Texts
Return to list | edit | delete | Create a new | history | Statistics | ? Help
Blinkova L'udmila. Pohjaine apel’siinu
Blinkova L'udmila
Pohjaine apel’siinu
Livvi
New written Livvic
Arbaitus
: Suuri suo , pieni pedäi , pedäjän piäs pärpäččyine .
Ellendittögo , mi pidäy arvata arbaitukses ?A midä sanotah "pohjazen apel’siinakse "?Tiettäväine , se on meijän armas marju – muur’oi .
Midäbo nygöi muur’oidu talvel mustelou ?kyzyttö työ .
Mustelut minun nostatti brošku , kudaman ei ammui ostin ičelleni .Da nengoine se on čoma , rounu tovelline muur’oi vaste suolpäi otettu .
Muur’oi minun elaijas on gu rinnal astui .Lapsusvuozis mustan sen magien mavun .Tuatto joga keziä mečäspäi äijin toi muur’oidu , mama keitti varen’n’ua , pani marjoi zuaharivienke bankoih , pastoi muur’-oipiirualoi .Talvel oli ylen hyvä syvvä magiedu muur’oidu da mustoittua keziä .
Tata nikonzu ei ottanuh minuu muur’oih , toizii marjoi kävyin hänenke keriämäh , a muur’oidu en .Konzu kyzyin hänel , mindäh ei ota minuu muur’oisuole , häi vai yhty sanoi : "Tulou aigu – otan ".Aigu tuli , konzu jo školan lopiin da piäzin opastumah Petroskoile .Ehtäl tata sanoi , gu huondeksel lähtemmö muur’oih – aijoi huondeksel sizärenke jo olimmo valmehet menemäh .Suole astuimmo kaksi puolenke čuassuu .Sit vai minä ellendin , mindäh tuatto ei ottanuh enne meidy muur’oih – žiälöičči meidy , loitton pidi astuo , eihäi joga suole muur’oidu kazva .Konzu tulimmo suole , minä en voinnuh uskuo omii silmii – marjua oli suol gu ripoitettu !Keldazet tiähtyzet läpetettih päiväzel , vieno tuulut heilutteli vihandazii lehtyzii , nenäh tuli kanabrole – tovelline pohjazen luonnon čomus !
Konzu minun höpsevys heityi , zavodiin kerätä marjoi .Enzikse , tiettäväine , söimmös kylläl , aiven muga ruan !Sit rubein keriämäh muur’oidu rengih da muga terväh keräin tävven , en ni väzyö ehtinyh .Tahtoin vie mihtahto kerätä , ga tata sanoi muhahtajen : "Sinä hot’ tämä rengi venehessäh kanna ".Olgah , rubein keriämäh ielleh suuh da vaččah .Konzu kaikil rengit oldih tävvet , kiännyimmö kodih päi .Oi , mittuine jygei oli reppu renginke !A dorogu vie pitkembäkse ozuttihes .Da vie tata kaiken matkan mille sanoi : "Pane mustoh dorogu suole !Rubiet jällespäi iče käymäh tänne ".No minä silloi vai käil huškain da sanoin : "En sinuttah nikunne meččäh lähte !"En ni smiettinyh nuorennu olles , gu tulou aigu – tuattua ei rodei rinnal .Jälles sidä nikerdua tatanke en ni käynnyh sille suole muur’oih , en ni dorogua musta .Nygöi puaksuh sizärenke mustelemmo sidä suodu , sidä čomuttu , kudamua näimmö sie , kerrommo omile lapsile da žiälöičemmö , gu emmo pannuh mustoh dorogua .
Vie muur’oidu voin sanuo minun opastunduvuozien marjakse .Konzu minun vahnembi sizär Lena opastui Petroskoil , häi pyhinpäivin ainos otti linnah äijän piiruadu .Buabo da mama pastettih äijin piirualoi , a Lena vai sanoi : "Puoli yhteseländykodii tulou čuajuu juomah meijän piirualoinke ".Kui tuli minun vuoro opastuo Petroskoil , minä sežo toin yhteseländykodih piiruat .Eniten suvaičimmo muur’oipiirualoi .Kerras , kui tulin koispäi , tyttölöinke panimmo kiehumah čuajun da vuotimmo Pugovkinan Paušii (häi oli meijän kursudovariššu ), kudai tulles kerras kyzyi : "L’udoi , toitgo muur’oipiiruat ?""Toin , toin , vastain , – tule pertih , čuaju jo kiehui ". Joimmo čuajuu piirualoinke , pagizimmo , nagroimmo , ihastelimmo elaigua .Vot nengoine meil oli yhtyndymarju – muur’oi !
Paiči muur’oinmarjua ainos käytimmö muur’ointuppiloi , net oldih minule parahannu rohtonnu rygimizen parandamizes .Takeldai tuppičuajun magu ylen miellytti minuu ainos .Omilegi lapsile juotin tädä parandusčuajuu .Nimidä ei ole parembua !
Muur’oi – čoma da magei pohjaine marju .Se on gu kerätty pienis kuldumuruzis , rounoku meijän elaigu kerävyy kallehis mustolois , kuldu hetkis , hyvis dielolois da hyväntahtozis ristikanzois .Yksi marjaine nostattau nenga äijän hyvii musteluloi !Pohjazen muur’oidu vie sanotah Tsuarin marjakse da suoloin kullakse .Sehäi on tozi !
Pohjaine apel’siinu
Livvi
New written Livvic