Texts
Return to list | edit | delete | Create a new | history | Statistics | ? Help
Aleksejeva Maria . Pereh, miččes eläb armastuz
Aleksejeva Maria
Pereh, miččes eläb armastuz
Veps
New written Veps
Nece voz’
Venämal nimitadihe "Kanzan vodeks ".Sikš tahtoižin starinoita teile kanzas , mitte tegihe ozuteseks minun täht da miččes jo lujas äi vozid eläb sur’ armastuz .
Om melentartušt , miše vepsän keles om kaks’ sanad ühten znamoičendanke : "kanz " i "pereh ".Molembad sanad oma čomad , lämäd da kuti pehmedad .Minun kodipaginas (pohjoižvepsän ) pereh-sana ottas paginaha paksumba .Siš süspäi nügüd’ starinoičen minun baboin da dedoin perehes .
Minun baboid kuctas Valentina Jakovlevna Kočerina (norudes Jeršova ).Hän om sündunu čomas penes vepsläižes Toižeg-küläs .Sigä-žo om sündunu minun dedoi-ki , Leonid Kuz’mič Kočerin .Dedoin pereh oli sur’ : Anastasia-mamoi , Kuz’ma-bat’ da koume velled – Ivan , Vladimir i Anatolii .Kuz’matatoi oli partizanan da koli Sures voinas , Anastasiamamoi kazvati poigad üks’näze .Oli jüged , no hän oli vägekaz i kaik nel’l’ poigad kazvoiba hüvikš ristituikš .
Baboin pereh ei olend sur’ : Jekaterina-mamoi , Jakov-tatoi da Faina-sizar .Baboin tat mugažo koli voinas – siloi baboi oli penikaižen neičukaižen .
Kut dedoi , muga baboi-ki oliba voinan lapsed , no , kacmata sihe , molembad napriba olda vesläd da navedida elod eskai jügedoil aigoil .
Mäniba voded , i kaik ozaižihe muga , miše Valentina da Leonid tegiba perehen , lendiba suren kodin Toižeges , äjan radoiba .Perehes om koume poigad : Aleksandr , Jurii da Aleksei .Kaik poigad oma korktad kazvol , čomad i radonnavedijad , i kaikutte sauvoi ičeze perehen .Aleksandral om Jelenaak da kaks’ tütärt – Jekaterina i Darja .Jurijan kanz om sur’ : Ol’ga-ak da poigad Sergei , Art’om i Jurii .Aleksejal (minun bat’al ) om Nataliaak da kaks’ tütärt – Arina i minä , Maria .
Mö kaik , seičeme vunukad , kaiken aigan naprim abutada baboile da dedoile , paksus tuleskelem adivoihe , vändim ühtes kartoihe da dominoho .Baboinno da dedoinno mänetadud aig om läm’ da čoma .Nügüd’ kazvab uz’ki sugupol’v – pravunukad , kudambad mugažo abutaba da armastaba Valentinad i Leonidad .Kaiked pravunukoid om jo viž : Nast’a , Timoša , Jegorik , Matvei da Aleksandra – i nece ei ole lop !Pereh kazvab .Minai-ki om uništuz , miše meiden lapsed mäneškandeba baboin da dedoin adivoihe .
Naku kut vaiše kaks’ mest voi tehta mugoižen suren perehen , mitte kazvab da kazvab .Meletan , miše kaikile nece om hüvä ozutez siš , miččen pidab olda perehele .Valentina da Leonid oma ühtes jo enamba 60 vot , no perehes tähäsai eläb armastuz , kožmuz da čoma il’m .
Hot’ minun baboi da dedoi oma vanhad i kovad tervhut heil jo ei ole , hö molembad oma kuti nored : vesläd , čomad da radonnavedijad .Tahtoižin , muga oliži völ äi vozid .Toivotan teile , baboi da dedoi , tervhut i pit’käd igäd !
Pereh, miččes eläb armastuz
Veps
New written Veps