Texts
Return to list | edit | delete | Create a new | history | Statistics | ? Help
P’otr Vasiljev. Čudokaz matk Šimjärvehe
P’otr Vasiljev
Čudokaz matk Šimjärvehe
Veps
New written Veps
Kadonuded
vepsläižed küläd čudokahan Šimjärven randoil ičeze aigan oliba lujas tetabad Venämal .Sinna , tetaban mecnikannoks Martemjan Petrovič Martjanovannoks tuleskeliba mectusen navedijad Venäman erazvuiččiš polišpäi , heiden lugus oliba carin kanzan ezitajad -ki .Šimjärves sündui Venäman arvostadud lendai Anatolii Bogdanov .Neniš tahoiš navedi rata tetab vepsläine kirjutai Anatolii Petuhov .Äjile kul’turan da tedon radnikoile oliba mel’he Šimjärven randad .
XX -voz’sadan keskpolel valdmehiden käskön mödhe vepsläižile pidi ajada kodirandalpäi .Siš aigaspäi mäni jo enamba 50 vot , no erased ristitud ei unohtagoi kodiküläd , napriba oleskelda sigä da toba sinna ičeze lapsid i vunukoid .Hö toivoba , miše konz-ni udes pördase heiden armhile da bohatoile kodirandoile elo .
Sadas Šimjärvehesai om jügedahk .Meiden matk ühtes Rahvahaližen voinan Gerojan P’otr Sem’onovič Terentjevan jäl’genikoidenke jatkui läz kogonaižen päivän .No kacmata neche matk jäti neniden ristituiden südäimihe hüvän mušton ičeze ezitatoiš .
Ekspedicijas oli Gerojan vunuk , voin vertol’otan komandir , major P’otr Dimov .Hän iče äi kerdoid kuli pul’em’otoiden ambuskelendoid .Ičeze tabal da voinmehiden dinastijan elo-ozal P’otr johtuti minei "Oficerad "-tetaban fil’man hengid .
Ei kuvitelda sanoil P’otr Sem’onovič Terentjevan heimolaižiden tundmusid loičendan aigan Šimjärven vanhas Georgijan pühäkodiš .Neciš pühäkodiš valatadihe P’otr Terentjevad , a sen kaumištol om mahapandud hänen kazvatajad .
Kacmata sihe , miše kaikuččel necen matkan ühtnikal om äi radod da azjoid kodiš , hö löuziba voimusen tulda ezitatoiden kodimale kulištamha Šimjärven lainehiden läikičendoid , nägištamha ičeze sil’mil Kamennii Navolokad da toižid sijoid , süvenemaha tactud küliden enččehe eloho ...Pühäkodin uskihe om azotadud muštlaudaižid , miše rahvaz muštaiži ičeze man gerojiš .
Meid kaikid čudutoiti Nikolai Sem’onovič F’odorov .Nece 80-vozne mez’ , kudambal oli ei kebn elo , kaičeb henges hüvüt da armastust ristituihe , muštod kodiman enččes elos da necen elon ristituiš , hüvin muštab kodikel’t .
Neciš igäs hän udes hökkähtui ajada sadad kilometrad hubad tedme , miše ozutada vunukoile sijoid , miččid tusttub hänen südäin .Nene oma tactud pertid da školad , kazvahtadud pöudod , miččiš hän oli radanu laps’aigal da peitsijad , miččiš verhile ristituile ei starinoikoi .
Hän avaiži meile ičeze sijaližen toponimikan el’gendust , starinoiči ičeze rahvahan tradicijoiš da jagoihe mugoižil tedoil , miččid ed löuda internetas .Hän kuti rigehtib antta ičeze tedoid tulijale sugupol’vele , miše ned ei kadoižigoi igäks ...
Konz mö väzunuded , no ozakahad pördimoiš tagaze , Nikolai Sem’onovič ihastoiti meid matkan aigan ičeze runoil .Hän tegi necidä ei sen täht , miše ozutada ičeze lahjavut , no miše ozutada ičeze armastust kodimaha .
Antkaha Jumal necile hüväle mehele , Šimjärven sündujale Nikolai Sem’onovič Terentjevale tervhut , miše völ äi kerdoid mö voižim kundelta hänen paginoid enččes elos da sen elon ristituiš .
Čudokaz matk Šimjärvehe
Veps
New written Veps