Texts
Return to list | edit | delete | Create a new | history | Statistics | ? Help
Šallun Anni. Sanasuarele käynnyh rahvas. 4
Šallun Anni
Sanasuarele käynnyh rahvas. 4
Livvi
New written Livvic
Prostoit
rahvas paistih prostoidu elaigua pajattajen rouno .Mustattohäi vie vähäzel omien buaboloin da pruavodied’oloin paginua ?
Karjalaine kodi da talovus
Sana suuh ei sula , eigo kivi piendarel kuiva .Täs suatto lugie sanondat , sananpiät da rahvahan nevvot , kuduat koskietah kodidieloloi , kodiväin da kyläläzien välizii suhtehii .Opimmo sellittiä , mindäh karjalazet nenga sanotah .Viizahastihäi ?
- Uvven koin luajindu ei ole kriukkah kižuandu . (Koin nostandu on jygei dielo , ei tyhjy . Pidäy neruo olla ).
- Joga talois omatgi hälyt . Kus syvväh , siegi leikkii lyyvväh .Ei kyläh kuulu , midä kois keitetäh /härčätäh .(Jogahizes kois da perehes omatgi dielot ollah , kudamis kyläs ei tietä , eigo pie tiediä ).
- Taloi kuuluu taivahah , kurren paskua taiginah . (Sanotah köyhäh taloih nähte , kudai buito bohatakse da hyväkse menöy , ei tahto pal’l’astua omua kurjuttu da köyhytty .)
- Kodi suvaiččou skuupan (idaran ), kylä luaskavan . (Nevvo : gostih kävy bohatannu , gostii omas talois gostita putilleh , a iče omas perehes malta eliä siästäväizesti – sit äski eluo rodieu .)
- Ei leibypalazes taloi köyhty . (Malta gostita da syöttiä toizii , älä žiälöiče .)
- Ei ole perti čoma čuppuloil , on piirualoil . (Kodii da koin emändii kačotah syömizii , piirualoi myö . Malta ottua rahvastu vastah .)
- Joga taloin pihas lähtöy dorogu Piiterih .(Kaikkielpäi suau lähtie hozi kunne , kunne vai tahtot . Dorogat jogahizele ollah avvoi .)
- Koin köyhtyttäjes liigu kerdu magua .(Muates da patistujes kodi köyhtyy , tyhjenöy . Talovuttu kunnolleh pidäjes pidäy ruadua .)
- Kyläh lähtijes vero syö kois .(Nevvo : älä ruohti kyläs äijiä syvvä , älä lähte nälgähizenny . Lähtijes syö kois täyzi vačču , a gostis vai palaine .)
- Kois kui tahtot , rahvahas kui käskietäh .(Nevvo : malta olla rahvahas kunnolleh , kui vuaditah .)
- Kolmel koil i hyvä ižändy kaduou . (Ole ižändänny yhtes kois , pie sidä kunnos . Älä ižändöiče enämbiä .)
- Yksi on koil korgei , toine sumčal suuri .(Sanotah ristikanzois , kuduat ainos midägi juatah da kohistah , ga juattavua da kohistavua ei ole nimidä , tyhjät ollah ).
- Hyvä ižändy rien kezäl valmistau , telegän talvel . (Malta valmistua kai ruavot da ruadobrujat ennepäi . Älä jättele jälgihetkeh .)
- Ižändämättömäl koil levo langieu , emändättömäl perti jiähtyy .(Kois pidäy olla ižändy dai emändy vältämättäh , sit äski se dielot kai hyvin ollah ).
- Omas kois seinätgi kumardutah . Omas kois ollah seinät vois .Omas kois vezigi on magiembi .Omas kois i seinät paistah .Oma kodi kullan kallis .Omua kodii armahembua nimidä ei ole .Kodih tulles hebogi menöy kirkiembäh .Meren tagan on lämmin , a kois lämmembi .(Omas kois kebjiembi on olla . Kodi auttau .Vai oma kodi kaikis paras on .)
- Omah kodih kai godih .(Jogahine elo omah kodih pädöy , liigua omas kois ei ole nimidä .)
- Midä meččäh kirguat , sidä kodih kajahtah . (Kui olet da viet omua iččie koin ulgopuolel – rahvahas , kyläs , järvel , mečäs , sidägi sinulles järilleh tulou . Maltat olla hyväzilleh , sit sinulegi da sinun kodih hyvä , et maltane , sit toizin .)
- Mittumat veriät , moizetgi eläjät .(Koin da talovuon kundo nägyy jo pertih tulles . Oldaneh pordahat da veriät pahas kunnos , lahot , sitgi pertit moizet ollah .)
- Parembi mökis ilonke , migu horomois itkunke .(Ei bohatoin elaigu ainos ozakas ole . Parembi on köyhänny olla , ga ozakkahannu .)
- Toizes talois vettygi toizin kannetah .(Joga talois kai dielot omah luaduh ruatah .)
- Kyläs nägyy kynnen moine , kois ei nävy kondien moine . (Konzu paistah toizii , kyläläzii , nähtäh kai valehembat kohtat , a omas perehes olijua ei nähtä .)
- Kodi – korves , elot – oksas , luzikat – luhtas . Sie minun kodi !Kodi koivikos , perti pedäjikös .(Sanotah , konzu ristikanzu ei elä omas kois , tuli jättiä se . Koin tilah jiädih vai korbi , koivut da pedäjät , oksat da luhtat .)
- Terväh täs ei rodei eigo kukoin kuukottajaa , eigo kanan kaakattajaa .(Konzu kylä da koit tyhjetäh , rahvas iäre lähtietäh .)
- Koit dai konnut hyllyös ollah . (Konzu taloi , talovus da pihat ollah pahas kunnos , konzu net jätettih , hyllättih .)
- Kodih tulles nenäkäs t’outa on vuottamas . (Konzu niken kodih tulles jo ei vuota , tyhjy kodi on . Nenäkäs t’outa , vobi olla , on yksinäine päčči .)
Joga dieloh , joga askelel on olluh oma sanondu .Monien tuhanzien karjalazien perehien oza on olluh mennyön vuozisuan aigah jättiä omat koit da konnut .Jälgipolvet nygöigi igävöijäh niidy da žiälöijäh oman rahvahan ozua .
Sanasuarele käynnyh rahvas. 4
Livvi
New written Livvic
-
-
-
-
-
-
-
-
-
-
-
-
-
-
-
-
-
-
-
-