Texts
Return to list | edit | delete | Create a new | history | Statistics | ? Help
Heini Rostkova. Petroskoiš openikoil mäni vepsän kelen nedal’
Heini Rostkova
Petroskoiš openikoil mäni vepsän kelen nedal’
Veps
New written Veps
Kaikuččen
päivän sil nedalil , 21.–25. sulakud , Petroskoin Suomalaiž-ugrilaižes školas mäni azjtego , mitte oli omištadud vepsän rahvahan kul’turale da kelele .
Petroskoin Suomalaiž-ugrilaižes školas mäni tradicionaline "Vepsän kelen nedal’ " -akcii .Sen aigan openikoid süvemba tundištoittas vepsän rahvahan kul’turanke .Azjtegod mäneba erasiden urokoiden sijas .
– Lapsile akcii om mel’he , sikš ku necen nedalin aigan hö saba äi melentartuižid ližatedoid vepsän rahvahas , vasttasoiš tetabiden mehidenke – pajatajidenke , käzitöiden mastaridenke , lehtesen radnikoidenke , sädaimehidenke , – kudambiden rad om sidotud vepsän rahvahan kul’turanke da kelenke . Lapsed nägeba , miše vepsän kel’ om tarbhaine , se kävutoittas nügüdläižes elos , – starinoiči školan vepsän kelen opendai Nadežda Petrova .
Vepsän kelen nedalil likundurokoil lapsed vändiba vepsläižihe vändoihe , muzikurokoil – tundištihe vepsän rahvahan muzikaližen kul’turanke .Paiči sidä openikoiden täht tehtihe jogapäiväižed tegendad da erazvuiččed mastar’-klassad , miččihe voiba ühtneda kaik tahtnikad ripmatomašti sišpäi , mittušt kel’t hö opendaba školas – vepsän , karjalan vai suomen kel’t .
Üks’ mastar’-klassoišpäi mäni vepsän kelen nedalin jäl’gmäižen päivän .Pusep , Petroskoin universitetan Tehnologijan , taidehen da dizainan kafedran üläopenik Denis Laidinen , vedi lapsile mastar’-klassan , miččel hö openzihe kuvadamha tohespäi .Denis om sündunu Šokšus , laps’aigaspäi hän mahtab kuvata tohespäi , tehta puspäi radkaluid , muzikaližid vändimid da bobaižid .
– Minä ozutin lapsile , kut voib kuvata tohespäi nabornikan . Nece ei ole jüged .Pidab vaiše el’geta tehnik .Olen ihastusiš , miše voin sirtta ičein tedoid toižile .Meletan , ku hot’ üks’ ristit opendase miččehe-ni vepsläižehe käzitöho , ka minun rad ei ole tühj , – sanui Denis .
Vepsän kelen nedalin lopus lapsile taritihe pirtta bumagal associacijad "vepsläine "-sananke .Nadežda Petrovan sanoiden mödhe , enamba kaiked lapsed tegiba vepsläižiden paštatesiden , rahvahaližen poimetišen , babarmmujuižen kvarcit-kiven kuvid da pirdiba ristituid rahvahaližiš sädoiš .
Petroskoiš openikoil mäni vepsän kelen nedal’
Veps
New written Veps