Texts
Return to list | edit | delete | Create a new | history | Statistics | ? Help
L’ubov’ Baltazar. Mies hevol selläs
L’ubov’ Baltazar
Mies hevol selläs
Livvi
New written Livvic
Oli
heinykuun keskipäivän selgei siä .Päiväine pastoi koin ikkunoih , sen periä meijän perti oli vie valgiembi .Vienozes tuules läikyi da läpetti järven pindu .
Koin pihas pehmies nurmikos vierettelih susiedan reppikaži , se ei kehtannuh ni kärbäzii ajella , muite vai kačoi ."Pidäy panna zanavieskat salbah , – juohtui minul mieleh , eiga illal talois roih ylen räkki !".
Ks’uša da Jegor istuttih pertin vilul lattiel telefonat käzis , hyö mollei mielis oldih kustah muijal ."Lapset , terväh rubiemmo syömäh ! Ks’uša da Jegor , hos tuozitto laukkastu murginal !"– käskin lapsii . Ks’uša pani telefonan da lähti pihal .Pikoikodvazen peräs häi jo tuli järilleh pertih da ihastuksis sanoi meile : "Buabo !Jegor !Tulgua teriämbä tänne , meijän pihas on hebo !"."Midä tyttö uneksinnou ! – duumaičin minä , a Jegor iäneh sanoi : "En usko ! Narekohäi sanot !Miksebo kielastelet ?"."Ga sit meijän roih mennä kaččomah !" – sanoin minä Jegoral . Häi laškasti nouzi , da mugai telefon käis lähti pertispäi pihal .
Ehtin vai avata veriän verandal dai kerras minul käzih heityi hevon turbu .Hebo kačoi minuh suuril hyvil silmil .Hebo oli tobju , sen silei vallettavan ruskei nahku oli kui šulkuine .Hebo taputteli buite valgielois kengäzis olijoi jalgazii da lekutteli korvii , min periä turbei kullankarvaine harju liikahtelih da läpetti päivypastos .Hevon selläs istui mies žokejan tozisovis .Mustu šulkuine paidu , kuasku piäs da korgiet nahkukengät – kai ammattiruutat oldih pruazniekan arvohizet .
"Suaugo hebostu silittiä ? Eigo pure ?Suaugo hebostu gostittua ?"– kiistah kyzeltih lapset . "Enne kaikkie suas luadie tervehtys !" – sanoin minä lapsil da nostin silmät mieheh : "Terveh , Iivan !". "Теrveh !", muhahtih mies da jatkoi : "Tämä ei ole heboine , tämä on uveh , sen nimi on Romantiekku ! Paras syömine sil on niityl kazvai vihrei libo vaste kuivattu tuoreh heiny ".
Tiezin , ku hebo on Konoin hieruspäi , sinne Heččulaspäi on kaksi kilometrii välii .Romantik on ainavo hebo , kudai yhtes lähihieruloin eläjienke ruadau kyläruadoloi .
"Mustatgo , Iivan , mi äijy oli hebuo kyläs , konzu myö olimmo pienet ?" – kyzyin minä miesty . "Ga taki mustan ! Dai sen kohtan mustan , kus oli heboloin kon’ušši !".
Iivan sanoi lapsil : "Tiijättögo , ken silloi ruadoi heboloin kaččojannu ?"."Kentah diädö ", kerras vastai Jegor . Myö rubeimmo nagramah , sit Iivan jatkoi : "Sen diädän nimi oli – Mičurinan Iivan-diädö ".Ks’uša kačahtih minuh da kyzyi : "Mičurinan ?Meijän rodn’ugo oli ?"Minä vastain : "Tiettäväine , oli , häi oli minun died’oi , teijän pra-pradied’oi !"– vastain minä .
Lapset vie kodvan oldih Romantiekan rinnal , opittih gostittua sidä leiväl , a Iivan musteli omua lapsusaigua da saneli nuoril , kui hyö brihaččuloinke suvaittih ajella hevon selläs , kui talvel peldoloi myö käydih tuomah heiniä hevosriel .Iivan pagizi karjalakse , minä kuundelin da mielis siirryin sih aigah , konzu kylä oli suuri , ulgonpäi taloloin ikkunoin alle kuivamas riputtih verkot da huonuksis nenäh tuli heinän da šipainiekoin duuhu ...Hevol kynnettih peldoloi , viettih heiniä fermal da maidobitonoi toizih kylih .Heboloil dai kolhozan rahvahal ruaduo oli kylläl .
"Läkkä meijällyö murginal !" – kučuin minä Iivanua . "Passibo ! Eule aigua !Ruaduo on äijy !"– vastai račastai da kiinitti ohjakset . Romantik kodvazen vie taputtelih , kuni kiändyi , sit heilahutti meile händiä da lähti astumah pihaspäi .Sit mies hevon selläs vieldi ohjaksii da hebo kebjiesti lähti juoksemah .
Kačoin kodvan heijän jälgeh , kai ylbevys nouzi ryndähäh : mi on hyvä , ku on vie nengomua miesty , mittuine on Ivan Kirillov , ket mustetah omien tuattoloin da died’oloin eloksentavat !
Ivan Vasiljevič Kirillov , Priäžän rajonan Konoin hierun mies , nygöi eläy Petroskoil , ga ei hylgiä omua roindukyliä .Hänen kois kai on endizelleh , kui oli jogahizes putillizes karjalazes talois : kymmeniene lammastu , on kanua dai hanhie , koza , hebo .Ivan Vasiljevič kazvattau kartohkua dai heiniä žiivatoil , kalastau dai kävyy ohotal .Ga kaikis suurin on se , ku häi on tozikarjalaine mies – hyväntahtoine , pagizii , luja da ruadai !
Mies hevol selläs
Livvi
New written Livvic
Nikitina Lubov
Всадник
Russian
"
"
"
"
"
"
"