brus’a kazvuoi ylen luaskavakse kažikse da uskoi , gu erähän päivän häin myös löydäy ičele uuden kodin .
Konz keväz’ tuli , i päiväine rubezi paštamah , Brus’a käveli pihal i n’augui kaikiile , ken oli sil aigal uuličal .Brus’a sanoi heile : "Ota minud kodih !Olen ylen hyvä , maltan vard’oita kodid kaikis pahusiis .Olen kuundeličču , ota vai !".Moned käveltih šiiriči , vähä ken elgendäy , mis pagižou pieni muste koditoi kaži , gu vähä ken el’gendäy kažin kiel’te .No yhten piän yksi briha elgendi i otti Brus’an ičele , omah faterah .Brus’a d’älgimäi puuttui kodih i oli ylen ozakas siit .Briha vei kažiižen kodižiivatoin bol’niččah , i siga kuundeličču kaži ei ni n’augunuh ni yhte kierdad , konz hyvä Aibolit-dohtur kaččeli häht i liečči Brus’ad .Se mielikaz kaži elgendi , što nygyy niken ei luadi nimidä pahad hänele .
Kodvazen peras , konz brihale pidi muuttada toizeh lidnah omah uudeh ruadon tähte , Brus’a tuli elämäh minun kodih i nygyy tämä muste kaži eläy minulluo .Yhtes minun ker Brus’a kaččou televizorad , kirjuttau artikkelid , ylen viizas kaži pidelöy urokad Zoom :as .Voin sanoda , što tädä ruadod häin luadiu mielihyväl .A ruadon d’älges Brus’a armastau kižata omiiden bobaižiinke .
Brus’a ylen äijäl suvaiččou omad uutt kodid !Minun kodis Brus’a tundou omad iččed , kutt "korol’ov ".Minä pidän huolte hänes : syötän hyvin , puaksuh baluičen omad kažid , ostan kai , midä hänele tarbiž , luadin kaiken , štobi häin oli puolištukses kaikiis pahusiis .Minun kaži ylen äijäl suvaiččou minud i ylen äijäl igävöiččöy , konz minud ei ole kodis .
Puaksuh minä duumačen , što nygyy moned ei voida el’geta omad elaigad kažiita .Kažid eletäh meiden rindal monet tuhad vuotte .Tiedan , što uskomiižen mugah n’umalad andettih koiran ristityile , gu se vois abuttada mečäs , a kažin – štobi kodid vard’oiččis .Ende kažid taban mugah elettin liäväs , siga ned taboiteltih hiiriid .Moned kard’alaižed uskottih gu kaži on kodinižände i vard’oiččou meiden kodid kaikiis pahusiis ...Konz minä rodiimos , meiden vahnas puuhižes kodis , Priäžas , eli Anapka-kaži , sidä kažid minä en mušta , gu olin silloi vie ylen pieni .Se kaži ainos abutti minun muamod da buabod kaččoda minud .Konz hyö oldih kuhn’al päčilluo , a minä magazin kätkydes i kieras rubezin itkemäh , Anapka ylen teravas hypii minulluo i kaččeli minun silmiih , i minä hedi tyyništuin .Kui sanotah Pyhärven čupus : "Olettelou i muga : i kažile d’algoih kumardatoz ".A siid konz zavodimme elämäh monid’atažihizes talois , meiden rindal ainoz sežo elettih kažid .Lapsestusespiäi minä armastan kažiid ...
... Aige mäni , no kažid d’atkettih elädä ristikanzan rindal .I minä olen hyväs mieles , što nygyy minulluo eläy moine pieni vardoiččii .
Tuli keza .Kezan aigah minul on äi matkad : pidäy i ekspedicijah ajada , pidäy lebauzuda kodvaižen .No siid kenen ker Brus’an voin diättäda ?Yksin kodis kaži ei voi eläda kodvad aigad .Siid pidäy kyzyda , ken voi kaččoda .No toižil oldah omad kažid libo koirad , toižil on allergii , a muud iče kodis ei ištuta hätken .Midäbo siid ruata ?
Minä d’o ende kuulin , što meiden lidnas oldah muga sanottu "kažin gostiničad ", kudamih otetah kodikažiid kodvaižeks aigaks , konz heiden ižändäd oldah matkas libo ei voida pidada huolt heis täs hetkes .Moižeh gostiniččah minä työndžin Brus’an .
Tämä kažin gostinič rouno gu kažin "päivkodi "."Lapsed " täs päivkodis oldah kutt omas kodis . Heis pidetäh ylen hyväd huolte , i kažid čuvstvuitah sidä .D’oga "lapsi " eläy omas "numeras ", kudai d’oga päiväd on kabrastettu , suau syömiižed , mida suvaiččou , kaiken päivän d’ogahiženke kižatah , libo pidetäh huolte .Sendäh konz minä lähtin matkah andoin Brus’an täh gostiniččah rauhal sydämel .
Minun kažiine hyväs mieles viändži toižiin "lapsiden " ker da druužii heiden ker .Omal kažin kielel kažid starinoittih omad hištorijad .Moned niilöis eletäh omas kodis , omiden ižändoin ker .Monis ižändäd pidetäh huolte da ylen baluitah heid .No erähil kažiil ei d’iäny nimidä , ei ni ole ižändäd , ni kodid .Erähäd puututtih gostiniččah kažinpoigaižin , gu elettih uulučal i tarvittih kodid , toižed andettih tänne sikš , gu heiden ižändäd kuoltih , i nygyy niken ei voi pida huolte heis .I nygyy gostiničan ruadajad ečitäh heile uutte kodid .
D’oga kažil on oma starin .Pieni Til’da saneli Brus’ale oman : "Kuud tagaperin yks’ naine toi gostiniččah oman kažin .Čoman kird’avan kažin tämä naine löyzi uuličal .Kažil oli äi satatest , no yks’kaik häin otti tämän kažin kodih .Naine liečči kažin , i kaiken vuoden se eli omas uudes kodis ...Konz naižele pidi lähtä matkah , hän andoi Til’dan kažin gostiniččah .Kodvažen peras se naine kuoli kibedudes .I čoma kird’av kažiine diäi hedi omata emändätä ".Nygyy Til’da vie eläy gostiničas i ylen tahtou löytä uuden kodin ."Ozaks , minul on oma kodi i oma emände , kudai pidäy huolte minus " – duumaičči Brus’a .
Ozaks monil starinoil on hyvä loppu : "Čoman Barbi-kažin endižed ižändäd tuodih gostiniččah kodvaižeks , gu heile pidi lähtä lomah , loman d’älges hyö ei tahtottu ottada omad kažid tagaze .Barbi-gor'ašši d’äi elämäh kažin detsaduh .Ezmäi häin igävöičči omiid ižändoi , ga siid hard’audui elämäh gostiničas .Siga hänes oli hyvä huol' , i d’oga nedälid uuded dovariššad , kenen ker häin voiš kižata "."Ozaks , minun emände soittau d’oga päiväd gostiniččah tiedustelemah minud i terväh tulou , da ottau minud tagaze kodih " – duumaičči Brus’a .
Kažin kaččuoi gostiničaspiäi soitti minule d’oga päiväd , i d’oga päiväd työndži kuvad da videod , kudamis minun kažiine hyväs mieles viändži toižiin "lapsiden " ker .Kuun peras Brus’a tuli kodih hyväs mieles , no minä el’gendin , što yks’kaik minun luaskav kaži igävöičči minud ylen äijäl .I myö Brus’an ker uudessah yhtes kačomme televizorad , yhtes kižadamme ehtoil , yhtes kirjutamme artikkelid imi ...Sil starinal on hyvä loppu .Koditoi kaži Brus’a löyzi oman kodin , kus eläy minun ker .Barbi-kažiine lopukse sežo löyzi uuden perehen i nygyy eläy Suomes .
No ...Uuličal , pihal , taloloin podvalois eletäh moned kažid , ei d’ohahiine ristikanz voi elgetä kažin kielel n’augottud : "Ota minud kodih ".Moned tahtohah ostada ičele hyvänroduižed kažid dai koirad , štobi ozuttada ned ozutuksil .Sil aigal kodittomad kažid voidah kuolta näl’gäh da viluh .I minä ylen žalaičen , štobi ned , ken tahtou kodih kažin , elgendäis kodittoman kažin pakičuksen :"ota minud kodih " i ottais ičele uuden hyvän ystävän .Minun hyväd dovarišad piästetäh nämmid gor’aššid uuličaspiäi , podvaloispiäi , pidetäh huolte heis , lečitäh i siid andetah ned hyvih käzih , no äi kodittomad kažid vie vuotetah , konz löydetäh uuden kodin .Uskon , gu nämmilgi kažiil konztahto kai lienou hyvin .
Brus’a-kažiine
Ludian
New written Ludian