Texts

[Evakuaciosta kun saavuttiin kotirannoille]

July 02, 2025 in 13:59 Нина Шибанова

created the text
created the text: Tulin vaivaine gor'arukka keskiyön aigazilla aijoilla. Mie duumaičin, što rubian omas kois roadoloi roadamah. Valgehien spoassuzien päiväprosvetnikkojen noustuo rubezin kaččomah omoa igistä eländä paikkoani. Miun gor'an vanhad varduod kai katettih kaččoessa. Miun igine eländäpaikkani on murennettu da keännetty. Miun vaivazen kai hyvyyz oli ottamien okajannikat kai uberittu. Itkin da smietin, kui nyt rubian, gor'arukka, azettumah da elämäh vanhoilla puutunuzilla puoluzilla. Kogonaizet kuuvet kuuhuot aivin azettelin omoa eländäsijaistani. Vasta vielä miula igävät roittih, kui ruvettih vaivazella muamorukalla sanomah, što sinulla ei ole enämbi omia oardehuizie. Tuodih sanomat olova narodakunda, jo sinulda on oardehuizet okončittu da tapettu. Miula pobiednoilla muamorukalla siit vasta igäväized langei. Millä mie, leinärukka, nyt rubian leiniäni leinittämäh? Kusta rannasta päin nyt rubian miilostiloi eččimäh? Vuotin muamorukka oardehuizista viestiä, aivan vieronazet viestittömih kavottih. Mie ozatoin muamorukka jo puamettiloitta viruin oardehuizieni täh. No duumaičen, rodieh vielä aiga, što oardehuizeni tullah järilleh da endini elos kodirannalla kohenduu.
created the text translation