Texts
Return to list | edit | delete | Create a new | history | Statistics | ? Help
Melhisedek, suari da pappi
Melhisedek, suari da pappi
Livvi
New written Livvic
1 Se
Melhisedek oli Saliman suari da Ylimäzen Jumalan pappi . Konzu Avraam oli tulemas toraspäi , kus häi voitti suariloi , Melhisedek tuli hänele vastah da blahoslovii händy , 2 i Avraam andoi hänele kymmenenden vuitin kaikes torasualehes .Melhisedek on enzimäzikse "oigevuon suari " – sidä merkiččöy hänen nimigi – a vie häi on Saliman suari libo "rauhuon suari ".3 Hänel ei ole tuattua , eigo muamua , eigo rodulangua , hänen päivil ei ole alguu , eigo elaijal ole loppuu . Häi on papinnu ilmazen ijän , muga kui Jumalan Poigu .
4 Kačokkua , mittuine Häi on suuri ! Iče tuattoloin tuatto Avraam andoi Hänele kymmenenden vuitin parahis torasualehis .
5 Niilöil Leevien poijil , kudamii on pandu pappiloikse , pidäy Zakonan käskyn mugah ottua kymmenes vuitti rahvahan elolois , omien vellien elolois , hos net velletgi ollah Avraaman jälgeläzet .
6 No Melhisedek , kudai ei olluh heijän roduu , sai kymmenenden vuitin Avraaman sualehis dai blahoslovii Avraamua , kudai jo oli suannuh Jumalan uskalmon .
7 Kiistämätöihäi on se , gu suurembi blahosloviu pienembiä .
8 Enzimäzes kohtas kymmenenden vuitin otetah kuolijat papit , a toizes kohtas kymmenenden vuitin ottau se , kudamah näh Pyhät Kirjutukset sanotah : Häi eläy .
9 Voibi sanuo , gu Leeviigi , kudai ottau kymmenenden vuitin kaikes , iče andoi Avraaman kauti kymmenenden vuitin omis elolois . 10 Häi vet oli vie ezituatan Avraaman sydämes , konzu Melhisedek tuli Avraamale vastah .
11 Ga sit gu leevieläzien pappiloin ruado – kudamah näh Izrail՚an rahvahale annettih käskyt Zakonas – ollus kaikis puolis hyvä , mikse sit pidi paista toizenjyttymän papin nouzendas , moizen kui Melhisedek , a ei kui Aaron ?
12 Konzu muuttuu pappiloin aigu , Zakonalgi pidäy muuttuo .
13 Se , kudamah näh täs on pagin , kuuluu toizeh rodukundah , kudamas niken ei sluužinuh altaris .
14 Tiettäväinehäi on se , gu meijän Ižändy on lähtenyh Juudan rovus , kudamah niškoi Moisei ei sanonuh nimidä , konzu pagizi pappiloih näh .
15 I tämä rodieu vie äijiä selgiembi , gu tulou toine pappi , moine kui Melhisedek , 16 kudai roih papikse ei rodulangan periä , kui käsköy Zakon , a sen elaijan väis , kudamal ei ole loppuu .
17 Häneh näh sanotah Pyhät kirjutukset : "Sinä olet pappi ilmazen ijän , moine kui Melhisedek ".
18 Nenga kumatah aijembaine Zakonan käsky , gu se oli väitöi da hyövytöi , 19 – eihäi Zakon voinnuh loppuh suate täyttiä nimidä . No sen Zakonan käskyn sijah tulou parembi – nad՚oužu , kudaman vuoh myö lähenemmö Jumalah .
20 Pidäy mustua vie Jumalan annettu luja sana . Leevieläzet , tiettäväine , roittih pappiloikse ilmai Jumalan lujua sanua , 21 no tämä toine rodih papikse Jumalan lujal sanal : – Ižändy andoi lujan sanan i ei žiälöiče : Sinä olet pappi ilmazen ijän . 22 Tämä Jumalan luja sana ozuttau meile , kui äijiä lujembi on se sobu , kudaman tagan on Iisus .
23 Niilöi toizii pappiloi oli äijy , gu surman periä papit muututtih . 24 No Iisus pyzyy papinnu ainos , gu Häi eläy ilmazen ijän . 25 Sendäh Häi voibi ainos piästiä kaikes pahas niilöi , kudamat Hänen kauti tullah Jumalan luo . Häi eläy ainos , gu moliekseh heijän puoles .
26 Moine ylimäine pappi meile pidäygi : pyhä , vijatoi , puhtas , eroitettu riähkähizis da ylendetty korgiembale taivahii . 27 Hänel ei pie kui toizil ylimäzil pappiloil joga päiviä tuvva žertvua , enzimäi omien riähkien täh , sit rahvahan riähkien täh . Häi sellitti sen dielon yhten kerran ilmazekse ijäkse , konzu andoi iččie tapettavakse rahvahan riähkien täh .
28 Zakonhäi panou ylimäzikse pappiloikse ristikanzoi , kudamat ollah väittömät , a Jumalan luja sana , kudai tuli Zakonale jälles , pani sih kohtah Poijan . Häi on kaikelleh hyvä ylimäine pappi ilmazen ijän .
Melhisedek, suari da pappi
Livvi
New written Livvic