Texts
Return to list | edit | delete | Create a new | history | Statistics | ? Help
Anuksen päiväine. Vähäzel suarnu. 2
Anuksen päiväine. Vähäzel suarnu. 2
Livvi
New written Livvic
VENEHES
Jo työnnetys viele venehes istui kaksi naistu – oksienleikkuajua da briha – kaikin mendih toizele puolele mašinah da ielleh ruadoh meččyruadokeskukseh .Kajoit riehkittihes sinne-tänne , vonguttih igävästi .Tuatto ähkäi venehen loitombi rannas , hyppäi peräh , tabai melan da käski soudua .Yksi naine istuihes airoloih muamale avvuttamah , a toine poij anke sij oitui lavvale da rubei midälienne sanelemah .Nast’oi pujoitui heijän rinnal , vai edehpäi očin – myös peitti silmii vägeväs päiväzen tulespäi , harvazeh tabaili näppilöil aldoloi , kačahtelih linduloih , kuduat piän piäl hol’otettih täytty kidua , toiči heityttih ihan aldoloissah – sit vikse toven uskaldettih ehtäkse suurdu jyryy .
Akan tarattamizih Nasti ei tarkah hörkistännyh korvua , se midälienne saneli Pyhä Anastasijan obrazah nähte , kudai avvuttau leskilöile , se olis omas časounas , vois pakita hänel abuu heinien suajes , ga karun herrat-kommunistat salvattih veriät lukule , ei laskieta rahvastu , hapatetah Jumalan huonuksen sydämii .Kalmoin kuuzikko nägyi loitokse , kaččojes jälgeh kajoloile tytöl ozuttihes , buitegu korgieloin terävien ladvoin piäl paloi moine kuldaine venču , gu sil kasteheinikön neičykäl .A lekkujas rinnal pilves tunnuttih tuskahizet silmät da käit ristalleh ryndähäl .
– Vikse myöstin voimattomat silmät smutitah , piätti Nast’oi da rubei primiettimäh , kui lähenöy randu da ket tuttavat jo vuotetah rannal mašinua .
DOROGAS
Ajua meččydorogua myöte oli hoivembi : päiväine ei olluh moine räšköttäi , a gu valpasruskei pyöräkköine , nel’l’oili puuloin keskes , kučui kižuamah , tabailemah , nagramah .Motoran kohinehes kenlienne hil’l’akkazin pajatti : "Anuksen päivy …Anuksen pruazniekku …Erähät ajetah …Kedä vuotetah… "
– Kačo nygöi , jo ei yhtet silmät , korvatgi smutitah , pöllästyi tyttö , ga muamalleh sanomah ei ruvennuh , vai nojavui pehmien muaman olgupiän pieleh .
Vie yhtes kohtas tiešuaral vilahtihes päivazen vastal seizojien mustien puuloin keskes neidizen kuva da kuului buitegu "Musta …musta… "
Vahnaine babine , vahnembi Nast’oin buabua , kai ruppilois , ennevahnallizeh luaduh sivotus paikas risti sih tiešuarah silmät .Šouferi , nuori ruskeiroža mies , räškähtih nagroh :
– Midäbo pahanruadajih da viinanjuojih ristittös ?Pyhätgo net ollah ?Siehäi nygöi pieni pakollizen lieččimizen kohtu on .Vai et tiij ä, hierun babi ?
– Älä vai nagra , toinah vie paretah Jumalan avul , sie manasteri oli , äijy pyhiä ristittysty eli dai muas on .
A minä pyhäle Anuksen Anastasijale molimmos , meijän leskilöin avvuttajale .
ANUSJOVEN PIÄL
Kodvan kaikin ajettih vaikkani , vähäzin avtoubusan syväin räkkevyi , oli himo ilmah .
– Konzu se Anuksenlinnu tullou , viego hätki pidänöy ajua ?
Ollougo jo se "krai sveta ", kui erähis kniigois kirjutetah ?ajatteli tyttö .
Sit jälgimäi muamah avai vähäzel ikkunan :
– Ei roinnehes vilu , kačo , puutummo Yllözeh , sit algavuu Anus .Kačos , agu ollah čomat jogi da sildu , tua loitomba suuret linnan monikerroksizet koit nägeväl .
Nasti vie kerran täs huondekses buitegu kurmistui , korvih perrettihes puolentostu suan pualikan pläčkändät puoleh tuhandeh märgäh sobah , kuduat tukulleh viruttih lautoil , a naizet , kiärinyzien helmoinke , ruskieloil käzil perrettih täytty vägie pualikoil , kiirehtettih loppie pezemizet , kuivata nengozel povval päiväzel hyväl tuulijas ilmas kai sovat , da sen zobotata eliä dostalit kuuzi nedälinpäiviä .Se oli gu simfounii naizien ruavole da puhtahan suvaičuksele , Anusjoven piäl .Ilmu nägyi gu konsertuzualu : levei – kai ken läpettäjän , šuorien , gu zirkalo , vezilagevuksen levevys , korgei – pilvettömäh taivahassah , kus lenneltih , ga jo ei kuuluttu linnut , kirkas – täyzi Anuksenlinnan kaunistu huondespäivästy , kuduadu ei nägynyh avtoubusaspäi , ga se tundui silmil , kerras hiildunuzil käzil dai korvil , kudamis jatkui helevy luonnon da ristittyzien ruadomuuzikku .Sildu valgiezien käzipuuloinke oli gu ylähäine kerros – juarussu , kus istutah konsertois nuoret .Avtoubusas ajandu vie ylembä nosti rahvahii , avai vie suurembii vällyzii .Mašinan hurizendas , naizien pualikoičendas , uidelijoin lapsien iänis , joven kohistuksis läbi kuului buiteku mittuinelienne ylendäi sävelmy , mituttu sai kuunelta toiči kodiruadivos .Täs kuvas tundui moine luja suuren pruazniekan ilo , ga vuottamattah tuldih Nast’oile piäh mielet :
– Tämä Anuslinnu , täs onnuako on toven ylen suuri linnu , piälinnu .
– Muga , muga , tytär-rukkaine , Anus on piirin piälinnu , opastuimmohäi školas , jälgimäi kuului muaman iäni .
Mašin meni jogirannandorogan palazen da punaldih hurale viizikerroksizien kodiloin keskes läpettäjän tien myödäh .Ymbäristö hilleni , alevui , ristittyöt kerävyttih , varustuttih lähtemäh iäres , uppuomah silmännägeväl migu vai lämbiejäh linnah .
ANUKSENLINNAS
Heityttih Anuksen muale Nastigi muamah kel , kirkieh astuttih poikki dorogas .Muamo juohatti , kui opasti kois kaččuo enne oigieh , sit hurah puoleh päi , eigo aja rinnal mašinua .Sit astuttih ihan gu hierun pihua myöte , vai koit kai oldih piälystetty puulaudazil da mualattu bordih libo heinänkarvazeh , hierus heil oldih parzikoit .Kus päiväine ei ugodinnuhes tiel , tyttö kaččelih ymbäri suures himos nähtä tiä kai , midä vai suau , da kois löyhkiä tyttödovarišoile , mittuos čomas kohtas puutui kävellä .
Sit piästih kaksikerroksizeh valpahansinizeh kodih , nostih ylen jyrkis pordahis , puututtih ihan silmyliäkärin veriäh .Muamah istutti Nastin pidämäh vuoruo , iče heityi alah – kirjalepanij ah toimistoh suamah kartočkua da nomerkua .
Nasti myöstin rubei kaččelemahes .Päiväine tänne ei koskenuhes , vai loitton pertivälin n’okas nägyi vähäzel ikkunas päivänvalgei taivas korgieloin puuloin ladvoinke .Pertiväli oli puhtahaine , mentiijämi veriädy mollembis puolispäi , kudualois toiči lähtiettih libo syvättih piä valgieloih sobih sellityt naizet .Nast’oi tiezi : net ollah liäkärit , a veriälöillyö hil’l’akkazeh istujat ristittyöt – voimattomat .
Anuksen päiväine. Vähäzel suarnu. 2
Livvi
New written Livvic
–
–
–
–