Texts
Return to list | edit | delete | Create a new | history | Statistics | ? Help
Romanov Jevgenii . Uskomatoi sygyzy
Romanov Jevgenii
Uskomatoi sygyzy
Livvi
New written Livvic
Mendih
siiriči kiirehet kezäpäivät , konzu oli äijy hälyy da huoldu da kudamih ammui jo harjavuin .Ihan vuottamattah tuli loma .Minä kerras en voinnuh ellendiä , ku loma algavui da voibi huogavuo , kuilienne ainos mielet kiännyttih ruadoh päi .Vähitellen čukelduin ruadohommih da loma rubei ihastuttamah .Sai huogavuo perehinneh .
Loma meni hyvin da huolimata .Joga päiviä oli midätahto uuttu da ihastuttajua .Erähänny piän minä lähtin vahnembielluo Poštekyläh .Sit kodvazekse tulin Petroskoile , sanoin akale , ku vahnembile pidäs minun abuu da myö akan kel piätimmö , ku minä voin uvvessah mennä kyläh .
Oli vuvven 1977 poudu sygyzy .Ruavot oldih ruattu .Vahnembat ihastuttih minun tulendua .Illoil myö tuatan kel ehtimmö kävvä meččäh marjoi keriämäh .Sinävuon oli äijy pihl’ajan marjua , kudamii myö keräimmö ei vai ičele , ga vie veimmö "Karelpotrebsojuzah ", kudai oli Vilgan kyläs , kaheksan kilometrin piäs Pošte-kyläspäi .Sit lunnastimmo vähäzen den’gua .
Minun kyläs olendu jo oli loppevumas .Vie käimmö marjah .Erähänny illan tavan mugah lähtimmö meččäh , tulimmo paikan piäle da ottavuimmo ruadoh .Ga sit myö vihjaimmo , ku pikkaraine linduine juoksendelou sinne-tänne kuadunuttu puudu myöte .Linduine huolestuksis da igäväh luaduh piipetti , tuli muga lähäl , kai sai koskie sidä käil .Se hämmästytti , sendäh ku meččylinnut ristikanzua varatah .Myö azetuimmo da kodvazen kačoimmo linduu da sen juoksendelemistu .Sit tuatto sanoi : "Tämä ei ole hyvä , läkkä kodih !"Kodih tulduu kuulimmo muamas , ku häi lämmitti päččii , ga savuu lykkäi pertih , mindäh – ei sua tiediä .Myö tarkah kačoimmo päčin , emmo löydänyh nimidä huolestuttajua da vierimmö muate .Nellän aigah meidy nostatti muamo : "Noskua teriämbäh , kodi palau !"Myö tuatan kel juoksimmo pihale da näimmö , ku truvan piälimäine čura pakui levole .Levon loukospäi lennettih kyvenet .Tuli sytyi vuiškal .Tuatto nouzi yläh , a minä kannoin vetty kaivospäi , kudai oli 35 metrin peräs koispäi .Erähän kerran ammuldin vetty kaivospäi da lähtin juoksemah kodih päi , ga vihjain , ku taivahanrannan piäl lekahtumattah rippuu milienne läpettäi disku .Sit impul’soin myödäh lähtiettih kirkahat säjehet tiettyy muoduo da piduhuttu .Ymbäri oli valgei , kui päiväl .Minä muga hämmästyin nähtyy , ga en voinnuh lekahtuakseh da kačoin taivahah .Kodvazen mendyy minä tostimmos da rubein kandelemah vetty , ga heittelemättäh kačoin taivahan kummua .Sit pilvet kogonah salvattih kirkahan lekahtumattoman diskan .Uvvessah rodih pimei .Tulen sammutettuu myö istavuimmo čuajuu juomah .Minä kačoin čuassuloih , oli viizi čuassuu huondestu .Muate jo emmo vierryh , ainos pagizimmo nähtyy .Se oli 20. syvyskuudu 1977.
Kahten päivän peräs minä tulin linnah , sendäh ku loma loppih .Erähänny piän ruavos olles minä sanelin , midä näin .Kenlienne minun kolliegois sanoi sih nähte lehteh .Kodvazen mendyy minule soitettih Komsomolets-lehtespäi da kehoitettih sanelemah , midä näin .Minuu vastai piätoimittai , kuduale minä sanelin kai , kui oli , da annoin edukädeh luajitut piirustukset .
Tämä tapahtumu kiinnostutti ei vaigu lehtimiehii , ga eri aloin ekspertoi , kuduat tuldih Petroskoih Moskovaspäi .Nevvostoliiton Tiedoakadeemien tyveh oli kai luajittu erilline komiissii , kudai sellitti kaikkii faktoi , kuduat koskiettih tundemattomua lendäjiä objektua , kudai nähtih 20. syvyskuudu 1977.Kyzeltävinny oldih petroskoilazet , kuduat nähtih sen objektan , niidy oli äijy .Net tiijot , kuduat suadih rahvahis , verrattih tiedoloih , kuduat suadih objektua valvojis laittehis .Ekspertoin mieles minus kirjutetut tiijot oldih kiakis lähembä tiedoloi , kuduat suadih laittehis .Vähitellen pagin tundemattomih lendäjih objektoih nähte loppih .Ga se ei merkiče sidä , ku net tapahtumat hävittih niilöin mustos , ket nähtih sen hämmästyttäjän vuottamattoman ilmivön .
Nähty jätti minuh häviämättömän jällen ilmazekse igiä .Minä täh päiväh suate mustan kaiken šeikkuperäzesti .Mendih vuvvet , ga minä tässäh näin kui ilmizin sen tapahtuman da se huolestuttau minuu .Minul pahakse mielekse ei ole tieduo , mih loppih sen ilmivön tutkimine .Minä uskon , ku toizetgi rahvas , ket nähtih sen tundemattoman lendäjän objektan , mustetah sen hyvin da tänäpäigi voidas sanella sih nähte .
Uskomatoi sygyzy
Livvi
New written Livvic