Texts
Return to list | edit | delete | Create a new | history | Statistics | ? Help
Semoi Räpin . Pyhän Jumaldoman Kazanskoin obrazan pruazniekku
Semoi Räpin
Pyhän Jumaldoman Kazanskoin obrazan pruazniekku
Livvi
New written Livvic
Kallistu
kirikkö-pruazniekkua Kazanskoidu pietäh 4.kylmykuudu .Pyhän Jumaldoman obrazu jiävihes Kazanin linnas vuvvennu 1579.
Kezäkuun 28.päivänny 1579 pyhän Tuulan Miikulan kiriköllyö sytyi suuri tulipalo .Tuli hävitti aiga suuren ozan linnua da polti tuhkakse puolet Kazanin Kremlii .
Kodvazen mendyy linnua ruvettih nostamah uvvessah .Yhtes toizienke tulipalos koin menetännyzienke sen kohtan lähäl , kus tulipalo sytyi , ambuju Daniil Onučin nosti uuttu kodii .Hänen yheksävuodizele Matrona-tyttärele unis tuli Jumaldom da käski nostua muaspäi Hänen obrazan , kudaman pravoslavnoih uskoh peitoči uskojat havvattih muah vie isluamielazien vallan aigua .
Ga neičykän sanoih ni korvua ei kallattu .Jumaldom tuli kolme kerdua da ozutti kohtan , kus on peitetty čuvvonluadii obrazu .Jälgimäi Matrona yhtes muamah kel ruvettih kaivamah muadu sit kohtas da löyttih pyhän obrazan .Diivittävän lövvön kohtale pappiliston kel tuli arhijepiskoppu Ijeremija .Häi vedi pyhän obrazan lähimäzeh pyhän Miikulan kirikköh .Siepäi moleibenan piettyy obrazu Ristukierros kannettih Kazanin enzimäzeh pravoslavnoih jumalantaloih – Blahoveššen’n’an kirikköh , kudaman nosti suari Iivan Julmu .Ristukierron aigua tervehtyttih kaksi sogiedu – Iosif da Nikita .
Kazanis löytyn obrazan koupii , kerdomus obrazan löydämizes da čuudolois työttih Moskovah vuvvennu 1579.Suari Iivan Julmu käski nostua kirikön Jumaldoman Kazanskoin obrazan jiävindän kunnivokse sil kohtua , kus löyttih obrazu , da panna sinne obrazu da perustua naizien manasteri .Matrona da hänen muamah , kuduat löyttih pyhän obrazan , mendih sih manasterih manuahoikse .
Pienehkö obrazu , kudaman Matrona-tyttöine löydi eiven’alazel reunualovehel , kudai ei ammui oli liitetty Ven’an suarikundah , terväh rodih kogo Ven’an rahvahan pyhäkse uardehekse .Se rodih Jumaldoman Taivahallizen pokrovan , vardoičuksen merkikse , kudai oli jiävitty kogo Ven’an Kiriköle , sendäh gu pravoslavnoin rahvahan syväin tunzi , kui Puhtas Herru eri taval yhtyy Kodimuan istouriellizeh ozah .Äijän kerdua "Kazanskoi muatušku " ozutti pravoslavnoloile sodamiehile matkan voittuo kohti , konzu hyö täytettih armiessluužinduvelgua Jumalan da Kodimuan ies .
Moskovan da Ven’an piäständy pol’akois vuvvennu 1612
Jygiel aigua , konzu Moskovan valloitettih pol’akat , a muan eri kohtis oli riidua da hävitysty , pyhä Jermogen kiini olles sai peitonpolkah työndiä Ala-Novgorodah kehoitussanan : "Kirjutakkua Kazanih mitropoliittu Jefremale , anna työndäy bajariloilluo polkih da kazakoin sodajoukkoh opastuskirajzen , ku hyö lujah pyzyttäs oman vieron puoles , azetettas kiškondua , oldas ielleh toine toizele vellet , da kui on uskaldettu andua omat henget Puhtahan koin puoles , čuvvonluadijoin da vieron puoles , mugai ruattas .Kirjutakkua kaikkih linnoih , kaikkiel paiskua minun nimes ".Alanovgorodalazet vastattih patriarhan kučundah .Kerätyn nostoväin piälikökse rodih kniäzi Dmitrii Požarskii .
Nostovägeh liittynyöt Kazanin nostovägijoukot tuodih keral Kazanskoin čuvvonluadijan obrazan koupien da annettih se kniäzi Dimitriele Jaroslavl’as .Pyhä Jumaldom rubei vardoiččemah nostovägie .Hänen puolistuksel oli piästetty Ven’a .
Kolmepäiväine pyhä da ahker malittu Jumaldoman Kazanskoin obrazan ies suadih Herran armon .Kierretys Kremlis sil aigua oli plenas Gretsiespäi tulluh arhijepiskoppu Elassonan Arsenii , jällespäi häi rodih Suzdalin arhijepiskopakse .Arsenii oli äijäl voimatunnuh tuskan da pahanmielen periä .Yöl pyhän Arsenien kel’l’as rodih ylen valgei .Se oli Jumalan valgei .Häi nägi prepodobnoin Sergien Radonežskoin , kudai virki : "Arsenii , meijän malitut on kuultu ; Jumaldoman hyvyös Jumalan suudo Kodimuas on armolline ; huondeksel Moskovu on kierdäjien käzis da Ven’a on piästetty ".
Buitegu ennustuksen tovestuksekse arhijepiskoppu pareni .Pyhä työndi viestin täs ilotapahtumas ven’alazile sodamiehile .Tossupiän , 22.ligakuudu 1612, innostunnuot ven’alazet sodajoukot suadih suuren voiton da valloitettih Kitai-linnan , kahten päivän peräs – Kremlin .
Pyhänpiän , 25.ligakuudu , ven’alazet nostovägijoukot astuttih ristukierros Kremlih , heil keral oli Kazanskoi obrazu .Ruskien lagevon keskel ristukierron vastai Kremlispäi lagevole tulluh arhijepiskoppu Arsenii .Häi kandoi Jumaldoman Vladimirskoidu obrazua , kudamua pidi ruokos kiini olles .Rahvastu liikutti Jumaldoman kahten čuvvonluadijan obrazan vastavundu .Ristittyöt kyynälsilmis molittihes Taivahallizele Puolistajale .
Moskovan pol’akois piästämizen mustokse piätettih pidiä eri pruazniekku Jumaldoman Kazanskoin obrazan kunnivokse 22.ligakuudu libo 4.kylmykuudu uvven aijanluvun mugah .Enzimäi tädä pruazniekkua piettih vaigu Moskovas , vuvves 1649 lähtijen sidä ruvettih pidämäh kogo Ven’al .
Vuvvennu 1709 Poltavan torua vaste Pedri Suuri yhtes oman sodajoukon kel pani malittuu Jumaldoman Kazanskoin obrazan ies .Vuvvennu 1721 Pedri toi Jumaldoman Kazanskoin obrazan yhten koupien Moskovaspäi Piiterih .Sie obrazu enzimäi pandih časounah , sit – Aleksandru-Nevskoih Lavrah .Vuvves 1737 se on Suurenpruazniekan (Jumaldoman roindan ) kirikös Nevskoil prospektal .Vuvvennu 1811 Ižänmuallistu voinua vaste taivahallizen Puolistajan pyhä obrazu viettih uudeh Kazanskoih kirikköh .
Vuvvennu 1812 Jumaldoman Kazanskoi obrazu vardoičči ven’alazii saldattoi , kuduat vastustettih frantsielazien vägehtungevumizen .Kazanskoin obrazan pruazniekannu 22.ligakuudu 1812 ven’alazet joukot , kudamien piälikkölöinny oldih Miloradovič da Platov , perrettih Davun .Se oli enzimäine suuri frantsielazien häviemine Moskovaspäi lähtiettyy .Vihaniekku kaimai seiččie tuhattu hengie .
Konzu on mitahto hädä libo taudi
Kazanskoin obrazan moniluguzis čuvvonluadijois koupielois ylistetäh Ven’al Puhtastu Jumaldomua , pravoslavnoin ven’alazen rahvahan Puolistajua .Äijien Jumaldoman obrazoin keskes , kudamii kunnivoijah Ven’an Pravoslavnois Kirikös , nikudamua eule muga äijy , kui Kazanskoidu .Sen puoleh kiännytäh puaksumbah kaikkie , konzu on mitahto hädä libo taudi , da kyzytäh : "Ahker Puolistai , Ylimäzen Herran Emä , moli kaikkien puoles Sinun Poigua , Hristossua , Jumalua meijän .Kaikile pädijiä lahjoita da kaikkii piästä , Jumaldom Neičyt , sendäh gu olet Jumalalline pokrovu Sinun orjile ".
Pidäy mustua , ku Jumaldoman obrazan oigei nimi on moine : Jumaldoman Kazanskoi obrazu , ei Kazanskoi Jumaldom libo Vladimirskoi Jumaldom .Sendäh gu Jumaldom meil on vai yksi – Marija-neičyt .
Pyhän Jumaldoman Kazanskoin obrazan pruazniekku
Livvi
New written Livvic