Texts
Return to list
| edit | delete | Create a new
| Statistics
| ? Help
Barhatova L'udmila.
Grigorii Vvedenskoilla — 235 vuotta
Source:
Karielan šana. 2017. № 1 (136). С. 2
Barhatova L'udmila
Grigorii Vvedenskoilla — 235 vuotta
Karelian Proper
New written Tver
Grigorii Vvedenskoi šyndy 20. sent’abr’ua vuodena 1782 papin pereheššä Kozlovan kyläššä. Hiän opaštu Tverin seminuarissa i hyvin loppi žen v. 1808. Tverin seminuarissa ših aigah opaššettih monda kieldä. Äijän tverinkarielazie opaštu šilloin pappiloiksi, kun vallalla pidi hiän vuoh šuaha yhtehyttä kylin eläjinke. Vvedenskoin pani papiksi Tverin Arhirei Mefodii 7. aprel’ua v. 1813 Kozlovan kirikköh hänen tuaton šijah. Händä kyläläzet kučuttih Riigo-papiksi. Vvedenskoiloin rovušša kaikin miehet oldih pappiloina.
Pereheššä paistih karielakši. Riigo-papin muamoh oli karielane. Hiän šyndy Prudovan kyläššä Trestnan volostie. Grigorii Vvedenskoin naine Matrona Mihailovna oli Glubokoin kyläštä. Heilä oli nellä poigua i šeiččimen tytärdä. Kolme poigua liettih pappiloiksi. Yksi tyttäristä oli miehellä Tolmačun papilla.
Vuodena 1819 oli kiännetty Jevangeli Matfeista. Vvedenskoinke yheššä luajittih kiännöštä Matvei Zolotinskoi da kylän talonpoijat. Sv'atoi Sinoda paino Jevangelin Matfeista Piiterissä v. 1820 i bluaslovi pappiloilla ruavon jatkamis't'a. Hyö kiännettih vielä Jevangelin Markašta. Vain že jäi kiänkirjutukšella. Molemmat Jevangelit oldih kirjutettu kirillicalla, kumbazeh oli lizätty kolmetoista znuakkuo.
Jevangeli Matfeista on enžimäne painettu karielan kielellä sv'atoi kniiga. Kuin toizilla rahvahilla oli, što kirjutandakielen alguna oli Jevangelin kiändämine, niin on i meilä karielazilla. Jevangelin kieli on maltettava nygyzillä karielazilla.
Grigorii Vvedenskoi eli pitän elännän, hiän kuoli 23. dekabr'ua vuodena 1865. Jevangeli Matfeista voit löydiä Tverin universitetan bibl’otekašta da Internetašta.
