Texts
Return to list | edit | delete | Create a new | history | Statistics | ? Help
Uljana Tikkanen. Mie olen Iutalašta
Uljana Tikkanen
Mie olen Iutalašta
Karelian Proper
New written karelian
Kevyällä
päivänvalon näki Mie olen Iutalašta -musiikkial’pomi .Šen luatijina ollah jazz-muusikot , kitaristit Jurii Žuk ta Alina Repetskaja .Al’pomih on kerätty Vienan perintehellisien laulujen jazz-šovitukšie .
MIE OLEN IUTALAŠTA
Jurii Aleksandrovič Žuk on kitaristi , jazz-šoittaja , šäveltäjä , opaštaja .Hänen koko ammattitoiminta liittyy kitaralla šoittamiseh .Mieš on šyntysin Ylä-Aunukšen kyläštä .Muamon puolelta šuvušša on karjalaisie , tuaton puolelta – valko-venäläisie .
Jurii vieraili 38 muašša .Hiän panou merkillä , jotta joka muašša on šuurta kiinnoššušta folkmusiikkih .
Alina Repetskaja on Jurii Žukin opaštuja , kitaristi , šäveltäjä .Hiän on Petroskoista šyntysin .Alina lopetti Petroskoin Rautiolla nimitetyn opiston ta nyt ruatau šiinä opaštajana .Šamalla Alina opaštuu Rostovin konservatorijan jazz-ošaštolla .
"Mie olen Iutalašta " on Jurii Žuk ta Alina Repetskaja -duetin toini al’pomi .
Še on enšimmäisen al’pomin "Väinämöini ta Lohineičyt " jatko .Uuvven al’pomin kaikki kappalehet on otettu Kalevalan muan karjalaiset laulut-kirjakokomukšešta ta šovitettu jazz-tyylissä .
‒ Koko musiikkimateriali oli kerätty Vienan Karjalašša tutkimušmatkojen aikana Petroskoin konservatorijan arhiivua varoin .
Kirjan luatijina oltih Roman Zelinskii ta V’ačeslav Kalaberda .Hyö nauhotettih lauluja naisilta , XX vuosišualla harvat miehet laulettih perintehellisie lauluja , vaikiet ajat oltih .Täštä kirjašta ottima lauluja ta šepittimä musiikkie jazz-tyylissä .Yhen laulun nimi oli "Mie olen Iutalašta ", še on oikein vesselä laulu , šen mukah koko al’pomi šaiki nimen .Iutala oli pieni kylä Vuokkiniemen lähellä , alotti kertomukšen Jurii Žuk .
‒ Karjalaini folklori ta perintehellini musiikki on niin hyvä pohja luovah ruatoh , jotta meilä jo on materialie 3.
ta 4.al’pomija varoin .
FOLKLORIN TA JAZZIN EPÄTAVALLINI YHISSYŠ
Duetin šoittamua musiikkie kuuntelomatta on vaikieta kuvitella mitein karjalaini perintehellini musiikki ta jazz voijah yhistyö ta miltä še voipi kuuloštua .
‒ Karjalašša on äijän muusikkoja , kumpaset esitetäh karjalaista musiikkie aito perintehellisešti .
Šemmosen musiikin keškiesittäjänä on Kantele-yhtyveh .Myö halusima valita toisen taipalehen ta kiäntymä jazzmusiikin puoleh , kumpani antau harmonijan šyvyä merkityštä ta tariččou äijän erilaisie tyylij ä: sving , latina , reggi , kantri .Tämä oli ajateltu valinta eikä musiikkieksperimentin šattumatuloš .Jazz-musiikissa täkši päiväkši on olomašša šuuri miärä tietuo ta harmonijua , melodijua ta tyylijä .Myö olemma jazzmusiikin ihailijat ta tykkyämmä karjalaista musiikkiperinnehtä , šentäh kerran yrittimä yhistyä niitä ta še meitä oikein miellytti , šelittäy Jurii .
Karjalaini perintehellini musiikki tavallisešti on yhen iänen musiikki .Še merkiččöy , jotta paperilla on pantu vain ihmisen laulamini , akkompanementtie ei ole , äsen kantelella tahi jouhikolla .Laulun peruštehella Jurii ta Alina šepitetäh akkompanementtie ta käytetäh jazzin harmonijua ‒ še on erilaisien akkordien yhistämini ta vuorotellen šoittamini .Jazz-musiikissa on äij yä enemmän akkordija , kuin klassisešša musiikissa ta mielikuvitukšella ei ole rajotukšie .Perintehellini musiikki on kova pohja , a jazz-musiikki on vapauš .Jurii ta Alina tunnetah šitä vapautta ta še vain lisyäy innoššušta šepittyä musiikkie vielä .
‒ Konša ihmini kuuntelou harmonisoituo tunnettuo šävelmyä , ni hiän varmašti tunnuštau laulun , ka še ei ole minkänä toisen musiikin šamantapasena .
Mukava musiikki šyntyy ta konserttiloissa myö šuamma kuuntelijien myönteistä reaktijuo , koroštau Jurii .
‒ Vielä yhtenä jazz-musiikin erikoisuona on improvisatijo .
Voipi varmašti šanuo , jotta kappalehet , missä on improvisatijo joka kerta kuulutah ainutluatusilta ta še on ihana .Šemmosissa šävelmissä on ošie , kumpasie šoitetah nuottien mukah , a on ošie , kumpasie on jätetty improvisatij olla .Niin yksi šävel ei rupie kuulumah kakši kertua šamoin , lisäsi Alina .
Duetti šoittau musiikkie piäošin kitaroilla , ka erilaisilla : klassisen ta akustisen lisäkši on ukulele ta bass-kitara , niise värijä musiikkih lisätäh vislat – irlantilaiset huilut , kantele , gl’ukofoni ta kalimba .Konserttiloih muusikot kučutah šoittamah yheššä klassisie , akatemisie šoittajie šekä harraštajie muusikkoja .
Jurin ta Alinan musiikissa ei ole tekstijä , vaikka lauluissa , kumpasista še musiikki šynty , šanat oltih .Niijen merkityš kitaristit esitetäh kuuntelijilla musiikin avulla .
‒ Esimerkiksi , Miun armahaini -laulu on itkuvirši , šentäh musiikki laulun mukah on minorissa .
Päinvaštoin laulu "Kun mie lašen pois omie lehmie " on oikein vesselä , niin kuin kyläelämän pitälti vuotettu tapahtuma , šentäh šemmoni mieli on šäveleššäki .Mistäš tulet -laulu on erittäin tragini , še näytti , kuin vaikie oli elämä .Nuorien prihojen ikävä šykyšy on rekruuttien minorilaulu ta myö luatima šitä bl’uzin tyylissä .Laulun merkityš vaikuttau musiikkih ta niise improvisatijoih .Mitein myö tunnemma musiikkie šoittamisen hetkellä , šemmoni improvisatij o šyntyyki , šano Alina Repetskaja .
MUSIIKKIVIDEOT ON KUVATTU KAUNEHISSA PAIKOISSA
Monen musiikkikappalehen mukah duetti kuvasi musiikkivideot .Kuvaukšien paikoiksi hyö valitah pohjoset kaunehet paikat , kuin Puanajärven puisto , Vottovuara , Hipinä-vuarat , Teriberka-paikka Barentsin meren rannalla .Kuvaukšien aikana äijän mitä mukavua tapahtu ta muusikot mielelläh kerrotah šiitä .
‒ Ennein myö kuvasima vain šitä , kuin šoittima musiikkie .
Ota onki -šäveltä varoin meilä šynty ajatuš kuvata musiikkivideo juonen mukah , a iänityš oli luajittu studijošša .Myö noštima Vottovuaralla kuvauštekniikkua , pukuja , šoittimie , pitimä kuvaukšet päivällä ta yölläki .On mukava , jotta kuva täštä videošta tuli uuvven al’pomin kanšikuvakši , muhien muistelou Alina .
Luovan toiminnan vielä yhtenä šuuntana on oman musiikin šepittämini .Uuši musiikki ei šynny vain innoššukšella .Šäveltäjän ruato on vaikie ta kyšyy äijän aikua ta voimie .
‒ Kuni et čukella täh prosessih nimitä uutta ei šynny .
A još enemmän šepität , niin paremman tulokšen šuat .Omalla musiikilla olis hyvä omistua enemmän aikua , šanotah muusikot .
Jurii Žuk ta Alina Repetskaja -duetin musiikkie voipi kuunnella ta musiikkivideoita kaččuo šamannimiseššä VK-ryhmäššä .Niise heilä on äijän konserttija Petroskoissa , niijen ilmotukšet šamoin löyvytäh ryhmäštä .Kitaristien šuunnitelmissa lähiaikana on antua konserttija , valmistua kappalehie uutta al’pomie varoin ta kuvata musiikkivideoita .Hyö koroššetah , jotta luovalla ihmisellä kaikešta tärkeimpänä on antua toisilla oman ruavon hetelmie .
Mie olen Iutalašta
Karelian Proper
New written karelian