Texts
Return to list | edit | delete | Create a new | history | Statistics | ? Help
Šašina Maria . Kitändsanad openikalpäi
Šašina Maria
Kitändsanad openikalpäi
Veps
New written Veps
Opendai
ozutab openikale ted i opendab kävumaha necidme tedme kebnas , ei kukištades , ei lanktes .Opendajan rad om azj , mittušt ei sa tehta tühjal südäimel .Todesine opendai tundeb kaikuttušt last , tedab hänen tedoid da tahtoid , el’gendab hänen mahtoid .Mugoine om minun vepsän kelen opendai Nadežda Petrova .
Kitän Nadežda Anatoljevna siš , miše hän openzi mindai pagižmaha i navedimha vepsän kel’t da meiden rahvast .En manita , ku sanun , miše vepsän kelen urokad oliba armhembad minai da toižil meiden vepsän klassan openikoil .Mö em varaidanugoi urokoid : tezim , miše sigä meid vasttab čoma da läm’ opendajan muhu .I voziš päliči el’gendan , kut nece oli tärged i miččid tarbhaižid jüvid armaz opendai andoi meile siloi .
Nadežda Anatoljevna radab Petroskoin Suomalaižugrilaižes školas Lönnrotan nimel jo 26 vot .Neciš aigas hän openzi enamb 200 openikad vepsän kel’he .Opendajaks hän tahtoi tehtas völ laps’aigal .Hänen melen mödhe , opendajan rad om jüged , no sil-žo aigal se tob äjan ihastust .Kerdan Nadežda Anatoljevna sanui minei : "Kaikutte elorad om jüged .Lekarin rad om jüged , opendajan rad om jüged .No lekarin vigad näguba kerdalaz – näguba mehen tervhudes , a opendajan vigoid kerdalaz ei sa nägištada , niid voib nähtta , konz mäneb lujas äi aigad .Minei om mel’he rata školas , sikš ku kaikuččen päivän , eskai kaikuččel urokal om mitte-se uz’ avaiduz – uz’ avaiduz lapsiš , uz’ avaiduz ičemoi rados ".
Nadežda Anatoljevna tuli Petroskoihe penižes Kurb-küläspäi , mitte sijadase Piterin agjas .Hän lopi opendusen Pedagogižes üläopištos i tuli radmaha školha .Hüväs rados da korktoiš satusiš hän sai äi pauklahjoid da Karjalan arvostadud radnikan rindznaman .
Nadežda Anatoljevna kirjuti äi openduzkirjoid školan openikoiden täht i jatktab necidä radod nügüd’-ki ."Meiden radon augotišes oli lujas vähä materialoid , oli vaiše kirj , miččen vaumišti Nina Grigorjevna Zaiceva , i se oli lujas sur’ , hüvä rad i abu opendajile . Nügüd’ om kebnemb rata , no ved’ vajehtase aig-ki .Nügüd’ lapsed ei tahtoigoi vaiše ištta openduzkirjan sires i kacta .Heile pidab kävutada Internetan resursoid , hö tahtoiba kundelta audiomaterialoid – ei vaiše lugeda openduzkirjad ".
Nadežda Anatoljevna muštab kaikuttušt ičeze openikad .Hän om kosketusiš heidenke eskai opendusen jäl’ges i sab heišpäi äi kitändsanoid ."Kaikuččel vodel oma mugoižed lapsed , kudambad sidoba ičeze elon vepsän kel’he . I konz minä nägen necidä , olen ihastusiš , miše hö toba kelen meiden eloho , kehitoitaba sidä , andaba edemba , ozutaba vepsän kel’t toižile ristituile .Nece om lujas hüvä azj ".
Ozatelen Nadežda Anatoljevnad jubilejanke !Toivotan hänele kaiked hüväd , korktad tervhut , hüvid openikoid da äi väged , miše jatkta tärktad opendajan radod !
Kitändsanad openikalpäi
Veps
New written Veps