Texts
Return to list | edit | delete | Create a new | history | Statistics | ? Help
L’ubov’ Baltazar. Älä myöhästy
L’ubov’ Baltazar
Älä myöhästy
Livvi
New written Livvic
K evät
on tulluh muailmua elavuttamah .Puuloil da heinil kevät on kaikis suurin aigu .Sendäh suurin , ku vilun talven jälles eloh on jiädy vai kaikis lujembat , da nygöi niilöil pidäy uvvessah ruveta kazvamah .Jo kodvazen peräs havačutah uudeh elokseh juuret , ruvetah kukkimah ladvazet .Kui olis opastuo ottamah da panemah tallele niilöin nägymättömiä voimua .Sadoi vuozii kogo Muan rahvahat on suitettu tieduo kazvimuailmas , kazviloin käyttämizes liäkkehekse .Dai midä loitomba eistytäh edehpäi tiedomiehet täs kyzymykses , sidä enämbän se tiedo vedäy juuri luonnon voittoh .Luonnospäi suavut liäkkehet ollah parembat ei vai sendäh ku net parahite sovitah ristikanzal , ga vie sendähgi , ku net ei luajita vuottamattomua vahinguo eläväl rungal .
Enimät luonnospäi suavut liäkkehet suau valmistua kois , sih ei pie nimittumii laittehii .Pidäy vai tiediä oigiet kazvit da ruveta oigieh aigah keriämäh da kuivuamah niidy .Talven mendyy , mennytvuodehizen siemenien kypsenemizen jälles keväizis heinäzis ei ole nimittumua voimua .Kai voimu on juures , konzu huogavunnuh kazvi jo on havačunnuh , da vastevai on ruvennuh kazvamah , ga ei vie ole siirdänyh kaikkie omua voimua lehtih .Sikse keviäl suau kaivua moizien heinien juurii , kudamien juuret pätäh liäkkehekse .
Voikukku , tuttavu pellon "eläi ".Muan piäl sidä on sadoi luaduloi , dai kogo muailmas sidä kerätäh ei vai liäkkehekse , ga syömizeksegi .Tämä kazvi ei ole otettu kirjoile liäkehkazvinnu kaikis Ven’al painettulois kniigois , vai erähät on ruvettu sidä käyttämäh .Min äijän vägie myö panemmo voikukan hävittämizeh keviäl !A olis vai kerätä enzimäzet nuoret lehtyzet , livottua čuassuine ku lähtis liigu kargevus da luadie salattu yhtes ogurčanke da jäičänke .Ei vai pie enzimästy kerdua syvvä ylen äijiä .Sen kargevus livotettuu hos suus jo ei tunnu , ga sentäh vačas
se löydyy .Ei maksa ni luvetella , tämä heiny pädöy kaikkien syväintaudiloin parandamizeh !Ken tahtou pidiä huoldu omas tervehyös se iče eččiy tieduo dai opastuu valmistamah liäkehty .Vai pidäy mustua , ku kazvilois valmistetut liäkkehet ei toimita ni päivän ni nedälin peräs , niidy pidäy juvva hätki .Dai pidiä tallel kuivattuloi kazviloi suau vai kaksi vuottu .
Ylen puaksuh vanhemban polven ristikanzoil käskietäh juvva moizii liäkkehii , kuduat ajetah rungaspäi liijan vien .Net luajitah ristikanzal enämbän pahuttu migu autetah .Sikse ku liigu vezi ei kerdys rungah , keviäl suau kerätä koivun silmuloi da kuivata niidy .Sit vai valua piäle hiilavua vetty , havvuttua kodvaine da juvva .Samah luaduh toimiu buolan lehtilöis luajittu juomine , vai niidy pidäy kerätä keskikezäl , konzu buolu kukkii .Sendäh ku keviäl net vie ei ole elavuttu , a sygyzyl jo on annettu kogo omassah voiman marjoih .
Karjalan eläjät ainos on käytetty syömizeh šiiloidu .Ei onnuako yhty köyhytty hyö nenga ruattu .Nuoris šiiloin lehtis on muga äij y pädeviä ainehtu ga niilöi voibi kuivattua , hienondua da ližätä keittoloih valmistamizen lopus .
Ruvekkua vai mustoittamah , mittumii heinii da kukkazii enne kerättih da kuivatettih muamat da buabat .Hos kezäaigu on pitky , ga kai pidäy ehtie omah aigah , gu ei pidäs sanuo "ga nygöi jo on myöhä ..."
Älä myöhästy
Livvi
New written Livvic