Texts
Return to list | edit | delete | Create a new | history | Statistics | ? Help
Aleksandra Lesonen. Kalaštajat šuatih onnie
Aleksandra Lesonen
Kalaštajat šuatih onnie
Karelian Proper
New written karelian
Kahekšanteh kertah
Vuokkinie-meššä piettih perintehellini kalaššušfestivali "Kuitin kala ".
Parahien kalaštajien nimeštä kilpailtih 14 joukon jäšenet , a onnekkahimmakši tuli kolme joukkuo .Enšimmäistä kertua kolmešša vuuvvešša oli šuatu lohi , kummaista kilpailupäivänä perintehellisešti piäššetäh järveh tilaisuon sponsorit – Kala - ja marjapojat -yhtyveh .Mieš , kumpani enšimmäisenä šai kallehen kalan , šai 50 tuhatta rupl’ua lohitalouvelta .
"Kuitin kala " on tovellini perehpruasniekka . Kuittijärven jiällä tuli nuorie ta vanhempie ošallistujie , kalaššettih koko perehineh .Eryähät kalaštajat iänettä šyvennyttih ruatoh , a toiset nakrettih lujah varajamatta pölättyä kaikki kalat .Järvellä oli tosi juhlallini ilmapiiri .
Kilpailuajan loputtuo kalaštajat tultih rannalla ta annettih kaikki pyyvvykšet arvoštelijilla , kumpaset viessattih ne ta valittih joka joukon pienin ta šuurin kala šekä miärättih kilpailun voittaja , kellä oli painoltah šuurin pyyvvyš .
Tänä vuotena Kala - ja marjapojat tuaš piti 50 tuhannen rupl’an arvonnan kalaštajien kešen .Oli luajittu jiäloukko ta šiih piäššetty kymmenen kirjolohta .Ošallistujien tehtävänä oli šuaha yhen kaloista toisie rutompah ta šuaha šiitä 50 tuhatta rupl’ua .Tällä kertua onnenlohen šai heti kolmen joukon oššallistujat !Ka toisie nopiemmin šen luati Anatolii Šaprikin .
– Še on šuuri lykky ta tovellini onni ! Še oli ihana .Mie šain šen 10 minuutin piäštä , šano kalaštaja .
Talvikalaššukšen voittajie ilmotti kilpailujen piätuomari , valtijollisen pienikokosien laivojen tarkaššušvirašton ruataja Viktor Domnin .
Pienemmäštä kalašta , kumpasen koko oli vain kuuši ta puoli senttie lahjan šai Poplavki-joukko .Šuuremman kalan pituš oli 46 senttie ta šen šai Poeti-joukko .Kala oli toisena onnenlohena .Joukko toiseh kertah ošallistu festivalih ta lohen šai Nikita Ševčenko ahvenen šilmäh tavallisella onkella .Šaman joukon jäšen Sem’on Ševčenko šai lahjan nuorimpana kalaštajana ollešša .
Kilpailun kolmannella paikalla piäsi Ahven-joukko – kalamiehet šuatih 2 kiluo 206 grammua kalua .Toisella paikalla tuli Gran’-joukko .Kalaštajien pyyvvykšen paino oli 3 kiluo 396 grammua .Enšimmäisellä paikalla tuaš piäsi Šeppä-joukko .Kuittijärvi anto paikallisilla kalamiehillä 4 kiluo 957 grammua kalua .
Kaikki nominantit ta voittajat šuatih lahjoja kilpailun sponsoriloilta , a ošallistujat – sertifikatit .
Kuitin kala -kilpailun järještäjät Sreda-keškuš ta Vuokkiniemen Kylätalo kiitetäh talvikalaššukšen kilpailujen partn’orija ta sponsorija .
Kalaštajat šuatih onnie
Karelian Proper
New written karelian