Texts
Return to list | edit | delete | Create a new | history | Statistics | ? Help
Uljana Tikkanen. Veri-ryhmä: viniili ta folk nyt on muotissa
Uljana Tikkanen
Veri-ryhmä: viniili ta folk nyt on muotissa
Karelian Proper
New written karelian
Tämän
vuuvven alušša Veri-ryhmä esitti oman enšimmäisen viniililevyn , kumpasešša on kahekšan kappalehta äijiäl-al’pomista .
LEVY KARJALAN KIELELLÄ
Levyn julkaisu tuli huomattavakši tapahtumakši musiikin šuvaiččijien šekä karjalan kielen šäilyttäjien kešen .Karjalankielistä musiikkie julkaissah viniilillä harvoin .1980–1990-luvulla oli ollun Santtu Karhun musiikkie viniilillä , a tällä vuosišualla še on enšimmäini karjalankielini musiikkilevy .
Musiikin nauhotuš piettih Petroskoissa Gandvig-studijošša , a levyn valmissuš tuli mahollisekši ulkomualla alkuperäiskanšojen kielien musiikkistudijon kannatuštoimena .
– Myö lyhyöššä ajašša valmistima nauhotukšet ta levyn kannen . Julkaisija šano nauhotukšen kuntuo oikein hyväkši .Meilä še on tärkie , jotta Petroskoissa voipi nauhottua musiikkie hyväššä kunnošša .Šamoin olemma hyvällä mielellä , jotta folkmusiikki ta laulut karjalan kielellä kiinitetäh huomijuo koko muailmašša , koroštau ryhmän jäšen Grigorii Arhipov .
Viniililevyjen julkaisija löysi Eurasijan kanšojen nykyaikaista musiikkie internetissä .Kulttuurin ta folkperintehen šäilyttämisekši musiikkiryhmät käytetäh vuosišatojen ikäsie lauluja ta annetah niillä uutta elämyä , šepittyän niitä varoin šähkömusiikkie .Toisien luvušša oliki Veri-ryhmän äijiäl-al’pomi , kumpani oli virallisešti julkaistu vuotena 2024.
– Mie julkaisen Eurasijan kantakanšojen harvinaista ta omaperäistä musiikkie . Innoššukšena on omien juurien ta šuvun šekä istorijan tutkimukšet .Tahon antua iäntä kulttuuriloilla , kumpaset ollah kavonnan uhan alla , šelittäy julkaisija .
VINIILIN ŠUOSITUŠ ONKAŠVUŠŠA
Viime aikoina levyjen myönti kašvo 30%.Vaikka musiikkie nyt voipi kuunnella eri digitalisilla laittehilla , ka levyt jiähäh šuvaiččijien kokomukšissa .
– Kyllä levyjen kuuntelu ta pitämini ei ole käytännöllistä . Niitä pitäy šäilyttyä missänih , levyjä on helppo pilata ta vielä še ei ole halpa harraššuš , ka toiselta puolelta ihmiset ikävöijäh ainehellisie vehkehie .Ei ole šelvä , missä šäilyy digitalini musiikki : serverilöissä , digitališäilöissä , missä lienöy ilmašša , a levyö voipi pityä kiäššä , panna še šoimah , tuntie viniilin toistamatointa hajuo .Košetuštuntehet ollah oikein voimakkahat , šentäh muoti levyih ta kirjoih ei lopu .Miušta šiinä onki šuosijon šala .A eruo digitalisen ta viniilimusiikin šoittamisešša huomatah vain harvat , šanelou muusikko Vitalii Hmel’nitskii .
Šamoin šitä , jotta viniili on šuosijošša ta nykyni folkmusiikki on mukava eri kanšojen , ikien , harraššukšien etuštajilla tovistau niise yleisö , kumpani tulou konserttiloih ta festivaliloih kuuntelomah musiikkie .
– Myö esittimä levyn Petroskoissa ta Piiterissä ta molommašša konsertissa šalit oltih täpötäyvet ihmisie . Levyjen painošmiärä oli oššettu parissa päiväššä , eryähät oššettih levyn muutomie kappalehie .Nyt vuotamma uutta painošmiäryä , lisyäy ryhmän solisti viululla ta jouhikolla Vladislav D’omin .
Nykyjäh ryhmän šuunnitelmissa on musiikkivideon valmistamini : ohjuaja ta musiikkikappaleh on valittu .Šamoin on valmis CD-levy , kummaista voipi oštua ryhmän jäšeniltä .
Veri-ryhmä esittäy rauhallista ta huaveiltavua folkšähkömusiikkie .Laulujen tekstit ollah vienakši .
Veri-ryhmä: viniili ta folk nyt on muotissa
Karelian Proper
New written karelian