Texts
Return to list | edit | delete | Create a new | history | Statistics | ? Help
Galina Baburova. Meiden sebranikad praznuičiba jubilejan
Galina Baburova
Meiden sebranikad praznuičiba jubilejan
Veps
New written Veps
Täl
vodel ičeze jubilejan praznuiči meiden susedtoimišt , meiden sebranikad – karjalaine "Oma Mua " -lehtez .
35 vot "Oma Mua "-lehtesen lugijad saba tedoid karjalaižiden elon kaikid melentartuižembiš azjtegoiš da kaikid tärktembiš uzištoiš ičeze kodikelel . Lehtez lähteb eloho kaikuččen nedalin kahesal lehtpolel : nel’l’ lehtpol’t om karjalan kelen livvin paginal da nel’l’ lehtpol’t – karjalan kelen pohjoižpaginal .Sidä ezipakičeb läz 400 karjalašt .
Nügüd’ toimištos radab kuz’ mest , pätoimitajan om Natalja Sinickaja .Natalja radab lehteses 23 vot .Seičeme vot hän oli "Periodika "-painišton pämehen , a necen voden augotišespäi hän pördihe radole armhaze lehtesen toimištoho .Natalja tedab kaik lehtesen holid da erigoičusid , kaik radon jügedusid da satusid .
– "Oma Mua " -lehtesen päsabustuz om karjalan kelen nügudläine olo . Ved’ meiden lehteses kel’ om kehitotnus .Nügüd’ sihe voib käta mitte taht mirun literaturan tö .Karjalankeliženki literaturan töd ezmäi toimitadihe da paindihe "Oma Mua "-lehteses .Nügüd’ lehtesen materialoiden pohjal tehtas Jandeks-kändai da toižid abunikoid kelen opendamižes .Toine sabustuz om siš , miše neniš voziš mö em kadonugoi sidod lugijoidenke .Meiden radkund da lugijad oma kuti heimolaižed toine toižele , – sanub Natalja .
Ičeze jubilejad "Oma Mua "-lehtesen radnikad praznuičiba vanhas karjalaižes Veškelica-küläs .Nece külä jo äi kerdoid andab sijan ičeze etnokeskuses lehtesen praznikoiden vedändan täht .
Praznikal "Oma Mua " -lehtesen radnikoid ozateliba valdmehed , sebranikad , lugijad .Sijaližed sädaikollektivad lahjoičiba praznikališt mel’t ičeze pajo -, karg - da teatrezitusil .A lehtesen radnikad vediba melentartuižen viktorinan adivoiden täht .Adivod jagetihe videhe gruppaha .Vändnikoile pidi antta vastusid küzundoihe karjalan rahvahan tradicijoiš da veroiš .Nece oli ilokaz da , toižes polespäi , tarbhaine azj .Sen jäl’ghe praznikan adivoiden täht oli tehtud tundištoituzmatk Veškelica-külädme : starinoitihe sen istorijas , nügüdläižes elos da melentartuisijoiš .
– Olen radanu lehteses jo 15 vot . Ičein radon taguiči olen tedištanu Karjalad paremba : minai oli äi radmatkoid karjalaižihe külihe , olen sanu äi melentartuižid tedoid karjalaižiš , heiden elos , tabas da tradicijoiš .Meiden rad om äipoline .Minei om mel’he tundištadas uziden ristituidenke da kirjutada heiš .Hö kaiken surel tahtol varastaba uzid materialoid , – sanub lehtesen toimitai , päsekretar’ Ol’ga Smotrova .
Meiden lehtesil om ühtejiččid erigoičusid ."Oma Mua " -lehtesel , kut "Kodima "-lehtesel-ki , oliba jügedad aigkeskustad da satusekahad radvoded . No meiden lehtesiden päerigoičuz om se , miše läz kaikuttušt lugjad mö ku em tuntkoi iče , ka tedam , kut hän nägub .Mö armastam meiden lugijoid .Tedam , miš meiden lugii holdub , min polhe hänele om melentartušt lugeda .Mö tedam , kenen täht kirjutam .
Toivotam meiden sebranikoile necidä kesknäšt armastust lugijoidenke igäks .Jubilejanke , "Oma Mua "!
Meiden sebranikad praznuičiba jubilejan
Veps
New written Veps