Texts
Return to list | edit | delete | Create a new | history | Statistics | ? Help
Nadežda Vasiljeva. Nuoret pelattih aktiivisešti ta rohkiešti
Nadežda Vasiljeva
Nuoret pelattih aktiivisešti ta rohkiešti
Karelian Proper
New written karelian
Kalevalašša
on piättyn yleisvenäläisen šotapatriottisen Iskuvälähyš 2.0 -pelin piirivaihe .
Še on Enšimmäisien Liikkehen luaja projekti , kumpani opaštau nuorie puoluštamah kotimuata , ruatamah joukošša šekä kašvattau rakkahutta meijän šuurta muata kohtah .
"Iskuvälähyštä " on pietty Kalevalan piirissä jo muutoma kerta . Še tulou šuosittummakši ta šiih ošallistuu yhä enemmän koululaisie .Tällä kertua pelih ošallistu yli 40 poikua ta tyttyö piirikeškukšešta , Borovoi-pos’olkašta ta Jyškyjärven kyläštä .Tänä vuotena peli oli omissettu Šuuren Voiton 80-vuotisjuhlalla ta Tuatonmuan puoluštajan vuuvvella Venäjällä .
Avatešša "Iskuvälähykšen 2.0" vaihetta šen piätuomari , Taisteluvellehyš-kanšalaisjärještön Kalevalan ošašton johtaja , Afganistanissa taistellut Andrei Homič korošti :
– On tärkietä viettyä šemmosie tilaisukšie , kumpaset kašvatetah nuorie patriottija .Toivotan ošanottajilla miärättyjen tarkotukšien šuamista , oikieta taisteluo , joukkohenkie ta kirkkahie tuntehie .
Peli näytti , jotta oli juuri näin .Pelissä oli šeiččemen vaihetta .Jokahisešša niistä koulujoukkojen taistelijat jouvuttih tovistamah omie tietoja ta taitoja , mitä hyö šuatih pitän ta tarkan valmissukšen aikana .Reippahašti ta taitavašti hyö purettih ta kovottih konehpyššyö , treenattih šäteily -, himija - ta biologijašuojan peruštehie .
Keškuššairalan felššeri Natalja Krestjaninova ankarašti ta tašapuolisešti arvošti lapšien tietoja , konša heijän piti antua enšiapuo uhrilla .Šiinä vaihiešša kaikki joukot pärjättih šujuvašti .
Šotaurheiluvaiheijen lisäkši "Iskuvälähykšen " taistelijat näytettih omie tietoja oman kotišeuvun šekä muan valtijo - ta šotaistorijan alalla .Šiinä kuot’t’elukšešša hyö niise pärjättih hyvin .
Karjalan tašavallan Šukupolvien vuoro -šiätijön Omatunto-joukon eččijä Mihail Kontkanen kerto nuorilla armeijalaisilla , mitein hiän eččiy Šuuren Isänmuallisen šovan aikana kuatunuita šotilahie .Vain kahešša männyöššä vuuvvešša Mihail toverien kera nošti muašta melkein 30 tuntomatointa šotilašta , 54. ampumadivisijonan taistelijua .Heijän jiännökšet löyvettih Kalevalan piirin taistelujen alovehelta .Mihail kučču koululaisie ošallistumah ečintäruatoh , kummaista ei pietetä : kun tulou lämpö , kuatunuijen nimettömien šotilahien ečintä jatkuu .
"Iskuvälähykšen 2.0" arvoštelijakunnalla ei ollun helppo miärätä voittajua . Kaikki joukot näytettih hyvie tulokšie ta heijän välissä oli minimiero .Kaikin näytettih ruumillista voimua ta ketteryttä šekä kajehittavua kekšintäkykyö ratkaisešša vaikeita tehtävie ta pärjäteššä eri kuot’t’elukšissa .Ka kuitenki yhen pistehen erolla enšimmäisekši tuli Jyškyjärven keškikoulun Nuoret armeijalaiset -joukko .
Kohta pienen kyläkoulun opaštujat ruvetah puoluštamah piirin hyvyä mainehta alovehellisešša Iskuvälähyš 2.0 -kilpailušša , kummaista pietäh jo oraškuun puolivälissä .Toivotamma pojilla ta tyttölöillä mäneššykšie pelissä ta rupiemma toivomah , jotta hyö voitetah .
Nuoret pelattih aktiivisešti ta rohkiešti
Karelian Proper
New written karelian
–