Texts
Return to list | edit | delete | Create a new | history | Statistics | ? Help
Aleksejeva Maria . Hän openzi mindai pagižmaha vepsäks
Aleksejeva Maria
Hän openzi mindai pagižmaha vepsäks
Veps
New written Veps
Olen
sündunu vepsläižes perehes , mitte eläb penes külas Toižeg-nimel .Toižeges eläb vähä rahvast , ani kaikutte eläi om vepsläine .Ende neciš küläs kaikuččes čogaspäi kului pohjoižvepsän pagin , perehiš pagištihe kodikelel – vaiše harvas voi kulištada sanoid venäks .Sigä lapsed saskeliba vepsän kel’t maman maidonke .Nece om minun vepsläižiden juriden augotiž .
Minun baboi da dedoi molembad oma vepsläižed , kaikutte heišpäi tedab vepsän kel’t laps’aigaspäi .Hö pagižiba vep säks vanhembidenke , sebranikoidenke , opendajidenke , a konz hö tegiba ičeze perehed , ka pagižiba vepsäks lapsidenke-ki .Muga i kazvoi vep sän kelen pagižijoiden sugu .Lapsed-žo surel tahtol kaičiba tradicijad ičeze uziš perehiš .Kaikutte baboin da dedoin vunuk hot’ vähän , no tedab vepsän kel’t .
Ku pagišta minun polhe , ka olen kaikid noremb vunuk , jäl’gmäine da , voib sanuda , kaikid nügüd’aigaližemb .Minun laps’aigas jo oli tedomašinoid , Internet , äi tedoid .I kense voi meletada : "A min täht hänele vepsän kel’ , se-žo ei ole popul’arine ?"No minun baboi päti , miše minus kodikel’ eläškandeb .
A lapsen olin ani nenakahan .Mugoine taba oli , miše ku midäse en tahtoi – en tege .I lujas minä en navedind päivkodid , minei oli mel’he olda baboinno da dedoinno adivoiš , konz vanhembad oliba radoil .Sikš lujas äi aigad mänitin baboinke .Hän vändi minunke laukaha , söti mindai keitosel , mö ühtes pirdim , lugim kirjoid …Lujas veslas oli minei babanke .Toine toiženke-žo baboi da dedoi pagižiba vaiše vepsäks , a kerdan minä el’gendaškanzin heid .Melentartušt-žo oli teta , miš om pagin .
Konz minei oli koume vot , baboi sanui : "Pidab sinei-ki vepsäks pagišta !" – i zavodi opeta mindai .Ezmäks tedištin sanad "tervhen ", "spasib ", "nägemoi " da openzimoi sanumaha , ken minä olen .Mäniba päiväd , minun päs oli jo enamba sanoid , da baboi sanui : "Mašoi , zvoni bat’ale da kucu longeks ".Muštan , kuti nece oli egläi , kut otin trubkan da sanuin : "Bat’ , tule kodihe keitost sömaha ".Muga , kerdaspäi kerdaha , minä pagižin jo enamba i enamba .
Sid’ vepsän kel’ oli minai päivkodiš , školas , erazvuiččiš festivališ .Eskai universitetas valičin opeta vepsän kel’tbmugošt armastust baboi kazvati minus .Hänenke minä kaiken aigan pagižin vaiše vepsäks .Meil oli penid petusid , miččid niken ei voind teta .
Nügüd’-ki minä pagižen hänenke vaiše vepsäks .Hot’ tedan , miše vastust jo nikonz ei linne .No rižan : baboi kuleb mindai , el’gendab da om korktad mel’t , miše hänen uništuz eläb – hänen pen’ vunukaine pagižeb vepsäks .A minä kaiken aigan toivotan baboile , miše minunki lapsed , hänen pravunukad , pagižeškandeba vepsäks hänen muštoks .
Hän openzi mindai pagižmaha vepsäks
Veps
New written Veps