Texts
Return to list | edit | delete | Create a new | history | Statistics | ? Help
Alina Gapejeva. Vieljärven da kogo Ven’an histouriedu säilyttäjes
Alina Gapejeva
Vieljärven da kogo Ven’an histouriedu säilyttäjes
Livvi
New written Livvic
Vieljärven
školan opastujat da opastajat jo mondu vuottu kerätäh vahnoi harvinazii veššilöi .
Vieljärven školan opastuspertilöis säilytäh mieldykiinittäjät eksponuatat .Karjalaine gorničču -muzei , Vieljärven školan histourien muzei da Vieljärven kyläkunnan Bojukunnivon muzei vietäh omah puoleh školan joga gost’ua .
Toizen kerroksen erähäh opastuspertih on sijoitettu mennyzien vuozisavoin ruadobrujii da vehkehii .Orrel ollah suurimahat samvuarat , rinnal riävys rouno ollah ogalakkahat katalkat-ut’ugat , lattiel seizotah kangaspuut , st’oklan ual ollah čopakosti lad’d’atut kirjoindetut käzipaikat .Seiniä pitkin ozuttelust’oklien tagan ollah ylen vahnat tavotut ruadobrujat , nygöi – ylen harvinazet .
Vieljärven ylbevyksenny on Vieljärven mual löyttylöin Suuren Ižänmuallizen voinan aigazien veššilöin kollektsii .Se on toizes pertis .Školan johtai Irina Antonova iče ozutti kaikkie da saneli ainavoluaduzis löydölöis , ezimerkikse , vuvven 1938 tankistan šl’omas .
– Sen lövvettih meijän mečis da annettih meile eččijät . Se hyvin säilyi , kaččomattah sih , ku kodvan aigua virui muas .On meil lendokonehen paloi , kudamat löyttih Ruočinsuon lähäl Vieljärven kyliä .Kaččokkua , ruamas kai noumerugi nägyy .A täs ollah saldatan omat dokumentat : vojennoi kartočku , vuozien 1941–1944 kiitändykirjazet , saneli Irina Igorevna .
Pidäy mainita , juuri Irina Antonovan kehitykses oli perustettu Bojukunnivon muzei .Sinne mielihyväl kävväh eri-igähizet rahvas , sen tilois pietäh eri pidoloi .
Vie yksi muzei , kudai jo rodih školan histourien vuitikse , on taloin enzimäzel kerroksel .Sie ollah ruokos ezinehet , kudamat säilyttih školan talovusaitas : fotokartočkat , kiitändykirjazet , galstukat , flavut , barabanat , kirjutuskonehet , piirustukset da toizet Nevvostoliiton aigah kuulujat ezinehet .
– Allun ruavole pani L’ubov’ F’odorovna Nesterova . Opastajat da opastujat keräiltih školavehkehet pruazniekkuzualan tagan olijah pieneh pertizeh .Sie vahnoi veššilöi suau kaččuo kaksi-kolme hengie yhtel aigua , enämbiä ei synnytty .Myöhembi školamuzei oli sijoitettu suurembah opastuspertih , muzein avajazet piettih školan loppenuzien illačul , saneli kazvattamizen puoles vastuaju johtajan sijahine Jelena Ignatjeva .
Opastai ozutti lapsen käil piirustetun Iosif Stalinan portrietan .Stalinan kuvat sih aigah oldih ku obrazat rouno Nevvostoliiton rahvahih niškoi .Joga pahah luaduh kirjutetus Stalinan portrietas taidoilii voidih panna kiini .
Jelena Vladimirovnan mieles , se portriettu on ruokos školas jo läs 80 vuottu .Sanakse , Vieljärven škola tänä vuon täyttäy 188 vuottu .
Aigu juoksou , muailmu muuttuu .Ezinehet Vieljärven školan muzeilois jo roittih meijän suuren muan histourien ozannu .Nygyaigazet školaniekat toiči ni arvata ei voija , mikse da kunne pidi erähii ezinehii .
Vieljärven da kogo Ven’an histouriedu säilyttäjes
Livvi
New written Livvic