Texts
Return to list | edit | delete | Create a new | history | Statistics | ? Help
Al’ona Jegorova. Pedagogine praktik školas
Al’ona Jegorova
Pedagogine praktik školas
Veps
New written Veps
Kaikuččen
üläopenikan täht jäl’gmäine opendusen voz’kurs om kaikid tärktemb i kaikid znamasižemb , ku rindatada toižiden openduzvozidenke .Jäl’gmäine voz’kurs znamoičeb ezmäi kaiked valdkundan ekzamenad , diplomtön kirjutandad i polestamišt da diploman samišt .Sen-žo aigan joga üläopenikale tabrbiž pätta , midä tehta edemba , kut eläda , kus rata , ved’ vessel opendusen aig lopiše jo lujas pigai .
No neniden suriden azjoiden ližaks äjil Petroskoin universitetan üläopenikoil videndel voz’kursal sügüzel om völ pedagogine praktik školiš , sikš ku universitetan lopindan jäl’ghe pästnikad voiba rata mugažo opendajin-ki , a sihe ezmäi tarbiž opetas .
Baltianmerensuomalaižiden keliden da kul’turan tedokundan üläopenikad lähteba tobjimalas mugoižele praktikale Petroskoin suomalaiž-ugrilaižehe školha , kus hö voiba olda suomen , vepsän vai karjalan kelen opendajin .Školas üläopenikoid varastaba lujas hüväd i südäimeližed opendajad , kudambad abutaba heile tahtonke i kaiken hengenke opendamhas olda opendajan , tehta urokoid hüvin da löuta ühthišt kel’t lapsidenke .Vepsän kelen üläopenikoile hüvän abunikan om kaiken Nadežda Anatoljevna Kukojeva , školan üksjaine vepsän kelen opendai .
Vaiše praktikan aigan el’gendad , mitte jüged azj om opendajan rad .Miše olda hüvän opendajan ei täudu vaiše navedida ičeze predmetad da armastada lapsid , tarbiž völ olda melentartuižen i lahjakahan ristitun , kudamb voib tehta čomid i melentartuižid urokoid , voib sel’genzoitta hüvin kaik azjad , voib mel’dütoitta lapsid da pidäda heiden homaičust kaiken aigan .Üläopenikoile , kut todesižile opendajile , tarbiž lujas äjän rata joga urokan täht : pidab kirjutada ičeleze erazvuiččid tegendoid da tekstoid , meletada , kut tehta oikti urokan , miše kaik oliži sidotud urokal da seižuiži oiktas jäl’genduses , da völ-ki pidab tehta sidä muga , miše lapsed ei väzuiži urokal da saižiba miččid-ne tedoid urokaspäi pähä .
Tarbiž völ tehta äi radod urokoiden-ki ližaks : pagišta lapsidenke klassan časuil , pirtta seinlehtesid , vedäda openikoid muzejoihe , teatroihae koncertoihe vai völ kuna-se , tarkištada lehtikoid da päivkirjoid , tehta openikoiden täht melentartuižid tedovändoid , vaumita lapsid erazvuiččihe konkursoihe da äi tošt-ki .
No kaiked jügedamb azj üläopenikoiden täht ( i kaikiden noriden opendajiden täht ) om löuta ühthišt kel’t kaikuččen lapsenke , tehta muga , miše openikad kundližiba sindai , tuližiba sinun urokoile tahtonke , da miše heil oliži melentartust opeta sinun predmetad da pagišta sinunke .Ani sišpäi rippub-ki , kut mäneb sinun praktik , da miččid tundmusid da johtutesid sinai jäb .
Miše sada satusid praktikan aigan jogahine üläopenik mänetab ezmäks äi vägid da nervoid .No meletan , miše ei voi opetas nimiččehe radoho hüvin necitä .Sikš voib sanuda , miše hot’ školpraktik om-ki jüged azj , se om mugažo i lujas tarbhašt tulijoiden opendajiden täht .Ved’ sen aigan üläopenikal om voimust olda opendajan roliš , tedištada , mitte nece rad om – olda hüvän opendajan , da el’geta , voiži-k hän sidoda ičeze elon neche radoho .Kel-se praktikan aigan oli jügedusid , i sikš hän nikonz ei tahtoškande mända opendamha lapsid .A kenele-se praktik tuli mel’he i eskai oli žal’ , miše se lopihe .Voib olda , mugoižiš üläopenikoišpäi tuleba jo pigai nored i hüväd suomen , vepsän da karjalan kelen opendajad , kudambad mugažo sündutaškandeba openikoil melentartust nenihe kelihe da abutaškandeba nenile kelile kaitas lapsiden henges .
Pedagogine praktik školas
Veps
New written Veps