Texts
Return to list | edit | delete | Create a new | history | Statistics | ? Help
Heini Rostkova. Muzejan projekt toi sured satused
Heini Rostkova
Muzejan projekt toi sured satused
Veps
New written Veps
5. keväz’kud
Karjalan Rahvahaližes muzejas "Natural’noje hoz’aistvo " -projektan avtorad tegiba ühthevedod . Azjtegol mugažo ezitadihe fotoiden sirdändozuteluz , miččehe mülüiba "V nature !"-konkursan vägestajiden fotod .
Konkursaha ühtniba Karjalan erazvuiččiden tahoiden eläjad .Kaiked konkursale oli oigetud 27 fotod , 18 niišpäi projektan tegijad valičiba ozutelusen täht .Fotoiš om karjalaižid sömižid , kalatuz , heinäntego , mectuz , tradicionaližid Karjalan pertid da sauvotusid .
– Mö valičim nenid fotoid , miččed , meiden mel’pidon mödhe , paremba "avaižiba " temad , enamba ladun mödhe kožuiba ozutelusehe . Tahtoižim ezitada ozutelusel enamba-ki fotoid , no varaidam , miše erasiden muzejiden zaloihe ei mülü muga äi banneroid fotoidenke , ved’ möhemba nece ozuteluz lähteb matkaha Karjaladme , – sanui üks’ projektan tegijoišpäi , muzejan radnik Jekaterina Logvinenko .
Ozuteluz om avaitud Karjalan Rahvahaližes muzejas sulakun 6.päivähasai , a sid’ se vedetas Karjalan erazvuiččihe agjoihe .Fotokuviden keskes om mugažo 1890.–1920. voziden etnografižid fotoid , miše ozutelusen kacui voiži rindatada Karjalan eläjiden elon ladud ende da nügüd’ .
Ozutelusen avaidusel pauklahjoitihe nened "V nature !"-konkursan vägestajad , kudambad ei voinugoi tulda aigemba .Heiden keskes om Šoutjärven eläi , školan opendai Ales’a Anušenkova ičeze poiganke Nikitanke .Nikita mamanke tegiba konkursan täht videorolikan kalateses .Videorolikas Nikita mugažo lugi vepsän kelel Ol’ga Žukovan runon kalatamižes .
Ozutelusen avaidusen jäl’ghe projektan tegijad mugažo ozutiba udištadud "Pohjolan kadril’ "-kaikenaigažen ekspozicijan .Sigä ezitadihe uz’ ozuteluzkompleks , kuna ühtes Karjalan tradicionaližiden sädoidenke nügüd’ om pandud sobiden tegemižen kalud – kangazpud , kožalid .Ližaks , zalas seižuba pachad ekranoidenke .Niiš oma vändod , miččiden abul kaikutte tahtnik voib kodvda ičeze tedoid Karjalan rahvahiden sädoiš .
Mugažo ozutelusen kävujad tundištihe toižiden vändoidenke , miččihe taritas väta neciš ekspozicijas .Ozutesikš , hajun mödhe el’geta , mi om bankas .Bankoiš oliba kondjan künz’ , jogot’ , šolloid , kuivatud murikaine , kuivatud manzikaine , kuivatud babukad da jablokad .
Paiči "V nature !"-konkursad , üks’nimišt ozutelust da ekspozicijan udištamišt projektan aigan oli vedetud kahesa lekcijad Karjalan tradicionaližes elomištos , oli tehtud kaks’ fol’klorišt koncertad da mugažo oli kuvatud kaks’ dokumentališt fi l’mad : "Ivanovoiden hutor " i "Kinerma . Man parahim taho ".
– Mö saim grantan Vladimir Potaninan fondaspäi . Nece om sur’ arvostuz .Sada grant neciš fondaspäi om kuti sada "muzejiden oskar ".Enamba kümned vot jo olem sanuded sen .Necen voden projekt om enččen üks’nimižen projektan jatktand , – sanui muzejan pämez’ Mihail Gol’denberg .– Karjalan kuz’ rajonad mülüba Arktižen röunaha – sigä eläb 40% eläjad . Ristitud , kudambad tuliba elämaha pohjoižehe , tegiba kaiken ičeze käzil .Projektan aigan mö tahtoim sada vastused küzundoihe : "Kut eläda pohjoižes ?", "Mikš ristitud tuliba tänna , kus om väl’l’ ma kündandan täht , kus kazvatada midä-se om jügedahk ?".Ved’ elo-ki oli jüged , tariž oli rata äjan ".
– Nene rahvahan tedod oma tarbhaižed da aktualižed nügüd’-ki . Meil oli taht sündutada nügüdläižiš ristituiš melentartuz’ tradicionaližehe rahvahan elomištoho , – sanui projektan ohjandai , muzejan tedosekretar’ Denis Kuznecov .
Muzejan projekt toi sured satused
Veps
New written Veps