Texts
Return to list | edit | delete | Create a new | history | Statistics | ? Help
Izotov IIvan . Tovelline opastai
Izotov IIvan
Tovelline opastai
Livvi
New written Livvic
Minun
muamo Klavdija Vasiljevna Izotova (Tihonova ) oli roinnuhes 1.kevätkuudu vuvvennu 1920 Kondupohjan čupun Kavgorakyläs .Hänen karjalaine pereh oli tavalline muanruadajien pereh .Perehes oli viizi lastu , muamo oli nelländenny lapsennu .Pahuospienyössäh muamo oli ylen kyvykkähänny da tarkannu ristikanzannu , hänel oldih hyvät maltot da tavan ominažuot – hyvä musto da suuri tiijonhimo , ahkerus .Muamo opastui Kavgoran alguškolas , jatkoi opastundan Belaja Gora -kylän školas .Opastundan hyvien tuloksien periä händy työttih opastumah Petroskoin pedagouguopistoh , kus vuvvennu 1940 häi loppi opastundan parahien arvosanoin kel .Opastundan loppiettuu muamo sai miärävyksen ruadoh Mundärvenlahteh , silloi tämä kylä oli Petrovskoin čupun piirikeskuksennu .Kerras händy pandih školan opastuspuolenjohtajakse da yhteh aigah lapsienpäivykoin da lapsienkoin johtajakse .
Ga sit algavui Ižänmualline voinu ...Vihaniekat jo lähettih Mundärvenlahtie , školan da lapsienkoin hengikundu ruvettih lähtemäh pagoh , silloi ei olluh aigua duumaija iččeh näh ...Jälgimäzien lapsien pagoh työnnön jälles Petroskoih suomelazet vallattih Mundärvenlahten toizen piän .Ga jo Kondupohjan lähäl arestuittih muaman joukko .Ruvettih kyzymäh – kenbo , kuspäi , kunnebo ?Muamo oli työtty Suomeh .Hänenke yhtes sinne puututtih hänen samalkur-salopastujat , karjalazet neidizet .Vihaniekat kyzelytarkastuksien jälles vie kyzyttih , tietähgo kielii , kus opastuttih hyö ?Jälles muamo toizienke yhtes puutui Suomen Rauma-linnah .Sie heidy vie kerdu tarkastettih , piettih tutkindo ...Kaikin smietittih , ku puututah vojennoih luagerih , ga neidizii työttih opastumah yliopistoh .Yliopistos oldih urokat , sie oli syöndykohtu , elettih pienes yhteseländykois .
Vuvvennu 1944 Suomi heitti toruandan , kaikkii neidizii työttih kodih , Karjalah .Ei ni jiännyh niken Suomeh , hos sai se ruaduagi .Kodoilas tarkastuksen jälles muamua kehoitettih ruadamah Vladimirskaja-kyläh (enne tämä kylä oli Belaja Gora -kylän lähäl ).Pidi suaha endizeh kundoh škola , silaigua ei olluh nimidä , ku olis opastandu pättävy .Vähin vähäzin kai azetui , ruvettih elbymäh kylien školat .Vuvvennu 1948 tuli tuatto , voinan jälles molodoit mendih yhteh da elettih Kavgora-kyläs .Kylä jäi voinan aigua kogonah , torat mendih kyläs siiriči , vaiku äijy miesty ei kiändynyh järilleh ...Tuatto parandi leikkavuksien jälles , ruadoi mečänvardoiččijannu .Meijän perehes oli kolme vellie da sizär .Vuvvennu 1960 salvattih Kavgora-kylän škola , riičittih kylän kirikkö da viettih se Kiži-suarele , tämä puuhine kirikkö on Kiži-muzeis nygöigi .
Muamua pandih Vatnavolok-kylän školan johtajan virgah , häi ruadoigi opastajannu sie .Minä menin školah da muamo oli minun enzimäzenny opastajannu !Školas oli äijy lastu , kolme opastajua opastettih heidy .Päiväl muamo ruadoi opastajannu , illal ruadoi kai kodiruavot , sen jälles kačoi tetrattiloi , planiiruičči opastusruaduo tuliekse päiväkse .
Kyläs oli puunhuavustuszavodu .Joga vuottu rahvastu kyläs rodih vähembi ...Lähäl oli Kondupohjan linnu , nuorižo lähti ruadamah sinne .Lopun lopukse puunhuavustuszavodu salvattih , kyläs ei roinnuh ruaduo .Sit salvattih školagi , sendäh gu ei olluh lastu – ei olluh kedä opastua ...Jo eläkkehel olles muamo sai ruadovuozii – hyväksyttih hänen opastuksen Suomes da korgei-školaopastuksen diploman .Joga vuottu muamua palkittih kunnivokirjoil , annettih liečemiärävölöi sanatourieloih .
Nygöi kylän kalmužimale kävves näet , ku hänen kalmua kačotah , pannah kukkua da kabrastetah topat .Se rahvas , muaman opastujat da händy suvaiččijat , kävväh hänen kalmale .Pahakse mielekse vuvvennu1999 kyläh tuli hädä , meijän kodi paloi tulipalos .Silloi hävii kai perehen arhiivu – mustovehkehet , fotokuvat ...Jäi vaiku vahnu fotokuvien al’boumu , kudaman muamo luadi Suomes olles vuvvennu 1943, čuudo pellasti sen – vahnin velli otti tämän al’bouman ičele tulipaluo vaste .
Vuvvennu 1997 muamo kuoli , meile ylen äijäl ei tävvy händy , hänen viizahii nevvoloi , suvaičustu da kaikkie , mi yhtistäy meidy lapsusaijan da oman koin lämmän kel .Häi oli tovelline opastai , kudai andoi kaikile vaiku hyvytty da jäi opastujien mustoh ijäkse .Häi opasti heidy kirjuttamah , lugemah da suvaimah elostu .Bunukat da pruavobunukat ruvetah mustelemah Klava-buabua lämmästi da armahasti .
Tovelline opastai
Livvi
New written Livvic