Texts
Return to list | edit | delete | Create a new | history | Statistics | ? Help
Šallun Anni. Sanasuarele käynnyh rahvas. 3
Šallun Anni
Sanasuarele käynnyh rahvas. 3
Livvi
New written Livvic
I
lmovoi tukku karjalastu sananpiädy on kiini ristikanzas , hänen ruadolois da suitettulois nerolois .Ristikanzan luondeh , taba , hänen nerot ollah rahvahan ynnälline folosoufii .Sanasuarele käynnyh rahvas -rubriekas juohattelemmo vai erähii , vai pienen vuitin suurdu kieliuarrehtu .
EI OLE YKSIPUOLISTU HYVIÄ , NI YKSIPUOLISTU PAHUA
Ristikanzua karjalazet kuvaillah ylen syvästi kui hyväs , mugai pahas puolespäi ."Yhteh pereheh vobi rodiekseh kui obliekkulaudua , mugai šittulabjua ", sanotah viizahasti da kohti . Ristikanzu , kudamal on hyvä , pehmei luonneh , sanotah hyväluondozekse , kudamal on kova luonneh , sanotah pahaluondozekse .
- Evle yksipuolistu hyviä , ni yksipuolistu pahua . (Jogahizes ristikanzas on kaikkie ).
- Hyvä taba elättäy , paha kuolettau . Paha taba – terveh hädä .Kel on kovahko syväin , sil ei ole nimidä hyviä .(Hyvä ristikanzu hyvin eläygi , pahaluondoine ičel pahua luadiu ).
- Taba nouzou . (Tabavuu ).
Ristikanzu vobi olla pehmei , helly , hellyluondoine , hembei .
- Vačču on pehmei da sebo ies . (Karjalazen tundiet lähtietäh vačaspäi . "Läbi vačas meni ", "vaččua tuskuau ", "yksi vačču tiedäy ").
- Taba on kodih roinnuhes . (Ristikanzan taba , luonneh työndyy omas kois , omis vahnembis , ei vierahispäi ).
- Hyväh sanah leppy langieu , pahah sanah paivu katkieu . (Sana äijän maksau , sille on vägie parembah dai pahembah päi ).
- Muailmu hyvän mieron vuoh pyzyy . (Hyvä voittau ).
NÄYKÄTÄ SANAL PIDÄY
MALTUA
Yhtelläh puaksuh karjalazet sananpiät ollah vasturiidaizet .Erähis ristikanzan hyviä luonnehtu kiitetäh , erähis pietäh valehennu puolennu .
- Kenen taba pehmevin , segi hambahih . (Pehmeiluondoine ei voi omua iččie puolistua , händy on helpombi voittua ).
Ristikanzua , kudamal on oma nägeväine taba , midä häi ozuttau toizile , sanotah omačottaizekse , omanenäizekse , omapäizekse .
- Jogahizel on nenä da nenäs kaksi loukkostu . (Neniä myö nagyy taba . "Nostua nenä ").
- Häi vai omua viildäy . Häi vai omua ongittau da viluu hengittäy .(Yksikai ruadua omua ).
- Endine merras , huavoine kaglas . (Ei muutu , yksikai rubieu omua ruadamah , endisty ).
- Hänel sentäh poudu peräl on . (Hänel on yksisama ).
- Mi on libunuttu , se on azetunnuttu . (Joga pahale dielole tulou loppu , ei sua libuo rajattomasti ).
- Nälgy reboin ridah ajau . (Suuri hädä ristikanzan vällendäy pahah dielossahgi ).
- Yksi on sumčal suuri , toine kontil korgei . (Löyhketäh toine toizen ies ).
- Eliä kolmen koin korgevuol . (Eliä sluavakkahasti , bohatasti ).
- Eigo nygöi rahvas varata ni riähkiä , ni ruohkua . (Vällilizet rahvas nygöi ollah , ei varata nimidä ).
- Viizahuttu ku et vikeldynne , ga prostovuttu et propadi . (Parembi on olla prostoi , migu viizas ).
- Kelle käis , sille kärzäs . (Ken midä eluo ižändöiččöy , sanommo , ruadokohtas , sidä eluo on tagangi . Sanotah myös varrastandois ruadokohtas ).
- Hänel on huigei hurstis , riähkät – räččinäs . (Nimittumua huigiedu ei ole , ei varua huigiedu . Täs verdaillah intimizih yhtehmenendydieloloih ).
- Parembi on nagrajan suuh kaččuo migu itkijän . (Vesselän da nagrajan ristikanzanke on parembi olla ).
- Yhtel suul itket dai nagrat . (Elaijas on kaikkie , itkuu dai nagruo . Ristikanzal kai net pidäy kestiä ).
- Jogahine omua venehty tervuau . Jogahizel kämmenet ollah iččieh päi .(Ristikanzu ezmäi omua puoldu kaččou , omua hyödyy eččiy ).
- Julgien luut , viizahan – jället . (Julgei vobi terväh kaduo , viizas nenga ruadau , ku vai jället jättäy , iče piäzöy ).
- Kondii hozi vägevy ollou , ga hänen tal’l’al muatah . (Vägeviägi voibi voittua ).
- Liigu parzi seinäs . (Sanotah ristikanzas , kudai liigua pagizou , kielii kandelou ).
- Mittuine ristikanzu meččäh lähtöy , moinegi puu vastah tulou . (Ristikanzua myö hänen ruavot , tevokset dai tulokset ).
Ynnälline termistö sanondua löydyy huiguajan perze-sananke :
- Sada sarkii , tuhat turkii , a pellol mendyy perze avvoi .(Liijan hyväkse menii , liigua löyhkäy , a iče nagrettavu on ).
- Uuzi on ul’l’as , ga perze on pal’l’as . (Liigua löyhkäy ).
- Perze yldyi sinnesäh , ga ei syö ni ahvenen möykkyy (Libunuh , vällilline ristikanzu ).
- Mi mieleh juohtuu , se perzieh karahtah (Kebjeimieline . Ei abrikuiče omii ruadoloi putilleh , kiirehtäy ottavuo ).
- Ollou perze laučal , sit rodieugi vezi staučas . (Pattiel ei rodei midä syvvä ).
Karjalazien sananpiälöis suau löydiä ristittyzien kai valehembat dai vägevembät puolet .Jogahizel pienel šeikkaizelgi maltettih löydiä pädevät sanat , kačottih kriittizesti ristikanzan oman ičen vietändäh da elaigah ."Näykätä " toine tostu sanal on suuri nero .
(On kerätty karjalan rahvahan fol’klouran mugah , "Oman Muan " toimitukses olijoi materjua loi myö ).
Taloi salos
Sanasuarele käynnyh rahvas. 3
Livvi
New written Livvic
-