Texts
Return to review | Return to list
Karjalan kylän eläjät ičeväil kunnostetah kul’tuurutaloidu
history
May 22, 2025 in 11:06 Нина Шибанова
- created the text
- created the text: Kolatsellän aktivistat kruasittih paikallizen kul’tuurutaloin seinät taivahansinizikse. Se vie mustoittau ruiskukan värii. Sendäh paikallizet rahvas sanotahgi kul’tuurutaloidu “Ruiskukakse”. Kul’tuurutaloi kyläläzele on ylen tärgei kohtu. Sinne rahvas kerävytäh vastuvumah, huogavumah da pruazniekkoi pidämäh. Paha, ku kul’tuurutalois ei ole ruadajua. Kai, midä pidäy ruadua, ruatah paikallizet rahvas, eläkkeheläzet aktivistat ičeväil. Kai ruavot, tiettäväine, ilmai. Vaste ei ammui rahvas piätettih, ku pidäy kunnostua kul’tuurutaloin seinät. Hyvyönluadijoin kruugan avul oli kerätty lähes sadua tuhattu rubl’ua. Kerättylöih den’goih ostettih kruaskat da iče kruasittih seinät. KUI ENNE OLI – KUI NYGÖI RODIH – Kevätkuun aigah Vieljärves piettih Hyvyönluadijoin kruugu. Meijängi kylän rahvas yhtyttih sih. Kul’tuurutaloin kruasindah da kohendamizeh oli kerätty 78 000 rubl’ua. Sen ližäkse vie kädehizenny oli suadu 20 tuhattu rubl’ua. Ostimmo kruaskat, lavvat. Kiitämmö kaikkii, ket tuldih abuh, ket tahtotah, ku meijän kylä olis kaunis. Suuret passibot meijän deputuatale, Aleksandrale. Häi luadi enimät ruavot, kohendi da kruassi oččuseinät, sanou kylän aktivistu Zinaida Lomujeva. Kolme vuottu tagaperin Kolatsellän kul’tuurutalois oli loppiettu pieni remontu, kuduah vähät kylän eläjät iče kerättih den’gua. Vieljärven kylän haldivo autoi ostua lavvat. Kahtes nedälis oldih kruasittu tulendupertin seinät, metodistan kabiniettu da pandu nelli uuttu ikkunua. Pidoloi sežo hommatah da varustetah iče kyläläzet. Voitonpäiviä vaste Zinaida Mihailovna da Galina Mihailovna piettih “rohkevuon urokan” Heččulan lapsih niškoi. – Hyö vastattih meidy Velleskalmalluo keskikyliä. Zinaida Mihailovna sanoi, ku sih on havvattu lähes 500 meijän saldattua, oman muan puolistajua. Urokku jatkui Bojukunnivon zualas, kudai on kul’tuurutaloin seinis. Kylän rahvas kerätäh sinne tieduo niilöih kyläläzih nähte, ket oldih voinas, ket on havvattu velleskalmah. Sie on voinanaigastu vehkehty. Lapset piettih käzis Zinaida Mihailovnan tuatan medaliloi, häi 17-vuodehizennu lähti omua muadu puolistamah. Lapsile oli mieleh se meijän ajelus, hyö himol lugiettih runoloi da pajatettih pajoloi, kudamii valmistettih Voitonpäivän pruazniekakse. Lopus myö käimmö paikallizeh časounah, kus kunnivoičimmo surmattuloin saldatoin mustuo, sanoi Heččulan alguškolan opastai Irina Jevsejeva. Kylän kul’tuurutaloi on yhteiskunnallizen da kul’tuurizen elaijan keskus ruavahile da lapsile. Kolatsellän kul’tuurutalois ei ole ruadajua. Da kusbo se rodieu? Kyläs eläy näppine eläkkehelästy. Školua ei ole, lapsienpäivykodii ei ole, ambulatouriedu ei ole. Suaugo Zemskii rabotnik kul’turi -valdivollizen programman vuoh muanittua spetsialistu loittozeh kyläh? Rahvas sidä vähäl uskotah. A kuni rahvas ičeväil da omal himol opitah säilyttiä kul’tuurua pienes karjalazes kyläs. – Kul’tuurutaloi on kylän syväinkerä da hengi, ollah varmat paikallizet eläjät.