Texts
Return to list | edit | delete | Create a new | history | Statistics | ? Help
Alina Gapejeva. Korbiselgy on kylä!
Alina Gapejeva
Korbiselgy on kylä!
Livvi
New written Livvic
Priäžän
piirin kylän elejät piätettih suaja omien tuattoloin kylän endizen stuatusan .
Korbisellän kyliä et lövvä muailman kartoil .Kyliä pietäh karjalazien endizenny eländykohtannu .Yhtelläh sie on vie eläjii – avvoisydämellizii , hyväntahtozii da rahmannoloi .
Ku lähtenet Korbesellän kyläh , roih sinul arbaitus – kus se ollou ?Gavigattoru ei auta .Priäžän piirin vahnu kylä menettih kylän stuatusan da sidä ruvettih sanomah ven’akse "territorija ".Moine abei sana .Tänäpäi se "territorija " kuuluu Jessoilan kyläkunnan Prokkoilan kyläh .Prokkoilan da Korbisellän välis on kolme kilometrii meččiä .
– Algiä ajakkua siiriči meijän kiännälmykses , se on Liettien da Prokkoilan välis , sellittäy meile dorogua Korbisellän eläi .
Löydiä tädä Korbisellän kiännälmysty enzikerras on jygei : se on kaidu , tuhjoloil kazvoitunnuh .Nimittumii tieviittehii tiel ei ole .Tie on moine kaidu , enimite talvel , ku vastakkai ajajat mašinat ei synnytä tiele .Yhten kilometrin piäs puut rounoku vältytäh tielpäi da matkailijan ies avavuu suarnalline kuva .Moine čomus , kai hengen salbuau .Korgevimal kohtal seizojes näet Korbisellän kui omal kämmenel : yksi piha vönyy lamminrandua pitkin , koit ollah segai , vahnal pogostal kazvetah igivahnat kuuzet .Tämän nähtyy kieli ei kiänny sanomah kyliä endizekse .
Mieleh johtuu kyzymys : kenbo da min hyvyös piätti yhtistiä kaksi kyliä , kudamat ollah loitton toine toizespäi ?
Haldivollis-alovehellizen jaguamizen luvettelon mugah , monet kylät , kudamien joukosgi Korbiselgy , hävitettih vuozinnu 1993–1994.Optimizatsii niyhty ei žiälöinnyh kylästy : täs nygöi eigo ole laukkoi , eigo feršalipunktua , eigo školua , eigo päivykodii .Tänne ei kävvä maršruuttuavtoubusat .Sih kaččomattah kyläs ymbäri vuvven eläy nelli perehty , yhtes niilöis ollah lapset , dai erähil eläjil on ruaduo .Kuibo muga vois olla ?Minul lykysti pagizuttua "uinonnuon " kylän eläjii .
UUZI ELOS
Sanakse , internetas , kudai äijän midä tiedäy , vähättävy on tieduo Korbiselläs .Lövvin kudamidä arhiivutieduo da kai .Tiijustin vaiku , ku järven rannal olijas Korbiselläs yksi-kaksi vuozisadua tagaperin elettih karjalazet , läs viittykymmendy eläjiä .Kyläs oli časounu , vahnois talolois säilyi vaiku yksi .
Mennyön vuozisuan lopus Korbiselgy oli häviemizilleh .Ozakse , ei hävinnyh : omien eziižien roindumuale ruvettih kiändymäh rahvas .
Vuvvennu 1992 Korbiselläle tuldih elämäh linnaspäi Sergei da Galina Šambinat .Heijän pasportois eländykohtannu on "Prokkoilan kylä , territorija "Korbiselgy ", endine eländykohtu ".
– Kellebo oli tiel meijän kylä ?
Kuibo voi nimittiä vahnua kyliä territorijakse ?Meijän tiešuaral ei ole ni viitehty , eigo kyläs ole pihan nimie , hämmästyy Galina Šambina ozuttajes omua pasportua .
Ezmäi Šambinat ruvettih fermeroikse : ostettih traktoran , piettih žiivattoi , kazvatettih ouveššiloi .Nygöi mollembat ollah eläkkehel .Aijan aloh hyö kunnostettih omua kodii , nygöi sie ollah viet da kanalizatsiet .Päivät terväh hušketah : lumet pidäy suomie , murgin keittiä , lämmittiä päčit .
– Aiven tahtoin eliä kyläs : vavot , meččy , puhtas ilmu .
Died’oi on pannuh kundoh ongiruagat – voibi ongittua .A linnas midäbo ?Nouzet viijendeh kerrokseh da istut kovas rouno .Kiändymäh Petroskoih emmo rubie , midäbo sie ruadua ?sanou emändy .
– Kuibo elättö laukoittah ?
– Meijän eläkehmaksoloinke laukkoih parembi olla käymättäh .
Se šuutkakse sanon , tiettäväine .Meil kaikkie on kylläl , a ku pidänöy midätahto , kerran nedälis ajan tyttärenke Jessoilan laukkoih .
Yhtes Sergein da Galinanke eletäh heijän An’a-tytär da bunukat .Hyö mutettihes Korbiselläle ei ammui .
Anna ruadau magieloinvalmistajannu Jessoilan sel’pos .Ruadoh ajelou omal mašinal , yhtel tiel vedäy lapsii Jessoilan školah da päivykodih .L’on’a opastuu nelländes kluasas , viizivuodine Polina kävyy päivykodih .Vahnembal tyttärel on 23 vuottu , häi eläy linnas .
Kyläs eläjes ruaduo ainos löydyy .Annal paiči kodihommii on vie mieliruado .Häi pajattau L’ubava-ansamblis , kudai ruadau Jessoilan etnokeskuksen tyves .Erähil kylis on igävy eliä , toizil igävöičendoih aigua ei ole : kai rippuu ristikanzas .
KUZ’MIČ
Šambinoin syöndypertin ikkunas kylä nägyy hyvin .Suuren lumenpanon jälles kylän ainavo uuličču uppoi lumeh .Nägyy , loitton kenlienne ravieh suomiu lundu .Se on Vladimir Kuz’mič Amosov .Omamualazet sanotah miesty muite Kuz’mičakse .Häi tuli elämäh Korbiselläle oman akanke 1990-vuozil .Mies vastai gostii hyväl mielel .
– Lapsusaijas minunigäzet kučuttih minuu Timohpielan Vovakse .
Ven’akse kylän nimi on Timofejevo pole .Enne oldih huutorat , a sit net yhtistettih da rodih yksi Korbiselgy .Huutoroin erähis kodilois vie aluskivet jiädih , sanelou Kuz’mič .
Omamualazet pietäh Kuz’mičua erinomazennu .Rahvahan mieles mies ei kieldävy :
– Minun buabo Jevdokija Kondratjevna oli kuulužannu heinil parandajannu , eli Mikkilis .Rahvas händy tundiettih , häi piästi ristittyzii eri taudilois .Konzu buabo oli kuolemas , häi andoi minule kai omat tiijot heinih nähte da vie yhten neron – minä näen ristikanzan hengellizet da fiizizet kivut , sellitti Vladimir .
Enne suamah abuu paikallizeh parandajah käydih omat da vierahat rahvas .Mies avvutti kaikile , nygöihäi jo ei paranda .Häi saneli oman peittomielen : ristikanzat , kudamat suututtih hänen piäle , puututtih hädäh .
Tottu sanuo , Kuz’mič on ystävälline , pagizii da rahmannoi mies .Kylän vahnimannu olles häi tuttavutti gostii Korbiselgäh .Kyläs yhtes agjaspäi toizeh piäzet viijes minuutas .Lyhyöl ekskursien aigah häi saneli kylän eläjis , musteli endisty aigua , ozutti kylän piänähtävyksen – kaksikerdazen karjalazen taloin , kudamal on enämbi sadua vuottu .A vot vahnua časounua kyläs jo ei ole .Enimite Kuz’mič ylbeilöy omua järvie :
– Vezi meijän järves on vilu kezälgi .Sit on äijy silmykaivuo .Järveh ei virdua ni yhty ojua , a järvespäi virduau yksi ojaine .
Kylän vie eräs eläi advokuattu Sergei Bel’agov panou merkile , ku kylän rahvas lujah pyzytäh toine toizes da puhutah yhteh hiileh .Rahvas yhtes pietäh kyläpruazniekkoi – kezäl varustetah stolan keskikyläh .Talvel hyö yhtes suomitah lundu , maksetah den’gua traktoristale , ku häi luadis tien kylässäh leviembäkse , ku kyläh piästäs skoroi da tulipalomašin .Nygöi heidy yhtistäy vie yksi hommu – eläjät tahtotah suaja Korbiselläle endine stuatussu – ku se ei olis territorija , vai olis kylä .Sih niškoi Sergei Bel’agov on työndänyh kirjazen Karjalan tazavallan , Priäžän piirin da Jessoilan kyläkunnan piämiehile .Paiči kylän stuatussua Sergei kyzyy azettua juamal tiešuaran tiemerki da suaja Korbiselgäh pihatulet .
Korbiselgy on kylä!
Livvi
New written Livvic
–
–