Texts
Return to list | edit | delete | Create a new | history | Statistics | ? Help
Posdn'akova Ol’ga . Hyviä mieldy da uuttu tieduo
Posdn'akova Ol’ga
Hyviä mieldy da uuttu tieduo
Livvi
New written Livvic
Turistumatku-stuudien seinis
piettih mieldykiinittäi vastavus nimel "Čamoduanuhistouriet ".
Turistumatku-stuudi oli perustettu Uuzi opastus -ei-kommertsiellizen fondan kannatuksel .Stuudien johtai Galina Bosareva kučui petroskoilazii neroniekkoi sanelemah omis mieliruadolois linnan ekskursienvedäjile .Vastavus piettih 31. kevätkuudu .
Minä sanelin omas kottien kollektsies .Sih kuuluu läs 300 piendy suveniirukottua .Kollektsiele pani allun Alisa Gubarevan lahjoitettu kottupuaru .Alisa Petrovna toi minule net kotat-tuohuksenalustat Ruočispäi vuvvennu 1997.Häi pajatti Oma pajo -horas , da Ruoččih hora kävyi pajattamah .Sit minä iče rubein ajelemah eri Baltiekkumualoih da tuomah siepäi eri sabo-kottii , kudamis oli nämmien mualoin simvouliekkua .Konzu minun kollektsieh nähte tiijustettih minun dovarišat da omahizet , hyögi ruvettih tuomah kottii eri mualoilpäi .Nygöi minul on jallaččiloi Bolgaries , Turtsies , Gretsies , Vjetnamas , Tailandas da Braziliespäi .Tiettäväine , on meijän mual luajittuloi kuatančoi da virzuloi .On kummakkahii kottii meripihkanke , on "kuldu "- da hrustalitufliloi .Broškii , riputtimii , virittimii , čuajumal’l’oi , uvven vuvven bobazii , naisčomenduksii – kai net ollah pikkarazet kotanmuodozet .Kerran pikoi-pikkarazii luistimii minule täydyi kogo kuuzipuun čomendamizeh !Vastavukses minä ozutin vaiku vuitin omua kollektsiedu – vaiku kaikis mieldykiinittävimät kotat .
Omas mieliruavos saneligi lapsien sportuškolan konsertmeisteru , ekskursieloin vedäi Tatjana Selivanova .Hänel on pienien muuzikkuškatuliloin kollektsii .Omat škatulit häi toi Gretsies , Moskovas , Nižnii Novgorodaspäi , Valamoin da Kižin suarelpäi .
Stuudien johtai Galina Bosareva valmisti prezentatsien , kudaman mugah häi saneli , mittumih mualoih häi oli käynnyh da kuspäi oli tuonnuh omii tyttilöi rahvahallizis sovis .Ammattii myöte histouriekku Galina Valentinovna saneli , kui nuorete häi kävyi Sampo-turistukluubah , musteli kummakkahii šeikkoi , kudamih hyö puututtih matkoin aigah .Häi maltau sanelta da kiinnostuttua , sanon kohti , lykystäy niilöile turistoile , kudamat puututah hänen ekskursieh Hirvakseh , Kivaččuh libo Sordavalah .
Minä olen suannuh äijän mieldykiinittäjiä tieduo täs vastavukses , ekskursieloin vedäjätgi toinah suadih uuttu neruo .Nevvon kaikile kävvä Turistumatku-stuudien pidoloih .
Hyviä mieldy da uuttu tieduo
Livvi
New written Livvic