Texts
Return to list | edit | delete | Create a new | history | Statistics | ? Help
Uljana Tikkanen. Taitavin pomorilaini eläy Sumašša
Uljana Tikkanen
Taitavin pomorilaini eläy Sumašša
Karelian Proper
New written karelian
Vieristänä
Belomorskissa lopetettih Pomorilaini kaunotar-festivali .Še kešti kakši päivyä ta simvolisešti lopetti Vierissänkešen ajan .Festivalin ošallistujat ta kaččojat čukelluttih omah kulttuurih , luovah ruatoh , naisien pukujen , laulujen ta tanššien kaunehuoh .
PERINTEHIEN ŠÄILYTTÄJÄT
Festivalin järještäjät , Venäjän kulttuuriruatajien luovan liiton pomorilaisen ošaššon jäšenet tahottih koroštua Venäjän Pohjosen perintehien arvuo ta kannattua pomorilaisien kulttuurin šäilyttämistä ta kehityštä .
Festivalin rajoissa oli pietty kilpailu , kumpasešša oli muutoma nominatijo : lapšien kilpailu "Vienanmeren rannalla ", aikuhisien ta lapšien pomorilaisien pukujen kilpailu šekä perintehellisen merkinnän kilpailu .
Festivalin aikana oli näytetty Pomorien muan perintehien šäilyttäjät -filmi .
– Kilpailuh ošallistu 21 henkie ta 12 kollektiivie . Festivalissa myö näkimä Vienanmeren rannikon eri paikkojen perintehie – ošallistujat oltih Kemistä , Belomorskista , Suman kyläštä , Kuolišmašta , N’uhčašta , Arhankelin alovehen Una-kyläštä , Murmanskin alovehen Umba-kyläštä šekä Piiteristä .Kaikin näytettih , mitein kallis pomorilaini kulttuuri heilä on .Lapšien kilpailun finalie šai kuunnella loputtomašti , kuin mukavašti lapšet šaneltih pomorien perintehistä , karbas-venehistä , omista pravoukoista , kumpaset käytih Murmannilla , šelitti Venäjän kulttuuriruatajien luovan liiton pomorilaisen ošaššon johtaja , kantapomorilaini L’udmila Rots .
Kilpailušša oli kakši ošua .Enšin ošallistujat työnnettih puvun valokuvie ta kirjutukšie ičeštä ta puvušta .
POMORILAISPUVUT ON KALLEHEŠTI KORISSETTU
"Vera Petrovna esittäy miehellä olijan naisen perintehellistä juhlapukuo , kumpani oli ommeltu XIX vuosišuan lopun vanhojen mallien mukah .Šemmosie pukuja piettih piällä Suman ta Vienanmeren rannikon toisien kylien naiset .Pitkähiemani paita on korissettu pitsillä , helman alla on pakšu alahameh .Vihrie košto on šulkušta , šamoin šulkušta on paikka , kumpani on kiinitetty kolmella šolella .Korva - ta kaklakorut on luajittu helmilöistä .Piäššä on perintehellini höyhen-koru helmilöistä ta čäpčä ".
Näin on kuvattu Vera Jermolajevan puku .Pitäy koroštua , jotta naisella on kakši juhlapukuo , a kultasella lankalla korissettuja puvun ošie hiän luati šamoin iče .Šen lisäkši naini paistau makeita sriäpnöjä , hoitau puutarhua , auttau punukkojen kašvattamisešša šekä laulau Suml’anka-folklorikollektiivissa ta Sudaruška-lauluryhmäššä .
Vera Petrovnan puku piäsi voittajakši aikuhisien pukujen kešen .Festivalin toisešša ošašša hiän esitti oman puvun lavalla , kerto šiitä ta ičeštä .
– Miun puku on melko uuši , šillä on kakši vuotta . Toisella juhlapuvulla on 20 vuotta .Mie elän Sumašša 50 vuotta ta yli 20 vuotta käyn Suml’anka-folklorir yhmäššä , ta šilloin piti ommella pukuja .Enšin omin voimin ompelima , a šiitä meijän luokši ruvettih käymäh opaštajat : Jelena Jäskeläinen , Polina Vorobjova , Irina Iljina .Miun mieleštä arvoštelijat pantih merkillä še , jotta värit hyvin šovitah toini toisella ta še , jotta oman puvun mie iče ompelin .A čäpčöjä iče ompelen tilaukšella ta lahjakši , šano Vera Petrovna .
Naisien kešen toisella paikalla piäsi Nadežda Parhačeva , a kolmannella – Svetlana Flerko .
Lapšien kešen voittajakši piäsi Milana Jevdokimova Piiteristä .16-vuotini neičyt ompeli ruškien puvun ta koristi kultaismuššalla lankalla .
– Šemmosie pukuja ommeltih ennein XIX vuosišuan keškilukuja , a šen jälkeh piettih piällä vain vanhoja . Näitä pukuja käytettih vanhemmat naiset tahi nuoret neiččyöt juhlapukuna .Paita on pitkähiemani ta korissettu pitsillä ta nappiloilla .Pukukokomukšešša on pohattoja helmikoruja , šelitti puvun luatija .
Neiččysien kešen toisella paikalla piäsi Ani Galst’an ta kolmannella Marija Huovinen .
– Pitkäh aikah pomorilaiseh kulttuurih ei kiinitetty tarvittavua huomijuo , ka rahvahan muisto oli elošša . Piti kerätä aktiivisien ihmisien joukko ta ruveta ruatamah , kannattamah luovien kollektiivien toimintua , lisäsi festivalin järještäjä L’udmila Rots .
Kilpailun lisäkši oli šuuri konserttiohjelma , kumpasen aikana kaččojat kuunneltih kaunehie perintehellisie lauluja , kačottih tanššija ta tiijuššettih Vierissän kešen pomorilaisista perintehistä .
Festivali oli järješšetty Venäjän kulttuuriruatajien luovan liiton pomorilaisen ošaššon Pomorilaini kaunotar -festivali-kilpailun projektin kannatukšella .
Taitavin pomorilaini eläy Sumašša
Karelian Proper
New written karelian
"