Texts
Return to list | edit | delete | Create a new | history | Statistics | ? Help
Virboi da Äijypäivy
Virboi da Äijypäivy
Livvi
New written Livvic
Virboi
da Äijypäivy ollah kallehet kirikköpruazniekat .Joga vuottu niilöi pietäh eri aigua .Net muututah čislas , ga ainos ollah pyhänpiän .Virboipyhäpäivy on nedälii enne Äijiäpäiviä .Äijänpiän lopeh seiččie nedälii kestäi Suuri pyhä .Virboisuovattan käydih katkomah virboiviččua .Nämmä virboiviččazet pandih obrazoin alle da pyhänpiän huondeksel , ken enzimäzikse ehtinöy , nouzi virboittamah toizii , ket vie viruttih .Virboittajes sanottih :
Virvotti , varvotti ,
Tuorehekse , tervehekse ,
Kulu kettu iäres , uuzi kettu tilah .
Sinul vičču , minul jäiččy .
Nedälikse velgua .
Se ristikanzu , kuduadu virboitettih , Äijänpiän andoi virboittajale jäičän .Virboipyhänpiän virboitettih žiivatattoigi .Ižändät käydih virboittamah heboloi , emändät – lehmii .Uskottih : net kogo vuvven pyzytäh tervehinny , eigo niilöih tartu nimittuine taudi .Virboin jälles lähtijiä jälgimästy seiččemetty Suuren pyhän nedälii sanotah Srašnoikse nedälikse .Tämän nedälin nellättypäiviä sanotah Suurekse nelländeksepäiväkse .Sinäpiän kabrastettih pertitilöi , otettih päčispäi tuhkii .Suuren nellänpiän lämmitettih kyly , pestih sobii da iče pestihes .Sinäpiän luajittih härkindy , sit enämbi voidu sil vuvvel suittuu .Vie uskottih , ku peittänet sinäpiän kai puuhizet brujat , sit et näi maduo kezäl .Äijänpiän piätteniččän pyhitettih kaikis enämbäl .Erähät ristikanzat sinäpiän ei syödy nimidä .Äijänpäivän piätteniččän ei suannuh ligaruadoloi ruadua , kai ruavot pidi ennepäi ruadua .Suuren pyhän jälgimäzenny piän , suovattan , varustettihes Äijähpäiväh .Mujutettih jäiččii laukan kojah , keitettih da pastettih kaikenmostu syömisty .Äijiäpäiviä vaste ei muattu .Uskottih , ku Äijänpäivän yöl et magua , sit kogo vuvven ei liijakse nukuta .Konzu päiväine nouzi , kerättih stolat , ruvettih syömäh da juomah , Äijiäpäiviä pidämäh .Rahvas hyviteltih toine tostu sil , gu plikahutettih jäiččii vastai .Kel jäiččy murei , sil pidi andua se voittajale .Äijänpiän kaikin oldih vesselät .Nuoret da vahnat soitettih kelloloih , liedžuttih da pajatettih .Ennevahnas uskottih , buito Äijänpiän päiväine karguau .Sanottih , gu se on hyvän kezän ies , a gu ken aijoi huondeksel nossou sidä kaččomah , sit sille se tuou ozua .
Virboi da Äijypäivy
Livvi
New written Livvic