Texts
Return to list | edit | delete | Create a new | history | Statistics | ? Help
Norišt da sport
Norišt da sport
Veps
New written Veps
Redukus
Petroskoin suomalaiž-ugrilaižes školas mäni koumanz’ valdkundaline oppindkonferencii , kudamb oli omištadud karjalan da vepsän kirjkelen päiväks .Neciš ”Kodima ”-lehtesen nomeras mö tahtoim ezitada konferencijan ühtnikoiden kaks’ tedotöd .Meletam , miše nene tedotöd oma aktualižed .
Minä olen Mikit .Opendamoi suomalaiž-ugrilaižes školas , kümnendes klassas .Tahtoin starinoita sportan polhe norišton keskes .Meletan , miše nece om tarbhaine elon azj .Sportčasud vahvištoitaba kut mehen tervhut , muga čomut-ki .
Minun täht sanad ”norišt ” da ”sport ” oma lujas tarbhaižed .Mitte om sportan painastuz norišton päle ?Starinoičen necen polhe .
Sportan znamoičend oli sur’ mehiden elos endevanhoiš aigoišpäi .Ende mehed ühtniba olimpiadoihe , i niiden znamoičend oli mugažo sur’ .Olimpiadoiden aigan ei olend voinid-ki .Ezmäine sportolimpiad oli Grekanmas .Tulijal aigal olimpiad linneb Soči-lidnas Venän mas .Minä meletan , miše meiden sportmehed voiba sada surid satusid .
Sportas om likundpainastust da hengišt painastust ristituhu .
Nügüd’ mal om äi erazvuiččid sportladuid .Kaikuččel sportladul oma ičeze voibištelendholitajad .Sportladuihe mülüba mäčvändod (jaugmäč , jämäč , käzimäč , puzumäčvänd , tennis i toižed ), motosportladud ( avto - da motovoibištelend ), atletik (joksend , hüppind , likundkalud , likundelend , voibištelend , akrobatik , ujumine ).
Karjalan armhad sportladud oma suksed , štargud .Minä olen mel’dünu suks’sportaha , sportatan suks’voibištelendaha .Nece om lujas mel’he minei .
Meletades minä el’genzin , miše mehed ei tahtoigoi nügüd’ holitada ičeze tervhut sportan abul da kävutada tervhen elon ladud .Om žal’ , no hö kävutaba paksus erazvuiččid himižid segoitusid , zellid .
Sport – nece om kaikuččen mehen azj .Minä meletan , miše nece om kaikuččen mehen elon jagamatoi pala .Se andab jogahižele ristitule ihastust da hüväd mel’t .Sportas takaid sada vägestust , ühtneda sportvoibuihe , ozutada hüvid , znamasižid satusid .
Minä kävelen kaiken sportharjetusihe ihastusenke da tahtonke !Minun täht nece om mugoine sija , kus minä voin päzuda kaikišpäi problemoišpäi , radoišpäi .Völ homaičin , miše sportharjoituz om čoma abunik stressaspäi .Erazvuiččed hibjan kibud likundoiden kävutandaspäi vai likundväzund om arvostadud .
Sportharjetused otaba äjan aigad , väged da energijad , no tegeba ajan hüväd .Tedat-ik tö , miše tedo om todištanu – mez’ , kudamb sportadab , kehitoitab likundkazvatust da hengišt kehitoitust , kazvatab , libutab korktembale pordhale ičeze intellektad .Sport om sidotud kinktas meiden tervhudehe , se om meiden sebranik !Meile kaikile pidab takaida kazvamaha hengel da paremboitmaha ičemoi sportmahtoid .Nece abutab sirttas edehepäi .Sen täht minä navedin sportata !Minai om äi medalid da lahjoid sportsatusiš .
Tedotön pätegend om sidotud küzundlehtesehe , kudamban minä jagoin minun ühtenklassnikoiden da ühtentoštkümnen klassan openikoiden keskes .Kaiked oli nel’l’kümne seičeme mest .Küzundlehtesen tedod abutiba tehta ühthevedoid sportaha sidotud azjoiš .
Küzundlehtesiden tedoiden mödhe voin sanuda , miše enamb pol’t vanhembiden klassoiden openikoid sportadaba vai el’gendaba , miše pidab sportata da eläda tervhen elon ladun mödhe .Nece om hüvä !
Meiden valdkundas nece 2009.voz’ om norišton voz’ .Voib olda , nügüd’ valdkundaližed pämehed tegeškaba enamba norišton täht da sportan kehitondan täht norišton keskes .
Minä navedin sportata , sikš minei oli mel’he lugeda , kirjutada , tehta prezentacijad sportas .Minä opendamoi suomalaiž-ugrilaižes školas i opendan vepsän , suomen da anglian kel’t .Parembad minun kelen satused oma vepsän keles , sikš starinoita-ki sportan polhe vepsän kelel om melentartuižemb .
Norišt da sport
Veps
New written Veps