Texts
Return to list | edit | delete | Create a new | history | Statistics | ? Help
Ozan irvistely vai oligo löylyy?
Ozan irvistely vai oligo löylyy?
Livvi
New written Livvic
Ozan
irvistely vai oligo löylyy ? (ven . "Иро́ния судьбы́ , и́ли С лёгким па́ром !") on nevvostolaine vuvven 1975 kaksisarjahine telefil'mu , sen ohjuajannu on El'dar R'azanov .Nevvostoliitos sen enzi-ildu oli 1. pakkaskuudu vuvvennu 1976 Keskustelevidienien Enzimäzes ohjelmas .
Luajindan histourii
Fil'mu on Emil' Braginskoin da El'dar R'azanovan ven . "С лёгким паром ! или Однажды в новогоднюю ночь… "-ozutelman fil'muamizennu .Ozutelmu kirjutettih vuvvennu 1969 da fil'man luajinduaijakse sidä jo ozutettih monis Nevvostoliiton teatrois .Myöhembä sidä ozutettih muan 110 teatran laval , ulgomualgi .
R'azanov sanoi , ku ozutelman , kui fil'mangi juondehen pohjannu ollah tozitapahtumat .Toven oli ristikanzu , kudai 31. talvikuudu lähti kylyh da huondeksel oli jo toizes linnas .Mih tämä loppih , R'azanov da Braginskii ei tietty , sendäh keksittih iče .
Sygyzyl vuvvennu 1975 enne fil'man enzi-ildua Nevvostoliitos , Kogo Nevvostoliiton telefil'moin festivualin hantuzis Ozan irvistely vai oligo löylyy ? -fil'mu enzimäzinny kačottih Gruuzien eläjät .Tbilisis pietys pivos fil'mu sai enzimäzen sijan .
Juondeh
Juondehes piämielenny on Brežnevan aigukavven yhteiskunnallizen arhitektuuran atkal yksiluadužus .Se sellitetäh jumoristizes piirdofil'muezisanois , kudamis arhitektoroil pidäy noudua poliitiekkoi da b'urokruatiedu (ohjuaju da animuattoru Vitalii Peskov ).Tuloksennu rodih se , ku yhtenmoizet , ga funksionuallizet monikerroksizet eländytaloit roittih joga linnas , kyläs da linnanymbäristöl kaikes Nevvostoliitos .
Oman jogavuodizen perindön mugah joukko ystävii vastavuu Moskovan erähäs yhteiskunnallizes kylys Uvven Vuvven pruazniekan pidämizekse .Hyö äijän juvvah pruaznuijes piähengen Žen'a Lukašinan tuliedu kihloihmenendiä Gal'anke (Lukašin uvvenvuvven yöl huavuau puašittua miehele Gal'an ).Jälles kylyy Puavilale , erähäle ystävis , pidäy lendiä Leningruadah , kus händy vuottau akku .Kaikin lähtietäh kaimuamah ystäviä lendoazemale .
Konzu ystävät tullah lendoazemale , Žen'a da Puavil jo muatah .A Saša da Miša ei voija juohattua , kel pidäy lendiä .Puavilas tuači hyö istutetah lendokoneheh Žen'an .
Žen'a kaiken lennon aigua maguau ärevynnyön rinnalistuajan olgupiälöil , kudai jälgimäi Leningruadas avvuttau hänele lähtie lendokonehespäi iäre .Nuori mies havaččuu Leningruadan lendoazemal duumaijen , ku häi on Moskovas .Häi ottau taksin da sanou šouferile oman adresin .
Tuli ilmi , ku Leningruadas on sama adressi koil , kudai nostandan mugah on ihan sama kui Žen'an kodi Moskovas .Moskovalaine nouzou liftal "omah " fatierah dai avain pädi (kui sanottih ezisanois : "…standartanmugazien fatieroin nostandu standartanmugazien lukkuloinke ").Pertilöis kai pertilomut ollah enimälleh samat , kui Žen'an fatieras Moskovas , ga nuori mies on liijakse humalas , häi ei näi eroloi .
Sil aigua fatieran emändy Nad'a Ševel'ova tulou kodih .Häi tahtou vastata Uuttu Vuottu oman kavalieran Ippolitanke .Häi löydäy omas magavosijas maguajan vakkinazen miehen .Häi oppiu ajuakuččumattomua gost'ua iäre , ga se tabavunnuh ei voi ellendiä , midä "hänen " fatieras ruadau vakkinaine naine da mindäh häi sie komanduiččou .Konzu fil'man piähenget ozutettih toine toizele pasportat elopaikan kirjoihpanendoinke , sit vai kai selgeni .Žen'a on pahas mieles : Moskovas händy vuottau Gal'a .A Ippolit Nad'alluo tulduu ei usko Žen'an da Nad'an sellittämizii .Nuori mies huavuau ajua Moskovah , ga hänel keräl ei ole dengua .Häi kiändyy järilleh Nad'an fatierah .Ippolit rubieu varuamah Nad'ua täh mieheh da lähtöy iäre .Nad'a tahtou teriämbäh piästä Jevgenies , ga tulieh huondeksessah nimittumii reissoi Moskovah ei ole .Žen'a äijän kerdua oppiu soittua Moskovah da sellittiä Gal'ale , midä tapahtui .Jägimäi häi suau paista neidizenke , ga se Leningruadas kuultuu heittäy trupkan iäre .Nad'a menöy Moskovan azemale da ostau omale uvvele tuttavale junalipun Moskovah , ga se revittäy sen da sanou , ku nikunne ei lähte .
Žen'al da Nad'al tulou viettiä uvvenvuvven yö yhtes .Enzimäi hyö ollah vihoissah toine toizen piäl , ga hil'l'akkazin lauhtutah da miellytäh toine toizeh .Huondeksel hyö tundietah , ku kai , mi tapahtui heijänke oli hairahtus , da piätetäh erota .Nuori mies tulou järilleh Moskovah .Matkan jälles väzynyh da yöl ei muannuh nuori mies uinuou .Havaččuhuu duumaiččou , ku nägöy Nad'ua unis , ga häi istuu rinnal .Häi piätti tulla hänellyö Moskovah da ei olluh vaigei löydiä mielespeittävy , heilhäi on sama adressi dai avain pädöy .
Novellizacii
On olemas "Ozan irvistelyn " novellizacii (druamu tarkoin remarkoinke ), kudai on jullattu erilazih El'dar R'azanovan fil'moin novellizacieloin kogomuksih .
Pajot da runot
Fil'man käzikirjutukseh nähte kirjutettih yheksä runuo .Kaheksah niilöis pidi luadie pajot .El'dar R'azanov oli sidä mieldy , ku yhtel säveldäjäl roih jygei kirjuttua kerras kaheksa pajuo .Häi kiändyi sit nellän säveldäjän puoleh : Jan Frinkel'an , Isaak Švarcan , Andrei Petrovan da Mikael Tariverdijevan puoleh .Hänen mieles jogahizel pidi kirjuttua kaksi pajuo .Enzimäi kaikin suostuttih , ga sit kolme kieldävyi eri syylöin periä : yhtele kehoitettih ulgomuale lähtendiä , toine ei voinnuh ruadoloin periä .Jäi vaiku Mikael Tariverdijev .
Käzikirjutuksen lugiettuu Mikael Leonovičua pani miettimäh sen žanroin moniluadužus .Jälgimäi häi piätti iččeh nähte , ku se on Rastavan suarnu .Säveldäi luadi muuzikan Marina Cvetajevan , Jevgenii Jevtušenkon , Bella Ahmadulinan da toizien tundiettuloin runoilijoin tevoksih .
Kai muuzikku fil'mas on Mikael Tariverdijevan kirjutettu .Hänen akkah Vera musteli :
"Kerran Tariverdijev astui syöndykohtas siiriči , kudamas toizien ristikanzoin joukos istui El'dar R'azanov da pajatti ven . "На Тихорецкую состав отправится ...".Sen pajon häi tahtoi ottua omah uudeh fil'mah da pidi pahua mieldy , ku sen on rahvahan pajo .Ga toziazies pajo oli kirjutettu minun ukon ouperah nähte .Pajatti sen Vladimir Visockii , sendäh R'azanov tädä pajuo kuuli , ga ei tiedänyh kirjuttajua ".
Miespajatandas fil'mas vastuau Sergei Nikitin (ven . "Со мною вот что происходит ", ven . "Я спросил у ясеня ", "ven . Никого не будет в доме " da ven . "Если у вас нету тёти "), naispajatandas — Alla Pugačova (ven . "По улице моей ", "ven . На Тихорецкую ", ven . "Мне нравится ", ven . "У зеркала ").Aleksandr Kočetkovan kirjutettuu balluadua ven . "Балладу о прокуренном вагоне " fil'mas lugou Andrei M'agkov da Valentina Talizina .Allus pajattamah pajoloi fil'mas valmistihes Anna German , ga sidä ei puuttunuh ruadua — varoi ulgomualazen pajattajan kučundah ei pandu fil'man b'udžiettah .
Saundtrekan fil'mah nähte oli ozittain piästänyh ilmah Tariverdijevan plastinkal Melodija-firmu vuvvennu 1976.Kogonaine saudtrek oli ezitönnyh CD :l vuvvennu 2009 ven . "Бомба-Мьюзик "-firmu .Vuvvennu 2016 saundtrek jullattih vinilal Yhtistynnyös Kuningaskunnas leiblal "Earth ", vuvvennu 2019 — värikkähäl viniilal ven . "Бомбой-Мьюзик ".
Kuvavukset
Fil'man piäoperuattoru Vladimir Nahabcev piätti käyttiä sih aigah uvvistuksennu olluttu kolmen kameran sistiemua .Yhtel aigua ruadoi kolme kamerua , kudamat kuvattih kolmes eri puoles .Se äijäl kebjendi ruavon , ga toizielpäi pitkendi kuvavuksien aigua .
Kuvuamizet algavuttih kevätkuul , a loppiettihes kezäl .Sen periä fil'mas on keinolluajittu lumi .Silloi vie lumihiudalehkeräzii da toizii agreguattoi ei keksitty , lundu luajittih käzil vuatas , bumuagas da penoplastas .A ku olis tuulen puhalduksii , käytettih tukkienkuivatindu .
Läs kai kuvavukset mendih Moskovas da vaiku erähii ozii kuvattih Leningruadas .Mollembat fil'mas ozutetut fatierat oldih Vernadskoin prospektal : kodilois 125 (sie oli Lukašinan fatieru ) da 113 (Nad'an fatieru ).Mosfil'mal kylyozah nähte nostettih erilline paviljon .
Tovelline ven . Третья улица Строителей-uuličču oli Moskovan samal mikroalovehel kui Vernadskoin prospektu .Ga jo vuvvennu 1963 se sai Marija Uljanovan nimen .
Vuvvennu 2003 taloin seinäl , kus rouno ku eli Žen'a Lukašin , azetettih mustolaudu .Sen avuajazih otti ozua El'dar R'azanov .Enzimäzenny yön al'uuminine plastiinu varrastettih .Vuvvennu 2007 laudazet azetettih kerras kahtele koile Vernadskoin prospektal — taloil 125, da taloil 113, — ga netgi ei hätkie oldu .
Kinokoittelut
Žen'a Lukašinan — miehen piäroulii — tavoitteli kuulužu ozuttelii Andrei Mironov .Ga R'azanov kieldävyi hänes .Sih roulih häi ei eččinyh naiziensuvaiččijua , a mostu miesty , kudaman ulgonägö da ičenviendy ei kiinittäs naizien huomavuo .Mironovale kehoitettih Ippolitan roulii , ga häi kieldävyi sit .Žen'a Lukašinan roulii tavoiteltih Oleg Dal' , P'otr Veljaminov , Stanislav L'ubšin da Innokentii Smoktunovskii .Andrei M'agkov ihan petties rodih Lukašinakse .Ohjuaju oli kriittine hänen puoleh , ga häi koittelulois ozuttihes kaikis uskottavimakse .
Vaigei oli vallita ozuttelijuagi naizen piäroulih .R'azanov "ei nähnyh Nad'ua " nigo L'udmila Gurčenkos , nigo Valentina Talizinas , nigo Svetlana Nemol'ajevas , nigo Antonina Šuranovas dai toizis kuulužis nevvostolazis ozuttelijois .Enzimäi häi tahtoi , ku naizen piäroulii ozuttas Alisa Frendlih : häi ylen hyvin maltoi ozuttua komiedizii rouliloi da hyvin pajatti , mi oli tärgei täh fil'mah nähte .Ga taidonevvosto ei hyväksynnyh händy .Pol'šalazes ozuttelijas Barbara Bril'skas naizen piäroulih kandiduatannu R'azanov rubei duumaimah jälles pagizendua toizen ohjuajanke .R'azanov kučui fil'mah ulgomualazen ozuttelijan , ga vieraskielizen paginluavun periä händy iänitti Valentina Talizina .Talizinal sežo oli fil'mas Val'an , Nad'an ystävän rouli .
Ippolitan roulih enzimäi miärättih Oleg Basilašvilii .Häi ehti ozuttuakseh erähis epizoudois .Ga kuvauksien aigah kuoli hänen tuattah da kolliegu Jefim Kopel'an , da häi ei voinnuh jatkua ruaduo .Sit hänen sijah tuli Jurii Jakovlev .
Gal'an roulih enzimäi hyväksyttih Natalja Gvozdikovua .
Žen'a Lukašinan ystävii ozutettih El'dar R'azanovan ystävät — Georgii Burkov da Aleksandr Širvindt .Ohjuaju enne ruadoi heijänke toizis fil'mois .Aleksandr Bel'avskoidu kučuttih myöhembä .A Nad'an da Žen'an muaman rouliloih hyväksyttih L'ubov' Sokolova da L'ubov' Dobržanskaja , hyö sežo enne ruattih R'azanovanke — otettih ozua ven . "Берегись автомобиля "-fil'man kuvavuksih .
Fil'man joukkokuvauksih otti ozua Aleksandr Bel'ajev , NTV :n siäennustuksen tundiettu juondai .
Fil'man enzi-ildu
1. pakkaskuudu vuvvennu 1976 18:00 čuasun aigah Enzimästy programmua myöte ozutettih Ozan irvistely vai oligo löylyy ? -fil'mu .Fil'mua ylen äijäl kiitettih .F'odor Razzakovan sanoin mugah fil'man kačoi 100 miljonua kaččojua .Luguzien kirjazien suaduu , kudamis kyzyttih vie kerdu ozuttua fil'mu , se ozutettih toizen kerran 7. pakkaskuudu vuvvennu 1976.Lyhendetty fil'man versii ozutettih kinoteatroisgi , kus fil'mu sežo rodih kuulužakse rahvahan keskes .Sie sidä kačoi läs 7 miljonua hengie .
ven . "Советский экран "-julgavon lugijat sanottih Ozan irvistely vai oligo löylyy ? vuvven 1976 parahakse fil'makse , a parahakse ozuttelijakse vallittih Andrei M'agkovua , kudamal fil'mas oli Žen'a Lukašinan rouli .Vuvvennu 1977 El'dar R'azanov , käzikirjutuksen kirjuttai Emil' Braginskii , operuattoru Vladimir Nahabcev , säveldäi Mikael Tariverdijev da fil'mat piäroulilois olluot Barbara Bril'ska da Andrei M'agkov suadih Nevvostoliiton Valdivollizen palkindon tunnustuksennu fil'mah ozanotandas .
Palkindot
1976 — ven . "Советский экран "-žurnualan lugijat sanottih Ozan irvistely vai oligo löylyy ? -fil'man vuvven parahakse fil'makse .
1976 — Andrei M'agkovua sanottih Nevvostoliiton vuvven parahakse ozuttelijakse ven . "Советский экран "-žurnualan kyzelyn mugah .
1977 — Nevvostoliiton valdivolline palkindo , palkittih ohjuaju El'dar R'azanov , piäroulilois olluot Barbara Bril'ska da Andrei M'agkov , säveldäi Mikael Tariverdijev , operuattoru Vladimir Nahabcev , käzikirjutuksen kirjuttai Emil' Braginskii .
Toziaziet
Fil'man algutekstusanois on painohairahtus : sanas "исключительно " ei ole "л "-kirjaindu .Oigiehkirjutus da välimerkisistiemu sit ezimerkis on säilytty .
"Совершенно нетипичная история которая могла произойти только и исключительно в новогоднюю ночь ".
Ohjuajan mielen mugah fil'man allus pideli ozuttua vertol'uotaspäi kuvattuloi samanluaduzii nevvostolazii rakenduksii .Ga fil'man b'udžiettah ei kuulunuh moizii kululoi , sendäh niilöin sijah kaččoi nägi animacien .
Konzu Nad'a nostau lumikivoksespäi Ippolitan kuvan , sit ei ole Jakovlev , a Basilašvili .Konzu uvvessah tahtottih luadie tämä kadru , lundu jo ei olluh .
Piähengi Nad'a ruadau opastajannu .Ga paginas Ippolitanke häi hairahtuu da sanou : "ven . Я забыла одеть праздничное платье ".Ven'an kielen siändölöin mugah hänel pidi sanuo ven . "надеть ".
Lukašin lendäy Leningruadah Domodedovon lendoazemaspäi , ga Nevvostoliiton aigah pohjazen da päivänlaskun reisut lähtiettih lendoh Šeremetjevos-1 .
El'dar R'azanoval fil'mas oli epizoudurouli — lendokonehel matkustajan rouli , sen piäle ainos pačkahtihes maguaju Lukašin .
ven . "Какая гадость эта ваша заливная рыба " da ven . "О , тёпленькая пошла " ollah virkehet , kudamii ei olluh fil'man käzikirjutukses .Net oldih Jurii Jakovlevan improvizaciennu .
Moskovas vuvves 1958 algajen oli ven . 3-я улица Строителей , ga vuvvennu 1963 se sai Marija Uljanovan nimen .Leningruadas ven . 3-я улица Строителей-uuliččua nikonzu ei olluh , ga vuvves 1955 vuodessah 1962 oli kerras kaksi ven . улица Строителей-uuliččua , yksi — Krasnogvardeiskan mikroalovehen tevolližusalovehel ; nygöi täl uuličal on ven . Бокситогорская-nimi , toine — Kirovan mikroalovehel , nygöi — Marineskon uuličču .
Kul'tuuruvaikutus
Vuvvennu 1981 Nevvostoliiton kommunistizen partien XXVI kerähmöl Leonid Brežnev omas selvityspaginas mainičči fil'mas :
Ei pie sellittiä , kui on tärgei , ku kai meis ymbäri olis kaunis da hyvän mavun mugah .Olimpiuadan objektat da Moskovan erähät eländykohtat , Leningruadan elävytetyt mustomerkit da uvvet arhitektuuruansambl'at , Alma-Atan , Vil'n'usan , Navojin da toizien linnoin uvvet rakendukset ollah meijän ylbevyksenny .Linnannostandu tarviččou suurdu taidoilmekkähytty da moniluadužuttu .Kui ei olis , kui fil'mas , konzu piähengi vierahah linnah puuttuhuu ei voinnuh eroittua nigo vierastu kodii , nigo vierastu fatierua omas .
Indies vuvvennu 2015 piäzi ilmah fil'mu ven . "Я люблю Новый год " Sanni Deolanke da Kangana Ranautanke piäroulilois .Fil'man piähengil ollah indielazet nimet , kai tapahtuu Čikagos da Nju Jorkasе .A juondeh on ihan sama kui Nad'an da Žen'an histouries "Ozan irvistelys ..." Ga prod'usserat oldih vaikkani idein ottamizes .
Kezäl vuvvennu 2021 Ven'an ohjuaju Mar'us Vaisberg piätti luadie fil'man oman variantan nimel ven . "Ирония судьбы в Голливуде ".Amierikkalazen fil'man kuvavuksih otettih ozua Emma Roberts , Džulija Robertsan plem'aniekku , Tomas Mann , Medelin Petš da Britt Robertson .
Jatko
Ozan irvistely -fil'man jatko nimel "Ozan irvistely . Jatko " piäzi ilmah talvikuul vuvvennu 2007, se kerras rodih kuulužakse da keräi enämbän 55 miljonua dollarua , fil'man luajindahhäi meni viizi miljonua dollarua .Žen'a Lukašinan da Nad'a Ševel'ovan täyzi-igäzien lapsien roulilois , kudamat puututtih ihan samah tilah kui heijän vahnembat , ollah Konstantin Habenskii da Jelizaveta Bojarskaja .
Andrei M'agkov hos oligi ottanuh ozua kuvavuksih , ga jälles pidi pahua mieldy tuloksien periä .
Ozan irvistely vai oligo löylyy?
Livvi
New written Livvic
"
1.
1976 —