Texts
Return to list | edit | delete | Create a new | history | Statistics | ? Help
Blandov Aleksei . Ižorilaini Vanakyläštä
Blandov Aleksei
Ižorilaini Vanakyläštä
Karelian Proper
New written karelian
Ižorilaiset ollah
muinoini itämerenšuomelaini rahvaš , kumpani ammusista ajoista eli Piiterin ympärillä .Heitä niise kučutah inkeroisiksi , a heijän kotimuata - Inkerinmuakši .
Tietomiehet kirjutetah , jotta ižorin ta karjalan kielet ollah šamantapaset ta jotta niillä on yhtehiset juuret .On mukava , jotta vielä tuanoin ižorilaiset nimitettih iččie karjalaisiksi .
20 vuotta takaperin Leningradin alovehella eli muutoma šata ihmistä , kumpaset paistih ižoriksi . Nykyjäh niistä jäi vain 20 tahi 30 henkie ta Inkerinmualla vielä on paikat , missä voipi kuulla ižorin pakinua .Tänä kevyänä mie kävin šemmosešša kyläššä ta pakasin šen eläjien kera .
VANAKYLÄN ISTORIJA
Vanakylä šijottuu Rossoni-joven rannalla , aivan Viron rajan lähellä .Jotta piäššä šinne , miun piti ottua erikoini lupa .Enneinki Muajilman šotua še oli Viron aloveh , valtijon raja oli kylän viereššä , kalmismuan takana .Ei ole ihmellistä , jotta kaikki paikkaliset šukunimet oltih vironkieliset : Põder , Varkki , Roosipuu , Tuisk , Rohi ta toiset .Eryähät näistä šukuloista oltih virolaiset .Onnako Vanakylän šuurin oša eläjie aina oltih ižorilaiset .Venäläiset neiččyöt , još tultih šinne mie hellä , tavallisešti ruvettih pakajamah ižoriksi .
Kyläššä oli läheš 50 taluo , kakši kauppua , pravoslavnoi časouna ta baptistijen malittutalo .Kylän lähellä , Kallivieren tiellä šeisottih L’uterilaini kirikkö , koulu ta šuuri mel’l’ičča .Kylän ympärillä , mečissä ta joven molemmilla rannoilla oli äijän huutorie .Tiet vietih Jaanilinnah , Narvalinnah ta Ust’-Narvah (Narva-Jõesuuh ).Jaanilinnah voi piäššä laivallaki niise .Laiva kulki jokie myöten joka päivä .Kyläššä ei ollun šiltua , ka joven piäličči toimi ehätyšlautta .
VANAKYLÄN VANHIN ELÄJÄ
Vanhin kylän eläjä Johannes Varkki (ili kuin häntä kučutah kyläššä - Ivan Ivanovič ) on šyntyn vuotena 1943.Hänen vanhemmat oltih ižorilaiset ta elettih Vanakyläššä .1930-luvulla hyö šiirryttih huutorah , kumpani oli kahešša kilomerissa kyläštä päin , rakennettih šielä talo , liävä , kyly ta riihi , oššettih viskuukoneh ta puimakoneh , perattih meččyä , kaivettih ojie ta ruvettih kyntämäh muata tai pitämäh karjua : heposie , lehmie , kosie ta šikoja .
VAIKIET ŠOTA-AJAT
Šovan aikana pereh ei lähten Šuomeh toisien ižorilaisien kera , vain jäi huutorah .Neuvoštopartisanien kera šuhtehista tuatto oli otettu vankiksi Narvalinnah ta äšen oli ammuttava , no onnekši jäi eloh .
Šuru tuli jäleštäpäin .Vuotena 1944 peräytyöššä šakšalaiset vietih pereheltä pois koko karja ta tahottih tappua kaikki , ket oltih koissa , no huavotettih vain Johannes-poikua , kumpani oli yhen vuuvven ikäsenä ta ei voinun peittäytyö iče .Äšen nykyjähki hänen vartalošša on äijän nuarmie .
Šen tapahukšen tähen muamo rupesi läsimäh ta kohta kuoli .Tuatto jäi elämäh yksin ta kašvattamah kakši pientä poikua .Hiän ei nainun uuvveštah , eikä muuttun ulkomualla .Apuo ei ollun keltä šuaha – šukulaiset , kumpaset mäntih Šuomeh šovan aikana , varattih myöštyö Neuvoštoliittoh ta šiitä šiirryttih Kanadah .
ELÄMÄ VENÄLÄISEŠŠÄ VANAKYLÄŠŠÄ
Šovan jälkeh valtijon raja oli šiirretty lännemmäkši , i Vanakylä joutu Venäjällä .Šiitä ilmešty kolhosi , ka pereh jäi elämäh huutorah .Tuatto piti karjua , kašvatti potakkua ta toisie kašviksie šekä pyyti jovenkalua .Jovešta voi šuaha ahventa , lahnua , kuhua , haukie , lohta , kuorehta ka erikoisešti šielä arvoššettih nahkijaista .
Ivan Ivanovič ei käynyn alkukouluh ta 12 vuoteh šuaten ei paissun venäjäkši .Prihasena hiän mäni Narvalinnah , lopetti šielä koulun , rupesi ruatamah konehmiehenä kesrätehtahalla , a šiitä mečänhoitajana Jaanilinnan mečissä .Vain monen vuuvven piäštä hiän myöšty omah kyläh .
ELYÄ TA RUATUA ON MUKAVA
Korkiešta ijäštä huolimatta Ivan Ivanovičilla nykyjähki on väki talouš : kakši hepoista ta kakši lehmyä .Miun ativoinnan entisenä yönä yksi lehmistä poikiutu .
Ivan Ivanovič on paikallisen istorijan ta legendojen paraš tietäjä .Hiän pakajau ižoriksi hyvin ta vähäsen virokši .Tietomiehet , kumpaset tutkitah ižorin kieltä , käytih hänellä moničči .Ne , ket paissah karjalakši , voijah malttua hänen pakinua helpošti .
Ivan Ivanovičilla aina on äijän työtä .Hiän ei pie iččieh vanhana , šanou , jotta elämä on ylen mukava ta tahtou elyä šatah vuoteh šuaten .
Ižorilaini Vanakyläštä
Karelian Proper
New written karelian