Texts

Kun lähettih ristileipie kantamah

March 26, 2024 in 12:41 Нина Шибанова

created the text
created the text translation
created the text: Kun lähettih ristileipie kantamah nin otettih leipä ta pantih šuolua ta šiitä pantih ristimuamolla räččinä tahikka peretnikkä. Tahi kellä oli enämpi mistä panna ni se pani ihan kostoh soate. Siitä ristimoamolla annettih ta siitä jalkah kumarrettih. Yškäh heitettih ristimoamolla ta šiitä jalkah kumarrettih: ristileivät ota vaštah! — No ristimoamo otti ne vastah. Siitä ristimoamo vastai suuremmalla mitalla, enämmän se sieltä lahjoa vastah anto. Se anto kostuo ta räččineä ta peretnikkeä ta paikkoa ta... Ristitoatolla kannettih paitavoate tahi puksuvoate tahi mitä semmoista. — Mimmoni se ristileipä oli? Se oli tavallini leipä, niinkun Karjalassa leivottih semmoini. — Oliko siinä ristileivässä mitänä ristie näkösällä? Olihan siinä semmosella päriellä tahi sul’ččinalassalla paineltu ristih, jotta siih tuli niinkun verkon silmät. — Voitihko ristileivät kantoa semmoisella ken ei ollut lasta ristieissä pantu ristitoatoksi? Voitih kantoa. Jos sattu ninkun keltä ristitoatto eli ristimoamo kuolomah tahikka mäni loitommaksi jotta ei voitu kantoa ristileipie, nin ketä himotti siitä ristitoatoksi niin se siitä ristitoatoksi tahi ristimoamoksi nossettih. Ta kannettih siitä sinne ristileivät.