Texts
Return to list | edit | delete | Create a new | history | Statistics | ? Help
Natalja Gromova. Hyvytty tävvet käit
Natalja Gromova
Hyvytty tävvet käit
Livvi
New written Livvic
Nygyaigaine
miero ainos muuttuu , muututah eloksen olot dai perindöt , rodieu uuttu pruazniekkua .Tuhukuun 14.päivänny äijät pietäh Mieldynyzien päiviä , ga sinä piän on toine hyvä pruazniekku Pyhän Trifonan , mečästäjien da kalastajien abuniekan päivy , vähä ken tiedäy sih nähte .
TUTTAVUS PRAVOSLAVNOIN JARMANKAS
Sygyzyl Petroskois piettih Pravoslavnoi jarmanku .Kävelles puustuo myöte Aleksandr Nevskoin kirikön lähäl tulimmo kaččomah sidä .Kirikön lagevol oli äijy myöndypaviljonua , kirikkölöin da manasteriloin rahvas tuldih jarmankale Ven’an eri alovehispäi da toizis valdivoloispäi .Erähäs niilöis papin kel seizoi inehmine mustis sovis , häi kačahtihes sulavasti minuh da minä lähenin paviljonua .Sit oli pandu stolale kaikenmoizii kirikkövehkehii da obrazoi .Yksi obrazu , kuduas oli kolme pyhiä , oli erinomaine .Rubein kyzelemäh inehmisty , midä tämä obrazu merkiččöy ?Ystävälline inehmine vastai , gu tämä on Kuolan Pyhä Sroičču – pruavedniekat Trifon Pečengskoi , Feodorit Kol’skii da Varluamu Keretskii , kai kolme oldih manuahoinnu .Varluam Keretskii oli tiettävy minuh niškoi , ga toizis enne nimidä en kuulluh .Inehmisty pagizuttajes olen tiijustannuh äijän uuttu , häi sellitti obazah nähte da saneli kiindožan pohjazen vähälkuulužan manasterin histourieh näh .
Pyhän Sroičan Trifonan Pečengskoi manasteri , kuspäi tuli tämä ihehmine , on Murmanskan alovehel Barencovan meren rannal , se on pohjazin mie hien manasteri , kudai on perustettu 500 vuottu tagaperin da sie malittuloin panendu nikonzu ei katkennuh .
MANASTERI DA SEN PERUSTANDU
Pyhän Sroičan Trifonan Pečengskoi manasteri , kus pietäh arvos Kuolan Pyhä Sroičan Pyhii , seizou suoloin keskes kivikkähäl mual .Joga Ven’an tsuari pidi omannu pyhänny vellannu tulla sinne da elättiä manasterin taloidu .Tsuari Ivan Groznoi oli enzimäzenny pyhilekävyjänny , Nikolai II – jälgimäzenny .Silloi jälgimäine Romanovien tsuarisuvun ezimies pidi pyhilekävyndän manasterih da sen jälles perusti Romanov-na-Murmane -linnan , tämä on jälgimäine linnu , kudai on perustettu Ven’an valdukunnas , sen linnan nimi muutettih Murmanskakse Nevvostoliiton aigua .Moni vuottu tagaperin Ven’an patriarhu sanoi , ku Ven’al on äijy manasterii , ga tämä manasteri on kaikis pyhin , sendäh ku sie enämbän kaikkie pannah malittuu , muu dielo ei kiännä manuahoin huomavuo muijale .
Ammui melličän jauhokivie selläs kandajen Pyhä Trifon Pečengskoi lähti sinne jallai Tverin alovehen Toržok-linnaspäi , sih kohtah tulduu perusti manasterin .Norviegiesgi ollah puuhizet časounat , kudualoi Trifon perusti , sie rahvas tässäh pietäh huoldu nämmis časounois , vaihtetah laholoi parzii da kunnivoijah Pyhiä Trifonua .
KUOLAN PYHÄ SROIČČU
Ammuzis aijois pohjazen eläjät mustellah , ku Trifon luadi ihmetty , sanotah ku rahvas nähtih hänen kummii omin silmin .Nämmä tiijot eletäh rahvahan mustos tässäh da siirrytäh sugupolvespäi toizeh .Trifon eli hätken da kuoli 90-vuodehizennu , sil aigua haldivoičči valdivuo tsuari Ioann Groznoi .
Hänen kuolendas ehti vai mennä vuozi , kui kirikkövaldu sanoi Tifonua Pyhäkse , tämä on ainavo tapahtumu Ven’an pravoslavnoin kirikön histouries .Pyhäl Trifonal pannah malittuu da pakitah abuu kirvesmiehet , mečästäjät , kalastajat , sanotah , gu Jumal andoi hänele neron ellendiä elättilöin kieldy .
Kummallizen Kuolan Pyhän Sroičan obrazan toine hengi on Feodorit Kol’skii , häi oli Ven’an enzimäzenny manuahu-diplomuatannu da Trifonan opastajannu .Feodoritan diplomuatien avul Konstantinopol’an ylimäine kirikkövaldu tunnusti Ivan Groznoidu Ven’an tsuarinnu , enne Ivan Groznoi oli vaiku suurennu kniäzinny .Yksitostuvuodehizennu tolkukas brihačču Feodorit maltoi kirjuttua uvvessah vahnan kirjuttamizen tavan mugah kirjutettuloi kniigoi , tämä oli jygei ruado .Konzu hänel täydyi kolmetostu vuottu , Feodorit rodih manuahakse Soloveckoin manasteris , kus häi kuoli , hänen rungo on tässäh manasteris .
Varluam Keretskii on Karjalan kuulužu čuvvonluadii , häi oli roinnuhes Louhen čupun Kieretti-kyläs .Sanotah , ku Varluam ajoi iäre Murmanskan alovehen Abramniemes juavolin , sen jälles Varluam joudui juavolin vaikutuksen alazekse da tapoi oman akan .Kolme vuottu Varluam vedeli venehes kuolluttu akkua merdy myöte da pani mallittuu , konzu merimadozii Vienanmerespäi karkoittajes piästi surmas äijän merimiesty , sai prosken’n’an .Niken ei voinnuh luadie hänen teguo uvvessah .Merikulguh lähtijes merimiehet da kalaniekat pakitah abuu Pyhä Varluamal , ku heijän matkal ei olis meritorokkua .
PEREHEN PARZINE
Manasterin kirikkölöin puuhizet parret ruvettih häpistymäh , net pidäy vaihtua , sendäh manasterile voibi lahjoittua dengua parzien vaihtamizeh .Sen jälles hyvyönazujien nimet kirjutetah niilöih parziloih , puaksuh kirjuttavannu on kogo pereh .
Minä kuulin paginkanzua tarkah , se oli kiindožu da avvoisydämelline kerdomus .
– Kuibo on sinun nimi ? kyzyin minä naizel .
– Minuu kučutah riähkähizenny Fotinija , muheloittajen minun diivakse sanoi häi .
– Ga mindähbo olet riähkähine , ongo suuri riähky sinul ?
– Minule panou moizen nimen meijän buat’ušku , nägenöy ku minä pagizen da nimidä en rua , istun käit ristai , ilokkahasti muhahtihes Fotinija .
– Sinul ollah tävvet käit hyvytty ! sanoin minä .– Kačo vai , sinul yhtes käis on obrazu , toizes – kniigu . Sinä ruat hyvytty .
Naizen hyväntahtozet silmät säjehtittih .Minä kyzyin luvan fotokuvuandah , Fotinija lekahutti piädy suostumuksen merkikse , ga ližäi , ku ei sua fotokuvata händy iččie .Sit fotokuvain naizen käit , kudualois Fotinija pidi kniigua .
Paginan lopus kirikön kundoh panemizekse dengoi lahjoittajes uskaldimmo tulla Pyhän Sroičan Trifonan Pečengskoi manasterih , kus nygöi on meijän "perehen parzine ".Olis interesno nähtä sidä omin silmin , ku kai sie rodih hyvin .Kezäl varmah lähtemmö matkah .
Hyvytty tävvet käit
Livvi
New written Livvic