Texts
Return to list | edit | delete | Create a new | history | Statistics | ? Help
Ivan Savin. Pitkyjärven sillan mustokse. 2
Ivan Savin
Pitkyjärven sillan mustokse. 2
Livvi
New written Livvic
SILLAL
AINOS OLI ELOSTU
Talvizingi , konzu järvenpindu oli jiäs da lumen al , sildu yksikai oli käytös .Sidä myöte meni hyvä suksiladu .Tiettäväine , laduloi oli järvie myötegi dai hiekkuäbrähäs oldih mäinlaskukohtat da hyppyrit , ga yksikai monet hiihteltin silduladuu myöte .Suvaittih sildua .Se ainos oli kunnivos – kezäl dai talvel , keviäl dai sygyzyl , povval dai röčäl .
Sillal ainos oli elostu , kuului hyviä dai pahua , toiči trageediedugi .Se tapahtui jälgimäzenny lebopäivänny 31.elokuudu , konzu kai lapset oldih jo valmehet školah .Oli lämmin ildu .Erähät brihaččulois jiädih sillale , a toizet mendih lähäl olijale lagevole kižuamah gr’uuhah .Kodvazen peräs sih juoksi Ven’a-brihačču pöllästyksis kirgujen : "Bor’ka Tolstikov uppoi !"Yhteh hetkeh kaikin oldih sillal .Bor’ka kui pakui sillalpäi vedeh , mugai seizoi kokotti pystylleh vienpinnal al , vaiku vezi lekutti hänen valpahii tukkii .Randah suate oli vai puolikymmen metrii , ga se oli syvä kohtu .Lapsien ravun kuuli ei loitton olii ongittai , terväzeh sovvaldi sih , nosti brihačun vies .Sillale ehtittih jo rahvas kyläspäigi da kaikelleh opittih elavuttua Bor’kua , ga kai meni sudre , ku lapsi oli olluh vies läs puoličuasunaijan i hänes enämbiä ei kydenyh nimittumua elonmerkii .A Bor’kal tossupiän pideli enzikerran polgie školan kynnykses piäliči …Ga täh muailmah jäi vaiku igäine musto da tusku Bor’kan vahnembile omas ainopoijas .
Jälles niidy tapahtumii kuului monii vuozii , ga sildu pyzyi elos .Kezil sidä kohendeltih vaihteltih piällyslaudoi konzu kudamas puoles , lujiteltih reunoi , ku net ruvettih happanemah .
Sillal kävelijätgi vähettih vähenemisty .Koitti se aigu , konzu hyllättih kogonah kai kohendusruavot .Kodvazen peräs sillan keskikohtale rodih loukko , kudai vuozi vuvves leveni .Vähin-vähäzin se muutuigi harpuamattomakse välikse , ga erähät rohkiet miehet vie ruohtittih hyppie yliči .Vuvventoizen kuuluttuu segi keskučču meni ihan piäzemättömäkse .Sit kohtas enämbiä et piäze järves poikki ...
SILDU KUOLI
Rannat tyhjettih , tropat umbavuttih , rahvasvirrat hävittih kogonah .Vaiku sillan jyrkyrandu kokottau endizelleh vägevänny "miehenryndähänny " da igävöiččehes vastastu madalua "naisrandua ".A jyrkändehen pedäjät iellehgi heilutetah omii kaunehii oksii da tiputellah pihkukyynälii rounoku mustokse rannoin yhtistäjäle hävinnyöle sillale …
On kuulunuh jo läs puoldusadua vuottu .Kodimuale kävves kezäpäivin toiči stuanih punaldellakseh sille pedäijyrkändehele , hävinnyön sillan kohtale .Sildua jo ammui ei ole olemas , vaiku vies töitötetäh mustennuot endizien paččahien nyčät .Sildu kuoli .
Sie kävelles puaksuh suau nähtä vahnua miesty .Häi hil’l’akazin kävelöy pitkin jyrkiä randua , azetteleh sih kohtah , kus oli sildu , ripoittelou čuurustu sormis läbi , rounoku eččis midätahto .Kodvazen peräs häi vieröy pedäjikön havvuhurstile da käit tagaraivol hätken tarkailou siiriči menijöi pilvihatikkoloi .Toiči mies silittelöy pedäirungoloi , ihan ku kiittäjen niidy mustoloin säilyttämizes .A toiči häi hätken istuu jyrkändehel kaččojen vastazeh randah päi , rounoku mustelou niidy aigoi , konzu helpoh sai piästä sinne .
Hyvät rahvas , älgiä nikonzu rikkokkua sildoi , kohendakkua niidy , pidäkkiä hyväs kunnos , azukkua uuzii sildoi .Gu eihäi suanne ni sidä , ni tostu , sit azetakkua ristu hävinnyön sillan korvah , kui azetetah se kuolluon ristikanzan kalmale .Anna harvu siiriči astui ristikanzu vois kumarduo sille kohtale .Kuolluhgi on tarbehekse parembi eläjile .
Pitkyjärven sillan mustokse. 2
Livvi
New written Livvic