Texts
Return to list | edit | delete | Create a new | history | Statistics | ? Help
Valentina Libertsova. Igä elä, igä opastu! 1
Valentina Libertsova
Igä elä, igä opastu! 1
Livvi
New written Livvic
MAČARVESGI OLI
ALGUŠKOLA
Minä opastuin kahtes školas .Enzimäine oli Mačarven alguškola , moizii silloi meijän Anuksen piiris oli äijy .Enzimäzenny opastajannu oli mama Aleksandra Vlasovna Rodionova .Elimmö järven tagan Lökinselläs , joga huondestu toizien kymmeniezen lapsienke ajoimmo venehel puolentostu kilometrii .Kuni ei annettu školale venehmotorua , vahnembat lapset vuoroi sovvettih , mama melai .Talvel , tiettäväine , jallai libo suksil puutuimmo .Erähät lapset enne školua ei maltettu ven’akse , puaksuh heile pidi sellittiä kai karjalaksegi .Silloi eri čuassuloi ven’akse opastundah vet ei annettu , ga vikse karjalazet lapset da opastajat oldih hajukkahat , yhtelläh alguškolan lopimmo hyvin dai Kotkatjärven školas opastuimmo kunnolleh .Mamas opastuin alalleh lugemah , leikkuamah lehtis da keräilemäh pädevii opastundakse kirjutuksii da kuvii , matkustelemah .Häi joga keziä vedeli Mačarven opastujii Petroskoih .
ŠKOLA , KUDUAS KAI OPASTAJAT OLDIH PARAHAT
Kotkatjärven školas kai opastajat oldih parahat , tiedäjät , ellendäjät , intelligentnoit , kiinostunnuot .Konzu jälles 40 vuottu školan loppiettuu vastavuimmo oman kluasan da opastajienke , ovvostuksis kuundelimmo , kui Karjalan arvostettu luonnontiijon opastai Galina Karpovna Nasibulina piädykauti ahkeroičči hätkembän eččie kluasanpäivykirjas , kedä kuččuo vastuamah kodiruaduo , gu andua opastujil kaksi-kolme liigua minuuttua kaččuo opastuskniigah .Häi iče oli Siberispäi , sit toi urokale "pienet puččizet , tävvet pädeviä ainehtu " – kedran oriehua da musteli , kui jälles voinua hyö kaivettih takkisheinän juurii , syödih iče da vie annettih japounielazile plennoloile .Joga keziä kuivaimmo gerbarieloi , piimmö kazvoksien koittehii .Sygyzyl Sualispruazniekas niidy ezitimmö , piimmö konsertan da sit kaikin söimmö vinegrietan da čuajunke varen’n’ua , varustettuu oman školalluo kazvatettulois ouveššilois da tuhjolois .
Konzu meile tuli opastamah nuori alguvojennoin valmistandan opastai Aleksei Zaharovič Andreiko , kudai ruadoi yhteltiedy kluuban johtajannu , kai vahnembien kluassoin opastujat häneh miellyttih .Minun mielii myö , se on ylen pädevy opastusaineh .Myö saimmo tiijot armieh da voittoloin histourieh nähte , harjavuimmo kiärimäh satateksii da kiinityslastuloi , panemah ukuoloi da bankoi , miäriämäh verenpainettu .Tiettäväine , net kai päittih ielleh , tässäh omahizil da nuaburiloil panen ukuoloi dai opastan sih .Vie puaksuh Aleksei Zaharovič järjesti Zarnitsa - da Orl’onok-vojennoloi sportukižoi , kus minä ainos olin žurnalistannu da piästin ilmah Bojulehtyzii .Vuvvel 1973 myö voitimmo piirin kižan da puutuimmo Karjalan kilbah ainavonnu kylän joukonnu , saimmo sie viijenden sijan , onnuako 15 linnan joukkoloin keskes , minun Bojulehtyt kilvas puutui kai toizele sijale .
Enzimäzih lehtien azundu -, ruadivo-ohjelmoin , konsertoin , KVN :an luajinduneroloih meidy opasti da harjaitti piirustus - da muantiijon opastai Nikolai Ivanovič Feklistov , tovelline karjalaine mies , nerokas , maltai , ruadai , hyväsydämelline .Joga kevätty pidi kaiken školan opastujile Matkustajien sl’otan , astuimmo meččiä myö Tiihoiselgäh , joga kluassujoukko omua azimuttumaršruttua myöte da azuimmo kohtan topogruafiellizen kuvuamizen .Sil aigua dostalit lapset puututtih ahole oigiemban kujon kauti , azuttih bivuakat palatkoinke .Ielleh jatkuttih eriluaduzet mieldykiinittäjat kilvat da kižat .
Anglien kielen opastai El’za Armasovna Mikkonen oli Kanuadan suomelazii .Hänen pagintaba oli ylen hil’l’aine da selgei , hierun lapset suadih hyvin ellendiä ulgomualastu paginua .Häi andoi urokoil enämbän tieduo , kuduat pätäh elaigah , pidi kerholoi da Internacionallizen ystävyksen kluuban , myö vahnembis kluasois jo ičegi opastimmo nuorembii .Anglien kielen tutkindos läbi Petroskoin valdivonyliopistos minä piäzin školanaigazien tetrattiloin avul .Konzu rubein sanelemah Londonah niškoi , arvostajil silmät nostih oččah : kusbo nämmä otit ?Tekstu puutui Robert Börnsah näh , jälgimäine kyzymys oli : suvaičetgo tädä runoilijua , ližäin vastavuksen školas mustoh pannuol runol .Muga smietin ei yhtel minul sattunuh , äijät meijän školan loppenuot vallittih anglien kielen opastajan ammatin .
Kotkatjärven školan opastajih nähte vois sanuo vie vägitukku parastu .Minuu opastajat jälles školua potakoittih eriluaduzih ozastoloih , mikse liennen valličin ven’an kielen filolougien ozaston .
Igä elä, igä opastu! 1
Livvi
New written Livvic