Texts
Return to list | edit | delete | Create a new | history | Statistics | ? Help
Školteatr om čudokaz azj
Školteatr om čudokaz azj
Veps
New written Veps
Semendkus
"Kodima "-lehtesen toimišt ozateli Šoutjärven školad vägestusenke projektoiden konkursas .Vägestajad saba rahatugen ičeze školprojektoiden todenzoitamižehe .Sen kerdan vägestanuden projektan polhe "Kodimale " starinoiči Šoutjärven školan opendai Ales’a Anušenkova .
– Mitte om "Teatrpaja "-projektan istorii ?
– Ezmäi meiden školas oli kirjutadud koume projektad : "Teatrpaja ", mediastudijan tegemine da školan ezitanhan paremboituz . Mikš valičim "Teatrpajan "?
Sü om siš , miše minä ühtes meiden ühtesradnikanke – Sem’on Sergejevič Jefremovanke – enamba kaiked meletim necidä azjad .Meiden školas , kut äjiš-ki toižiš , kingitadas sur’ homaičuz teatrozutusihe .Nece om hüvä tradicii .
Ozutesikš , jogahižeks Udeks vodeks tegem ezitusen – vepsläižen sarnan .Kerdan kahtes vodes vaumištam spektakl’an augotižškolan openikoiden täht , ühtnem konkursoihe .Täl vodel eskai ajoim Derev’anka-külähä teatrkollektivoiden festivalile .
Meiden školale teatr om ani tärged azj .Radan tägä jo 12 vot , i kaik nene voded mö lapsidenke hüviš meliš ühtnem erazvuiččihe teatrozutusihe .
– Om-ik nügüd’ jo pättud , mihe mäneškaba paukrahad ?
– Neiččed , kudambad tegiba "Teatrpaja "-projektan , meletiba ičeze idejad ani tarkašti . Hö taričiba-ki , mihe voižim rajata paukrahad .Ozutesikš , čomihe teatrsädoihe .Meile ei tariž enamba jokselta külädme edel jogahišt spektakl’ad , pakita midä-se tutabil da sebranikoil vai tehta ičemoi käzil rekvizitad jäl’gmäižel kurol .Mö voim ostta čomid da hüvid kaluid – niidenke voim ezineda matkoil , ozutada spektaklid .Pala rahoišpäi mäneškab tehnikan ostmižeheb – ozutesikš , ostam videokameran da mujuprinteran .
Om ani tärged čomitada sportzalan .Meiden školas ei ole sur’t zalad , sikš kaik znamasižed azjtegod , ozutesikš , "Pajokeraine "-fol’klorfestival’ vai Opendajan päivan praznik , vedetas sportzalas .Tahtoižim tehta praznikališt il’mištod , miše tunduiži : nece ei ole vaiše sportzal , a mugažo lujas čoma sija .Sikš planuičem ostta kanghid , miše čomitada seinäd .Völ tahtoim riputada suren banneran , miččel oliži meiden školan fotoid , – se mugažo abutab tehta zalad kodikahambaks da čomembaks .
Völ üks’ tärged azj : kül’mkun augotišes meiden škol praznuičeb ičeze jubilejad – 220 vot !Kaik praznikaližed azjtegod vedetas sportzalas .Sen aigan tahtoim ozutada ühten meiden spektaklišpäi , no völ em tekoi miččen .
Nece voz’ tegese ani ozakahaks školan täht : meiden projekt vägesti konkursas , mö saim voimusen udištada zal da ostta kaik tarbhaine sen čomitamižen täht .A nügüd’ jubilejal mö ozutam udištadud zalad i ihastoitam kacujid spektakl’al .Toivon , miše praznik tegese muštokahaks da ilokahaks !
– Kut radab "Teatrpaja "? Starinoiče aigmäras , ühtnikoiš , scenarijoiš da toižes .
– Kezal "Teatrpaja " ei rada täuzin . Pärad zavodiše sügüz’kus , konz mö zavodim vaumištada ozutused .Lapsed pördasoiš školha – mö radaškandem-ki heidenke .Kaiken-se om äi planoid kezaks-ki : pidab ostta kaludišt , teatrsädoid , rekvizitoid , kanghid .Meil völ ei ole tarkad aigmärad – meletan , miše keradamoiš lapsidenke siloi , konz pidab vaumištadas azjtegoikš .
Planuičem tehta nel’l’ spektakl’ad Udeks vodeks .Ezmäks , vaumištam vepsläižen sarnan augotižškolan openikoiden da peniden lapsiden täht .Spektakl’ ozutadas redukus Kalag’-küläs .Toižeks , vaumištam voinspektakl’an .Nügüd’ om Kodiman kaičijan voz’ , i sikš mö tahtoim tehta midä-se voinan temale .Sen ližaks meil om tätüteatrozutuz da tradicionaline Uden voden spektakl’ .
Spektakliden tegemižehe ühtneškandeba eri-igäižed openikad .Ked-se tegesoiš akt’oroikš , toižed – kacujikš .
Nügüd’ meile om lujas tärged meletada , miččid spektaklid vaumištam ezmäks .Ozutesikš , tegem vepsläižen sarnan .Kezal pidab ostta teatrsädoid spektakl’an hengiden täht .Möhemba linneb voinspektakl’ .Sen täht ostam formad prihaižile da neičukaižile .Völ muštam tätüteatran polhe .Meile tariž ostta sur’ širm , mitte pandas lavale .Oliži hüvä , ku nece širm jäiži meiden školha kaikeks igäks .Uzid tätüižid mugažo pidab ostta .
– Kut sinä meletad , mi om hüvä školteatras ? Miččid voimusid se andab lapsile ?
– Školteatr om čudokaz azj . Minei se om lujas mel’he , sikš ku mö lapsidenke ühtes vändam erazvuiččid rolid , i hö voiba tehtas toižikš hengikš vai gerojikš .Minai om jo sur’ mahtišt neciš azjas , sikš el’gendan , kut om paremba väta nece vai toine spektakl’an pala .Mö diskutiruim necen polhe lapsidenke , opendam heid akt’oran mastarudehe .
A konz tuleb ezmäižen ozutusen aig i sinä oled teatrlaval kacujiden edes – nene oma čudokahad tundmused !Kundled aplodid – rižad , miše ozutid ičeiž lahjavut , ozutid ičtaiž udes polespäi ...Se om todeks arvokast .
Völ üks’ sur’ liža om siš , miše mö tegem ezitusid vepsän kelelbičemoi kodikelel .Kut i tobjimalaz , meiden planoiš om vepsläine sarn , no völ en teda , miččen sarnan valičem spektakl’an täht .Olem jo tehnuded äi rahvahan sarnoid , i nügüd’ tahtoim otta radho midä-se ut , midä völ ei ole ozutadud .Olen völ meletusiš sen polhe .
Kut oli jo sanutud , planuičem tehta vepsänkeližen tätüteatran peniden lapsiden da augotižškolan openikoiden täht .Nece-ki om ani tärged , sikš ku nügüd’ školiš vepsän kel’t opetas lujas vähän – vaiše üks’ urok nedališ .A mugoižed čudokahad formad , kut teatr , abutaba mel’dütoitta lapsid kodikelen opendamižehe .
Školteatr om čudokaz azj
Veps
New written Veps