Error:
Permission denied
Texts
Return to list | edit | delete | Create a new | history | Statistics | ? Help
Irina Sotnikova. Vastusel lugijoidenke Šoutjärves
Irina Sotnikova
Vastusel lugijoidenke Šoutjärves
Veps
New written Veps
Semendkun
lopus "Kodima "-lehtesen radnikad oliba adivoiš Šoutjärven vepsläižes etnografižes muzejas .Hö vastsihe külän eläjidenke , vepsän kelen da kul’turan navedijoidenke .Vastusele tuli äi lapsid-ki , Šoutjärven školan openikoid , kudambad opendaba vepsän kel’t .Kaikile oli melentartušt tundištadas uziden kirjoidenke vepsläižiš da vepsän kelel .
"Kodiman " radnikad starinoičiba "Periodika "-painišton polhe , kus paindas ei vaiše lehtesed da kulehtesed rahvahaližil kelil , no i erazvuiččid kirjoid vepsän , karjalan da suomen kelil . Jäl’gmäižes seičemes vodes "Periodikas " läksi eloho 16 kirjad vepsän kelel da vepsän kul’turan polhe .Suren homaičusen saiba Z .I . Strogalščikovan "Культурное наследие вепсов " ("Vepsläižiden kul’turjäl’gestuz ") -tedo -
kirj , Maria i Ol’ga Mironovoiden "Sanu , luge , kirjuta !" -openduzabukirj i Nina Zaicevan "Minun vepsläine oza " -novella .
Lapsil oli hüvä voimuz tundištadas vepsläižiden mirunke sarnan kal’t .Lehtesen radnikad ezitiba Gul’a Polivanovan "Armaz sarnaine – heled ojaine "-, Ol’ga Žukovan "Ezmäine änik "- da Natalja Silakovan "Nel’l’ dölod " -kirjad lapsiden täht .Lapsed tarkašti kundliba erazvuiččid sarnoid , a jäl’ges andoiba vastusid küzundoihe sarnoiden mödhe .Pidab sanuda , vepsläižed sarnad oma mel’he ei vaiše lapsile , no aigvoččile-ki , sikš ku niiš om peittud erine jüvä .Vepsläižed kirjutajad oma todesižed vepsläižen sanan mastarid , ozutaba vepsläižid kuvid toižes polespäi , ei muga , kut mö olem harjenuded nähta niid jogapäiväližes elos .
Vastusen lopus külän eläjil oli voimuz pidäda kirjoid kädes , kacta niid .Läz kaikutte homaiči , miččed čomad oma kirjad .Nece muga om-ki , ved’ kaikutte kirj om tehtud surel armastusel ičeze jurihe , kodiröunha , vepsän rahvahan kul’turaha da kel’he .Suren radon tegi vepsläine pirdai Darja Hil’ .Hän čomenzoiti kirjoid ičeze kuvil .Nägub , miše hän süväs rižab vepsläšt mirud da rahvahan kul’turad .Henged kuti eläbzoitaba kirjoiden lehtpolil ozutades rahvahan ičeladušt .
– Pidab paksumba tehta mugoižid vastusid , sikš ku konz mö vasttamoiš ühtes , mö tedištam toine toižes enamba . Naku , lugijad voiba otta lehtesen , a ved’ heile om melentartušt , kut se tehtas , ken radab toimištos , ked oma avtorad , kuspäi hö oma .Nene vastused abutaba tedištada ut , – sanub Šoutjärven muzejan pämez’ Natalja Anhimova .
Vastusen lopus Natalja Anhimova eziti adivoile melentartuižen ozutelusen , mitte om omištadud "Vepsän kul’tursebran " da Tedoakademijan jubilejile .Hänen sanoiden mödhe , ozuteluz lujas tuleb mel’he kacujile , se starinoičeb nügüdläižes vepsän kul’turas .Ozutelusel voib tundištadas vepsläižiden tedomehidenke , kudambad tegiba i jatktaba tehta sur’t i tärktad panendad vepsän kelen kaičendaha da kehitoitandaha .Sid’-žo voib tundištadas heiden tedoradoidenke , nägištada lujas harvinaižid fotokuvid .Mitte-se tundmatoi vägi da energii oma necil ozutelusel .Nacein , ei ole ühtei .Täs om ezitadud erazvuiččed tedomehiden sugupol’ved , no kaikid ühtenzoitab üks’ tegend – kerata , kaita i antta kal’hid ezitatoiden tedoid toižile sugupol’vile .Neciš ühtmudes om-ki todesine rahvahan vägi !
Vastusel lugijoidenke Šoutjärves
Veps
New written Veps