Texts
Return to list | edit | delete | Create a new | history | Statistics | ? Help
Tikkanen, Ulyana. Pädöy olla kyläs
Tikkanen, Ulyana
Pädöy olla kyläs
Livvi
New written Livvic
Konzu
talvel kävyt Siämärven kylih , Ukšjärvele libo Sandal-järvele , matku algavuu yhteh luaduh : aijoi huondeksel lähtemmö linnaspäi , ajajes ajattelemmo matkua da dorogua , tarkistammo naviguattoran track-jälgie .Valličemmo lähtendykohtan da nouzemmo suksile selgäh .
Karjalazet luajittih kylii kaikis pättävembih kohtih , kaunehihgi : järvirandah , lahteh , kuduah ei tävvytä suuret tuulet , pitkäle niemele , sit joga taloih rodieu oma randu , pitkäle lagiele junole rannan da kallivon välih , sit rodieu aiga aidu kogo kyläle , tiä tottu toven olet kui kivehizen aijan tagan .Moizeh kyläh käyndy rodieu hyvä da kaunis ,a ku kylih jäi vahnua kirikkyö da kodii , ga sit sidä parembua …
Namojevan kyläh nähte enzimästy kerdua kuulin paginas Kripinevič Anastasija Stepanovnan kel .Lämmii mustelmii lapsuon kyläh nähte kuunneltes mielikuvitus pyöri : lujat taloit , pitky da kaidu niemi da sen vastaspäi suari , kudai kartale on merkitty nimel "Bičii – Häkkilöin suari ".Anastasija Stepanovnan kerdomuksis oligi Rakkahuon suari ,kuduah suate lapset kiistai uijeltih kyläspäi .
Namojevo – lyydikse Nuamoilu , kylä Ukšjärven rannal .Sadavuodehizet koit mugai seizotah yhteh riädyh .Suarele paikallizet rahvas nostettih pikkaraine časounaine .
Nuamoilah myö tulimmo Matkačču-kyläspäi .Hiihtimmö rannan myödäh jiädy myö , kačoimmo , kui mečän peräh tullah kallivorannat da yhtel tiel ečiimmö kohtua , kunne vois azettuo da ryypätä čuajuu kodimatkal .
Kyliä myö kylläl käveltyy myö ečimmö laučan libo pordahat , kudamii ei pie kaivua lumen ualpäi , sie huogavummo da juommo čuajuu .
"Ongo čoma , istut rahmannoin ižändän koin pordahil , kaččelet parziloin sadavuodehizii ruppiloi , tunnustat vahnoin kodiloin čomenduksii , kudamii jo näimmö toizis kylis . Loitomba piehtaroijahes da čiyčetetäh linnut ,sinä olet ihastuksis , ku ies on vie puolipäiviä luonnon helmas ", muga duumaijes matkuammo ielleh – Šuojun kallivoloin kohtah .
Kalaniekkoi da jiäh ongiloih niškoi purattuloi loukkozii bokittajen lähenemmö suurih kallivoloih Ukšjärven liidehrannal , nouzemmo yläh da kogo järvi on kui kämmenel .Tiäpäi vältämättäh nägyy päiväzen lasku , ga myö juommo loppussah omat čuajut , luajimmo vie kuvua mustokse , sanommo jiähyväzet Ukšjärvele da menemmö mašinalluo .
Kylän valličemmo ainos petties , kylien nimilöi "ongitammo " internetas , TV :n da lehtien uudizis .Mieli lähtie matkah Siämärven päivänlaskurannikole tuli piäh , konzu tiijustin Melanja Peskovah nähte .Naine oli runonpajattai , rodivui Kiiškoilah , eli Angenlahtes .Melanjas on kirjutettu moizet runot , kui "Akku paheksiu ukkuo ", "Omahizien kalmah panendu ", "Hiitolas kozičendu ", kuduat häi opastui tuatas .
Täl kerdua puutui kebjieh da ruttoh ajua Jessoilaspäi Angenlahten , Kiiškoilan da Kurmoilan kauti Särgilahtessah da järilleh .A mi hyvä , ku kyläh ugodih kentahto paikallizis eläjis da sanelou midätahto omas kois .A ku vie puuttunou karjalakse paista , ga sidä parembua ni pie ei .Täs matkas Maša opastui erähät tervehtyssanat karjalakse .
Pädöy olla kyläs
Livvi
New written Livvic