Texts
Return to list | edit | delete | Create a new | history | Statistics | ? Help
Natalja Antonova. Vieljärveläzet vuotettas uuttu kul’tuurutaloidu
Natalja Antonova
Vieljärveläzet vuotettas uuttu kul’tuurutaloidu
Livvi
New written Livvic
Jo
läs kolmiekymmendy vuottu Vieljärven kyläs ei ole putillistu kul’tuurutaloidu .Se piettelehes endizes lapsien päivyhoidokohtas , kudai oli nostettu 1960-vuozil .Uvven taloin luajindu hätkestyi vuozikymmenikse .
Vieljärven paikkukunnan kirjoil on 1600:n mail ristitytty , kudamis läs tuhattu eläy Vieljärves .Vuvvennu 2018 kyläläzet kirjutettih kirjazen Karjalan halličukseh , prižmittih uvven kul’tuurukoin nostandua .Pošti nellisadua hengie pani kirjazen uale omat nimet .Nenne kirjutandat tässäh ollah hovus , ga dielo nikui ei eisty .
Mennyöl nedälil rahvas tuaste kerävyttih nygözeh kul’tuurutaloih , kudamas kezälgi on vilu da levo vajattamas .Lauhtuttamah vieljärveläzii käi Priäžän piirin halličustaloin piämies Dmitrii Bujevič .Kai endizet hommat , paginat , kirjazet da uskaldamizet häi pani "tyhjikse sanoikse " mindäh sendäh vieljärveläzil ei ole valmis piäkyzymys – muapala uvven kul’tuurukoin nähte tässäh vie ei ole pandu valdivollizile kadastrukirjoile .Ilmai tädä varua ei anneta nikudamas programmaspäi .
Muan da taivahan välis
Vieljärven rahvas viäritetäh täs vijas paikallizii vallasolijoi , mindäh hyö ei šeikuittu srojindukohtua da ei paistu rahvahanke .Paikalline piämies puolisti omua iččie sil , ku muakohtua kirjoile pannes ainos tulou muutostu , häi buite nikui ei ehti niilöin peräh .Loppujen lopukse kohtu on vallittu – se on kylästadion , suuri muapala kylän keskučas .Vuvven loppussah pidäs olla valmehet dokumentat da allettu vie hälykkähembi ruado – varoin ečindy .Dmitrii Bujevič lujendi , ku se ei rodei helpo nygözis ololois .Toizin sanojen , uvven kul’tuurutaloin luajindu Vieljärven kyläs on muan da taivahan välis .
Meedikkuabuu rinnal da loittuopäi
Kerähmön aigah vieljärveläzet nostettih vie erähän huolestuttajan kyzymyksen .Heinykuus algajen loppevuu veren otandu fel’šaripunktal da anualizoin talundumašinan otetah Petroskoin linnan hantuzih .Lähimäine anualizoin otandukohtu on viijenkymmenen kilometrin piäs , Priäžän piirikeskukses .Vahnemban puolen rahvahale dai muitegi suuren paikkukunnan eläjile se rodieu priičču .Vieljärven paikkukundah kuuluu kolmekymmen nelli pienembiä pos’olkua da kyliä .Rahvas tahtotah suaha sotsiuallizii da kul’tuurizii palveluloi omas eländykohtas oigevuolleh .
Vieljärveläzet vuotettas uuttu kul’tuurutaloidu
Livvi
New written Livvic